ნანა ხუცაიძე

'

• ქოლერის გამომწვევი ანტიბიოტიკებზე ძლიერი აღმოჩნდა

ქოლერის გამომწვევი გავრცელებული ანტიბიოტიკების მიმართ მდგრადობას იძენს- ასეთი დასკვნა გამოიტანეს ინდოელმა მეცნიერებმა, რომლებმაც დასავლეთ ბენგალიაში ქოლერის აფეთქება შეისწავლეს. ცნობილია, რომ ქოლერას ახასიათებს ინტენსიური ფაღარათი, რომელიც ორგანიზმის ძლიერ გაუწყლოებას იწვევს და განსაკუთრებით ბავშვებისთვის არის საშიში. ქოლერის ყველა ვიბრიონი, რომელიც კი დაავადებულთა ორგანიზმიდან გამოყვეს, რეზისტენტული აღმოჩნდა იმ ხუთი ძირითადი ანტიბიოტიკის მიმართ, რომლებსაც დღესდღეობით იყენებენ ქოლერის მკურნალობისთვის, ხოლო 7 დაავადებულის ორგანიზმში აღმოჩენილმა ვიბრიონებმა გამძლეობა სხვა ანტიბიოტიკების მიმართაც გამოავლინა.

ექიმთა განსაკუთრებულ შეშფოთებას იწვევს მიკრობის შეუვალობა ფურაზოლიდონის მიმართ. საქმე ის არის, რომ მცირეწლოვან ბავშვებში ქოლერის მკურნალობისას უპირატესობას სწორედ ამ პრეპარატს ანიჭებდნენ, ვინაიდან ძლიერი ანტიბიოტიკები ბავშვებს ვნებს.

გამოკვლევის ავტორების თქმით, განსაკუთრებით საშიში მიკრობების სელექცია ხელს უწყობს ანტიბიოტიკების დაუსაბუთებელ დანიშვნას და უეფექტობის გამო მკურნალობის კურსის ნაადრევ შეწყვეტას, რაც შესაძლოა მძიმე გართულებების მიზეზად იქცეს, თუმცა იქვე დასძენენ, რომ არსებობს მრავალი ანტიბიოტიკი, რომლებიც ამ ინფექციას გაუმკლავდება.

• ნაწლავურ ინფექციას ფსიქიატრებისა არ ეშინია

მოსკოვის მახლობლად მდებარე ფსიქონევროლოგიურ ინტერნატში პაციენტები მასობრივად დაავადდნენ. ავადმყოფების უმრავლესობას გამოაჩნდა მწვავე ნაწლავური ინფექციის ნიშნები: სხეულის ტემპერატურის მატება 38-39 გრადუსამდე და ძლიერი ფაღარათი, რომელიც 5 დღეზე მეტხანს გაგრძელდა. ფაღარათის გამო დაკარგული სითხისა და ელექტროლიტების აღსადგენად რამდენიმე პაციენტს გადასხმითი მკურნალობა დასჭირდა. ამჟამად პაციენტებს ექიმ-ინფექციონისტების ბრიგადა აკვირდება, სამედიცინო დაწესებულების წყლის სისტემებზე დაკვირვება ტარდება, ხოლო მოსკოვის შემოგარენში ეპიდემიოლოგიური კვლევები მიმდინარეობს.

• ოლიმპიადა, ფაღარათი თუ ძაღლის ნაკბენი?

