იმუნიტეტის დამაქვეითებელი ფაქტორები
განვიხილოთ ყველაზე გავრცელებული ფაქტორები, რომლებიც ამცირებს ორგანიზმის ამ განსაკუთრებულ უნარს. ცხოვრების უმოძრაო სტილიჩვენს დროში ეს ყველაზე მნიშვნელოვანი ფაქტორია. ტელევიზორსა თუ კომპიუტერთან დიდხანს ჯდომა, მჯდომარე სამუშაო და, საზოგადოდ, ცხოვრების უმოძრაო წესი ჩვენი საუკუნის უდიდეს სამედიცინო-სოციალურ პრობლემათა ნუსხას ეკუთვნის.
მათი წყალობით ორგანიზმი დაავადებათა მთელ თაიგულს იძენს. ზოგიერთი პათოლოგია შემპარავად, თანდათანობით ეუფლება ადამიანს, ზოგი კი შედარებით სწრაფად და დაუფარავად. დიდხანს უმოძრაოდ დარჩენილ ორგანიზმში ნელდება სისხლის მიმოქცევა, ირღვევა ნივთიერებათა ცვლა, ამის გამო ფერხდება წიდისა და სხვა ტოქსინების (მომწამვლელი ნივთიერებები) გამოძევება, იზრდება გაცხიმოვნების რისკი. უმოძრაო ორგანიზმს დაავადებებთან ბრძოლის უნარი აღარ შესწევს.
მავნე ჩვევები
ამ კუთხით განსაკუთრებით საყურადღებოა თამბაქოს წევა. ეს იმუნიტეტის დამაქვეითებელი ის ფაქტორია, რომელიც, სხვებისგან განსხვავებით, ჯანმრთელობას შემპარავად, ნელ-ნელა, მაგრამ ძირფესვიანად ანგრევს. ხშირად ის ისეთ პათოლოგიურ პროცესებს უდებს სათავეს, რომელთა აღმოფხვრა ძალიან ძნელია, ზოგჯერ - შეუძლებელიც. მწეველი შესაძლოა წლობით არაფერს უჩიოდეს, მაგრამ ერთ მშვენიერ დღეს ონკოლოგთან აღმოჩნდეს. სიგარეტის ყოველი ღერი იმუნიტეტისთვის ნასროლი ტყვიაა. ონკოლოგიური დაავადება კი სხვა არაფერია, თუ არა ორგანიზმის იმუნური მექანიზმების მოშლისა და მათი ნორმალური ფუნქციობის აღრევის შედეგი.
ძილის უკმარისობა
/* (c)AdOcean 2003-2021, Advertline.https:mkurnali.ge.mkurnali zones.________ _____ */
ado.slave('adoceanadvertlinegelpmmhkfobb', {myMaster: 'gC_g7BxQlx9UWDeCK7yaEdkgIoxg2l6o6JUmNs2rvgn.i7' });
ძილს დიდი მნიშვნელობა აქვს ჯანმრთელობისათვის. ის წყალივით და ჰაერივით აუცილებელია. მისი უკმარისობა ორგანიზმს ვნებს. როგორ გავარკვიოთ, გვყოფნის თუ არა ძილი? თუ კვირის დასაწყისში ადვილად იღვიძებთ და სამსახურში წასასვლელად ადგომა არ გიჭირთ, მერე და მერე კი, კვირის ბოლოსთვის, სულ უფრო მეტად გიძნელდებათ, თუ უქმე დღეებში შუადღემდე გძინავთ (რაც არცთუ ისე სასარგებლოა), რათა წინა დღეების დანაკლისი აინაზღაუროთ, ეს იმაზე მიანიშნებს, რომ ძილი არ გყოფნით. ცხოვრების ასეთი წესი კი იმუნიტეტს ასუსტებს, რაც იმას ნიშნავს, რომ ვირუსული ინფექციები და უამრავი სხვა დაავადება ადამიანს სულ უფრო იშვიათად აუვლის გვერდს. თუ ქრონიკული გამოუძინებლობა წლობით გაგრძელდა, ადამიანი ქრონიკული დაღლილობის სინდრომისა და სხვა გართულებათა მსხვერპლად იქცევა.
არასწორი კვება
ადამიანთა უმრავლესობა არასწორად იკვებება. დიეტა, დაუბალანსებელი რაციონი აქვეითებს იმუნიტეტს. ამას ორი ძირითადი მიზეზი აქვს:
- ორგანიზმი ვერ იღებს საკმარისი რაოდენობის საკვებ ნივთიერებებს და პირდაპირი მნიშვნელობით შიმშილობს;
- საჭმლის მომნელებელ ტრაქტში სხვადასხვა დარღვევა მიმდინარეობს, ვითარდება გასტრიტი (კუჭის ლორწოვანი გარსის ანთება), წყლულოვანი პათოლოგია და სხვა დაავადებები.
როგორც პირველ, ასევე მეორე შემთხვევაში სერიოზული დარტყმა ადგება იმუნიტეტს, ორგანიზმის სენშეუვალობა სუსტდება და ადამიანს ავად გახდომა ემუქრება.
მძიმე ეკოლოგია
დღეს აღარავინ დავობს იმაზე, რომ ეკოლოგიური სიჯანსაღე დღეგრძელობის უმნიშვნელოვანესი ფაქტორია. ორგანიზმს მხოლოდ დაბინძურებული ჰაერი ან მავნე გამოსხივება კი არა, დიდი ქალაქების ხმაურიც ვნებს. ეკოლოგიური ფაქტორი მეტად საყურადღებოა, თუმცა მისი კორექცია რთულია. ყველას როდი შეუძლია ხმაურიანი და ჭუჭყიანი ქალაქიდან წყნარ, მწვანეში ჩაფლულ სოფელში გადასახლება. გამოსავალი ერთადერთია - სხვა მავნე ფაქტორების აღმოფხვრას უნდა ვეცადოთ, რათა შევძლოთ იმუნიტეტზე ეკოლოგიური ფაქტორის უარყოფითი გავლენის დაბალანსება, მისი განეიტრალება.
სტრესი
სტრესს იწვევს როგორც ფიზიკური, ისე ფსიქიკური დაძაბულობა. სტრესი შემთხვევითიც შეიძლება იყოს და მუდმივი, ქრონიკულიც. ერთეული სტრესის მაგალითია ახლობელთან უთანხმოება, სამსახურში წარმოშობილი გაუგებრობა, მუდმივ სტრესს კი არასასურველ გარემოში დიდხანს ყოფნა, იძულებითი საქმიანობა იწვევს. იმუნიტეტს უფრო მეტად სწორედ ქრონიკული სტრესი ვნებს. შემთხვევითი სტრესი ზოგჯერ უხდება კიდეც ორგანიზმს, ხელს უწყობს მის დამცველობით მექანიზმთა მობილიზებას. თუმცა ყველაფერს აქვს ზღვარი, მათ შორის - ერთეულ სტრესსაც...
