ოთახიდან გაუსვლელად
ინტელექტუალური დამალობანა
ამ თამაშის დროს შეგვიძლია, პატარა ზომის ცნებას ვაზიაროთ. მაგალითად, შევთავაზოთ, ოთახში რაიმე საგნის უკან დაიმალოს, ჩვენ კი თვალები დავხუჭოთ. რამდენიმე წუთში თვალს გავახელთ და პატარას ვეტყვით: ”ყოჩაღ! შენ უკვე დიდი ხარ, მაგრამ სავარძელიც დიდია და მის უკან კარგად დიამალე!” თუ ბავშვი პატარა საგნის უკან დაიმალება, ვეტყვით, რომ ის უკვე დიდია, სკამი კი პატარა, ამიტომ მისი თავი ძალიან კარგად ჩანს. ახლა შეიძლება სათამაშოს დამალვა ვცადოთ. დიდ ჩანთაში ის გაუჩინარდება, პატარაში კი ვერ ჩაეტევა.
ბლითები
თამაშის წინ ბავშვს აუცილებლად დააბანინეთ ხელები საპნით!
ბლითები ჯამში ჩაყარეთ, შემდეგ სათითაოდ ამოიღეთ, თითებზე წამოიცვით და პატარას უჩვენეთ, როგორ შეიძლება დავმალოთ თითი. შემდეგ ბავშვს სთხოვეთ, მან დამალოს თქვენი თითები. თუ პატარამ ”სათამაშო” პირისკენ წაიღო, ნუ შეშფოთდებით.
ჭკვიანი შპალერი
ამ თამაშისთვის ფერადი შპალერის ნებისმიერი ნარჩენი გამოგვადგება. შეგვიძლია, მისგან ფიგურები გამოვჭრათ და ბავშვთან ერთად ვეძებოთ სხვადასხვა ფერი ამ ფიგურებზე, თან მათი სახელწოდება წარმოვთქვათ. თუ ამ თამაშს კვირაში 2-3-ჯერ გაიმეორებთ, პატარა ძალიან ადვილად დაიმახსოვრებს ფერთა სახელწოდებებს.
სუფთა ქვიშა
უნდა ავიღოთ ცელოფანის ან ლინოლეუმის მოზრდილი ნაჭერი, რომელზეც დავყრით 2-3 კილოგრამ მანანის ბურღულს. მართალია, ოთახი შეიძლება დაისვაროს, მაგრამ სპეციალისტებს მიაჩნიათ, რომ მიზანი - ბავშვის განვითარება - ამართლებს ასეთ მსხვერპლს.
მანანის ”მთაში” უნდა დავმალოთ სხვადასხვა საგანი, რომლებსაც პატარა თითებით მოძებნის. საგნები ზომითა და ფორმით ერთმანეთისგან უნდა განსხვავდებოდეს. ზოგიერთის აღება ბავშვს ორი თითითაც უნდა შეეძლოს, ზოგს კი ორივე ხელი უნდა სჭირდებოდეს. მაგალითად, ლობიოს მარცვალი მან შეიძლება ქვიშიდან ორი თითით ამოიღოს, პრიზმას სამი თითის მოკიდება დასჭირდება, ბურთისა და კუბის ამოსაღებად კი მთელი მტევანია საჭირო. როცა ბავშვი ერთ საგანს იპოვის, უთხარით: ”იქ კიდევ არის რაღაცა, მიდი, მოძებნე!” სპეციალისტები აღნიშნავენ, რომ ასეთი თამაში ძალიან სასარგებლოა თითებისა და ხელის მოძრაობის განსავითარებლად.
ორი ქვაბი
ბავშვის თანდასწრებით ერთ ქვაბში მანქანა ჩადეთ, მეორეში - თოჯინა და ორივეს დაახურეთ თავსახური. რამდენიმე წამით ბავშვის ყურადღება სხვა საგანზე გადაიტანეთ, მერე კი ჰკითხეთ: ”სად არის მანქანა? სად არის თოჯინა?” თუ პატარამ ამოცანა უცებ შეასრულა, აიღეთ უფრო მეტი სათამაშო ან გაახანგრძლივეთ პერიოდი ამოცნობამდე.
აურზაური
ბავშვის ყურადღების შესამოწმებლად მისგან ფარულად საგნებს (ყვავილის ქოთანს, ლარნაკს, სურათს) ადგილი შეუნაცვლეთ. ეცადეთ, ოთახში შემოსვლისას ეს ყველაფერი პატარამ თვითონვე შეამჩნიოს. ”სად წავიდა ყვავილი?” - ჰკითხეთ მას და დაიცადეთ, ვიდრე ”დაკარგულ” საგანს იპოვიდეს. თუ ბავშვმა ეს ვერ მოახერხა, თქვენ თვითონ უჩვენეთ მისი ადგილსამყოფელი.
ჭკვიანი კომოდი
ალბათ შეამჩნევდით, რომ ბავშვებს ძალიან უყვართ კარადების, კომოდების და სხვა ავეჯის კარებისა და უჯრების გამოღება. ბავშვის ბუნებრივი სწრაფვა მისი განვითარებისთვის უნდა გამოვიყენოთ. კარგი იქნება, თუ ბავშვის ოთახში ხის კომოდს დავდგამთ. გამოაღეთ კომოდის პატარა უჯრები, მიეცით ბავშვს სხვადასხვა ნივთი და დაავალეთ, სათითაოდ ჩაალაგოს უჯრებში. შემდეგ სთხოვეთ, შენახული საგანი მოგიტანოთ. რაც უფრო პატარაა ბავშვი, მით უფრო ნაკლები უნდა იყოს საგნებისა და უჯრების რაოდენობა. ეს თამაში ძალიან კარგად ავითარებს მხედველობით მეხსიერებას.
ასე შეგიძლიათ ითამაშოთ ყოველდღიურად, თუ ფანტაზიასა და მოთმინებას მოიშველიებთ. ბავშვის შემეცნების უნარის განვითარებით მყარ საფუძველს ჩაუყრით მის შემდგომ განათლებას.