ოლიმპიადის ორგანიზატორების აზრით, პეკინს აგვისტოში 600 ათასამდე უცხოელი და 2 მლნ-ზე მეტი ჩინელი ესტუმრება. უცხოელებს, რომლებიც პეკინის ოლიმპიადაზე დასწრებას აპირებენ, არა ეგზოტიკური ინფექციების, არამედ, უწინარეს ყოვლისა, ფაღარათის, მაწანწალა ძაღლებისა და რესპირაციული დაავადებებისა უნდა ეშინოდეთ - ასეთია აშშ-ის დაავადებათა კონტროლისა და პროფილაქტიკის და მოგზაურთა მედიცინის საერთაშორისო საზოგადოების ექსპერტთა დასკვნა. მათი მონაცემებით, ჩინეთში განსაკუ-თრებულ საფრთხეს წარმოადგენს ნაწლავური ინფექციები, რომლებსაც თან სდევს პირღებინება, ფაღარათი და ორგანიზმის ძლიერი გაუწყლოება. არანაკლებ საშიშია მაწანწალა ძაღლების თავდასხმა. ცნობილია, რომ ცოფით ავადობის მხრივ ჩინეთს მსოფლიოში მეორე ადგილი უკავია. ჩინეთიდან დაბრუნებული ტურისტები ექიმს ყველაზე ხშირად სწორედ ძაღლის ნაკბენის, ნაწლავური და რესპირატორული ინფექციების, ამოვარდნილობისა და ნაღრძობის გამო მიმართავენ. ბოლო რამდენიმე წლის განმავლობაში აღრიცხული 2500 პაციენტიდან ერთსაც არ ჰქონია ისეთი ეგზოტიკური ინფექცია, როგორიც არის მალარია და დენგეს ცხელება. და მაინც, რეკომენდებულია, ამ რეგიონისთვის აუცილებელი აცრები ჩინეთში მიმავალმა ყველა ადამიანმა ჩაიტაროს.

• ტრანსატლანტიკური ლაინერის საფაღარათო თავგადასავალი

ტრანსატლანტიკური საკრუიზო ლაინერის ეკიპაჟს და ცხრაას მგზავრს შუაგულ ოკეანეში ზედიზედ დაეწყო პირღებინება და ფაღარათი, რაც თითქმის ორი დღე-ღამე გაგრძელდა. დიარეამ მძიმე გაუწყლოება, გამოფიტვა და სისუსტე გამოიწვია. ბორტზე მყოფ ექიმთა აზრით, აფეთქება ნაწლავურმა ინფექციამ, სავარაუდოდ, ნორფოლკის მსგავსმა ვირუსმა გამოიწვია.

ამერიკის დაავადებათა კონტროლისა და პროფილაქტიკის ცენტრმა ლაინერზე მიავლინა სპეციალისტების ჯგუფი, რომლებმაც გემზე არსებული სანიტარიული პირობები შეაფასეს.

წელს აშშ-ში ათზე მეტი ანალოგიური შემთხვევა აღირიცხა.

• პომიდვრის დაბრუნება

ცოტა ხნის წინ კანადისა და აშშ-ის სწრაფი კვების ობიექტების მენიუდან დროებით ამოიღეს პომიდორი. ეს რადიკალური ღონისძიება აშშ-ში სალმონელოზის აფეთქებამ გამოიწვია.

ამჟამად სწრაფი კვების ობიექტები კლიენტებს სთავაზობენ ახალდაჭრილ პომიდვრებს, რაც დაავადების თავიდან აცილების საშუალებას იძლევა.

• პოლიციელები და მეხანძრეები დათვებთან ურთიერთობას სწავლობენ

ჩრდილოეთ მექსიკის ქალაქ მონტერეიში პოლიციელები და მეხანძრეები დაჩქარებული ტემპებით სწავლობენ... დათვებთან ურთიერთობას. ამ `საგნის~ მცოდნე ბიოლოგები საგანგებო კურსის ჩასატარებლად ასე სასწრაფოდ იმიტომ მოიწვიეს, რომ ბოლო ხანებში მხეცები მრავალმილიონიანი მეგაპოლისის ხშირი სტუმრები გახდნენ. კვირა არ გავა, რომ ადგილობრივმა საინფორმაციო საშუალებებმა არ გადმოსცენ იმ ტერიტორიაზე დათვის შეჭრის ამბავი, რომელსაც ქალაქის მოსახლეობა თავისად მიიჩნევს და სადაც გარეულ ცხოველებთან შეხვედრას არავინ ელის. ეს თავისთავად ცხადია - ჩრდილოეთ მექსიკა ალასკა ხომ არ არის, სადაც ტურისტები საგანგებოდ მიემგზავრებიან, რათა დათვების ყურებით დატკბნენ.

მეცნიერები ვარაუდობენ, რომ მექსიკელ დათუნიებს უკაცრიელი მთების დატოვება პაპანაქება სიცხემ და უწყლობამ აიძულა. წელს მექსიკაში, აშშ-ის მოსაზღვრე ტერიტორიებზე, საშინელი გვალვა მძვინვარებს. დათვები ქალაქების შემოგარენში უმთავრესად წყალს ეძებენ, მაგრამ საკმაოდ საზრიანი ცხოველები არიან და იმასაც ხვდებიან, რომ ადამიანის საცხოვრისთან საკვების პოვნაც შეიძლება.

