ეკა ჭავჭავაძე

განგური - ადამიანს კანიდან ყოველდღიურად 600 ათასი უჯრედი სცვივა, წელიწადში - 600 გრამი, მთელი სიცოცხლის განმავლობაში კი საშუალოდ 47 კგ-მდე კანს იცვლის.

რამდენი ძვალი აქვს მოზრდილ ადამიანს? - ახალშობილზე ნაკლები. ვიბადებით 350 ძვლით, დროთა განმავლობაში მათი შეზრდის შემდეგ კი 206 გვრჩება.

ენის ანაბეჭდი - ნუ გამოყოფთ ენას, თუ დამალვა გსურთ, რადგან, თითის ანაბეჭდის მსგავსად, განუმეორებელია ენის ანაბეჭდიც.

ახალი კუჭი - კუჭის ლორწოვანი გარსი 3-4 დღეში ერთხელ იცვლება, რადგან კუჭის წვენი, რომელიც საჭიროა საკვების მოსანელებლად, ინელებს კუჭის ლორწოვან გარსსაც.

გრძელი ნაწლავი - ადამიანის წვრილი ნაწლავის სიგრძე 4-ჯერ აღემატება სხეულის სიმაღლეს.

ბაქტერიები - კანის ყოველ 2,5 კვადრატულ სმ-ზე 32 მილიონამდე ბაქტერია სახლობს. საბედნიეროდ, მათი უმრავლესობა უვნებელია.

დაცემინების სიჩქარე - ადამიანის მიერ დაცემინებისას ამოსული ჰაერის სიჩქარე 160 კმ-სთ-ია, ზოგჯერ კი მეტიც.

სისხლის მიერ გადალახული გზა - საკმაოდ გრძელია. ყველა სისხლძარღვი რომ გავაერთიანოთ, მათი საერთო სიგრძე 96560 კმ-ს მიაღწევს. გული ამ სისხლძარღვებში ყოველდღიურად 7 570 ლიტრ სისხლს გადაისვრის.

ხვრინვის ხმაურის სიმაღლე - საშუალოდ 60 დეციბელია, თუმცა ზოგიერთი ხვრინავს 80 დეციბელი სიმაღლის ბგერით, ეს მაჩვენებელი კი ადამიანის სმენისთვის უკვე სახიფათოდ მიიჩნევა.

თმის ფერი და რაოდენობა - თავზე საშუალოდ 100 ათასი ფოლიკულია, რომლებსაც სიცოცხლის განმავლობაში 20 თმის ღერის გამოზრდა შეუძლიათ. ქერათმიანებს 146 ათასი ფოლიკული აქვთ, მუქთმიანებს - 110 ათასი. წითურებს კი ყველაზე მეჩხერი თმა ჰქონიათ - მათ თავზე ფოლიკულების რაოდენობა 90 ათასს არ აღემატება.

ფრჩხილების ზრდა - ხელებზე ფრჩხილები უფრო სწრაფად იზრდება, ვიდრე ფეხებზე.

თავის წონა - გასაკვირი არ არის, რომ ახალშობილს თავის დაჭერა უჭირს - მისი თავის ზომა ხომ სხეულის მეოთხედის ტოლია, მაშინ როცა მოზრდილი ადამიანისთვის ეს მაჩვენებელი სხეულის 1/8-ს შეადგენს.

ძილის მოთხოვნილება - უძილობისგან მართლაც შეიძლება მოკვდე. საკვების გარეშე ადამიანი 7 დღეს ძლებს, უძილოდ კი 11-ს.

ორგანიზმის ყველაზე დიდი უჯრედი კვერცხუჯრედია, ყველაზე პატარა კი - სპერმატოზოიდი.

თვალის ხამხამი - კუნთი, რომლის დახმარებითაც თვალებს ვახამხამებთ, სხეულის ყველაზე სწრაფმოქმედი კუნთია. ადამიანი დღეში საშუალოდ 15 ათასჯერ ახამხამებს თვალს. ქალები - მამაკაცებზე ორჯერ მეტად.

ცაციები მოსახლეობის 13 პროცენტს შეადგენენ.

იცოდით?

• ადამიანის სხეულზე იმდენი ქლორის აღმოჩენა შეიძლება, 5 საშუალო ზომის აუზს ეყოფოდა.

  ერთი ადამიანის ორგანიზმში მოძიებული ფოსფორისგან 20 ათასი ასანთის ღერის თავის დამზადებაა შესაძლებელი.

• გოგირდი და გლიცერინი კი იმდენი გვაქვს, თავისუფლად შეძლებთ საარტილერიო ნაღმის აფეთქებას.
• სიცოცხლე შესაძლებელია მაშინ, თუ სხეული იმყოფება 32-43 ცელსიუსის პირობებში, თუმცა ყურებში არსებული ტემპერატურა სხეულისას 2 გრადუსით ჩამოუვარდება.
• დღე-ღამის განმავლობაში ორგანიზმში გამომუშავდება 1 ლ ნერწყვი, 3 ლ კუჭის წვენი, 2 ლ კუჭქვეშა ჯირკვლის წვენი, 3,5 ლ ნაწლავის წვენი და 1 ლ ნაღველი.
• ადამიანი მარტოობას ყველაზე მტკივნეულად 20.00-დან 22.00 საათამდე აღიქვამს.
• ფრჩხილებისა და თმის ზრდა ყველაზე ინტენსიურად 16.00-დან 18.00-მდე მიმდინარეობს.
• გემოვნება, სმენა და ყნოსვა ყველაზე ძლიერია 17.00-დან 19.00-მდე.
• ყველაზე მკვეთრად ადამიანი იმ საკვების გემოს შეიგრძნობს, რომლის ტემპერატურაც 24 გრადუსია.
• ღვიძლი ალკოჰოლს ყველაზე უკეთ შლის 18.00 და 20.00 საათზე.
• ორგანიზმის მიერ სითხის 6-8%-ის დაკარგვა იწვევს გონების დაბინდვას, 10%-ისა - ჰალუცინაციებსა და საყლაპავი რეფლექსის მოშლას, სითხის 12%-ის დაკარგვისას კი გული ჩერდება.
• ფრანგ ნევროლოგთა გამოკვლევის თანახმად, ტირილში სახის 4 კუნთი მონაწილეობს, სიცილში კი 17, ასე რომ, ენერგეტიკული თვალსაზრისით სიცილი ტირილზე გაცილებით მომგებიანია.