საბედნიეროდ, ახალ მეზობლებს ზიანი ჯერ არავისთვის მიუყენებიათ, აი, ადამიანების მეზობლობას კი ერთი დათუნია ემსხვერპლა - ადგილობრივმა მცხოვრებლებმა მისი დაჭერა სცადეს. მექსიკის ხელისუფლებამ გადაწყვიტა, ასეთი ინციდენტების თავიდან ასაცილებლად სასწრაფოდ მოამზადოს ექსტრემალური სამსახურის მუშაკები დათვებთან შესახვედრად.

მექსიკის ჩრდილოეთი დათვის ნამდვილმა ბუმმა მოიცვა. სად არ ნახავთ დათვის გამოსახულებებს ბოთლით ხელში - მაისურებზე, აბრებზე და, თქვენ წარმოიდგინეთ, ავტობუსის მინებზეც კი. მექსიკელი ბიოლოგები ასეთ ინტერესს მიესალმებიან, მაგრამ მოითხოვენ, მოსახლეობას განემარტოს ახალ მეზობლებთან ურთიერთობის წესები, რათა დათვებთან შეხვედრისას პირადი კონტაქტების დამყარება არ მოისურვონ.

• ნარკოტიკებიდან ხველების საწინააღმდეგო საშუალებებამდე

12-დან 25 წლამდე ასაკის 3 მილიონზე მეტი ამერიკელი ნარკოტიკული თრობის მისაღწევად ხველებისა და გაციების საწინააღმდეგო საშუალებებს იყენებს. ასეთ დასკვნამდე მივიდნენ ამერიკის ნარკოლოგიური და ფსიქიატრიული სამსახურების თანამშრომლები 2006 წელს ჩატარებული გამოკითხვის შედეგად.

ხველებისა და გაციების საწინააღმდეგო ურეცეპტოდ გასაცემ პრეპარატებს ნარკოტიკების ნაცვლად იყენებს მოზარდთა და ზრდასრულ ადამიანთა დაახლოებითY5%, რომელთა შორისაც თეთრკანიანები ჭარბობენ. ამ მედიკამენტების ნარკოტიკული ეფექტი ერთ-ერთი კომპონენტით - დექსტრომეტორფანით არის გამოწვეული. ეს ნივთიერება ხველებისა და გაციების საწინააღმდეგო 140-ზე მეტი პრეპარატის შემადგენლობაში შედის. მისი დიდი დოზით გამოყენებისას შესაძლოა განვითარდეს ჰალუცინაცია, სივრცესა და დროში ორიენტაციის დარღვევა, მხედველობის დაქვეითება და მეტყველების მოშლა. გარდა ამისა, დექსტრომეტორფანის ზედოზირებამ შეიძლება გამოიწვიოს ძლიერი პირღებინება გაუწყლოებით, კუნთოვანი სპაზმი, გულის რითმის დარღვევა და სიკვდილიც კი.

• მივირთვათ თუ არა ჰამბურგერი

პენსილვანიის შტატის ერთ-ერთი უდიდესი კომპანია აპირებს, გაყიდვიდან ამოიღოს ჰამბურგერებისთვის განკუთვნილი ორმოცი ტონა კატლეტი. საინფორმაციო სააგენტოს მიერ მოძიებული მასალებით, პროდუქცია ნაწლავის ჩხირით არის ინფიცირებული. ნიუ იორკის სამ მკვიდრს, რომლებმაც ამ კატლეტით მომზადებული ჰამბურგერი მიირთვეს, E. ცოლი აღმოაჩნდა. ჯანდაცვის ადგილობრივი დეპარტამენტი ვარაუდობს, რომ დაავადება სწორედ ამ საკვებით არის გამოწვეული. ატლეტი ამერიკის 12 შტატის მაღაზიებს მიეწოდება. მათ, ვინც მოასწრო ამ კომპანიის ნაწარმის ყიდვა, ამერიკელი მედიკოსები ურჩევენ, ისინი არავითარ შემთხვევაში არ მიირთვან, დაავადების სიმპტომების შემჩნევისას კი დაუყოვნებლივ მიმართონ ექიმს.