როგორ მოვუაროთ ბავშვის ფრჩხილებს
.
გვესაუბრება 23-ე პოლიკლინიკის პედიატრი ლოლა ზვიადაძე.
- რა უსიამოვნებას უქადის პატარას მოუვლელი ფრჩხილები?
- ბავშვებს ფრჩხილები ძალიან სწრაფად ეზრდებათ და თუ დროზე არ დავაჭერით, მათ ქვეშ ჭუჭყი დაგროვდება, ეს უკანასკნელი კი ინფექციისა და ჭიებით ინვაზიის წყაროა - პატარებს ხომ ძალიან უყვართ თითების პირში ჩადება. 2-3 წლის ასაკიდან კი, როცა პატარები ქვიშაში თამაშს იწყებენ, ჭუჭყი მოჭრილი ფრჩხილების ქვეშაც გროვდება, ამიტომ ხელების დაბანის შემდეგ საჭიროა ფრჩხილების გასუფთავება ჩხირზე წამოცმული ბამბით ან ნესესერის ქლიბის წვერით. ბავშვი თანდათან მიეჩვევა ჰიგიენას და თვითონვე ჩაიტარებს ამ პროცედურებს.
- რამდენ ხანში ერთხელ უნდა დავაჭრათ პატარას ფრჩხილები და როგორ?
- ჩვილ ბავშვებს ხელის თითებზე ფრჩხილები კვირაში 1-2-ჯერ უნდა დავაჭრათ, ხოლო ფეხებზე - კვირაში ერთხელ, რადგან ფეხის ფრჩხილები უფრო ნელა იზრდება, ვიდრე ხელის. ზოგიერთი ახალშობილი ძალიან გრძელი ფრჩხილებით იბადება. ისინი მაშინვე უნდა დავაჭრათ, რათა პატარამ სხეული არ დაიკაწროს. არსებობს გარკვეული წესები, რომლებიც ფრჩხილების მოჭრისას უნდა დავიცვათ.
- ჩვილს ფრჩხილები უნდა დავაჭრათ ღრმა ძილის დროს. ასეთ დროს ბავშვს ხელები მოდუნებული აქვს, თითები - გაშლილი.
- ფრჩხილების დაჭრა ადვილია ბანაობის შემდეგ - ცხელი წყალი მათ არბილებს.
- პროცედურისთვის უნდა გამოვიყენეთ მომრგვალებული, გლუვპირიანი პატარა მაკრატელი, რომელიც მხოლოდ ბავშვისთვის იქნება განკუთვნილი და სხვა არავინ გამოიყენებს.
- კანი რომ არ დაზიანდეს, პატარას თითის ბალიშებს ქვემოდან თითი მივაჭიროთ - ასე ფრჩხილი უკეთ გამოჩნდება.
თუ ამ პროცედურის დამოუკიდებლად ჩატარება გიჭირთ, დაიხმარეთ ოჯახის წევრები - სთხოვეთ, ბავშვის ხელი დაგიჭიროთ. თუ გეშინიათ ან რაიმე სხვა მიზეზით ვერ აჭრით ჩვილს ფრჩხილებს, ჩააცვით ზედატანი ბოლოებამოკერილი სახელოებით, რათა ტანი და სახე არ დაიკაწროს.
ფეხის ფრჩხილების მოვლა უფრო რთულია, მაგრამ ნუ აღელდებით - ჩვილებს ფრჩხილები კანში არ ჩაეზრდებათ. თუ პატარას წვეთი სისხლი მაინც გამოუვიდა, ეს იმას ნიშნავს, რომ პროცედურა არასწორად ჩაატარეთ. არ დაიბნეთ, სუფთა სტერილური ბამბა მაგრად მიაჭირეთ სისხლიან ადგილზე, შემდეგ კი იოდი დააწვეთეთ. რამდენიმე დღის განმავლობაში დააკვირდით, რომ ანთება არ განვითარდეს.
- როგორ მოვიქცეთ, რომ ანთება არ გამოგვეპაროს?
- ანთების ადგილას კანი თავდაპირველად შეშუპებული, გაწითლებული და მტკივნეულია, შემდეგ კი იწყება ჩირქოვანი პროცესი - პანარიციუმი. თუ მას არ ვუმკურნალეთ, შეშუპება თითის ფალანგზე მთელი ფრჩხილის გასწვრივ გავრცელდება. ასეთ დროს თითი შესიებულია, გახურებული, კანი მუქი წითელია. ჩვილი წუხს, ჭირვეულობს. უმჯობესია, საქმე აქამდე არ მივიყვანოთ.
- როგორ მოვიქცეთ, თუ მიკროტრავმის ადგილას თითის გაწითლება და შეშუპება შევამჩნიეთ?
- ასეთ დროს უნდა მოვამზადოთ ცხელი მარილიანი აბაზანა თითისთვის: 1 ლიტრ თბილ წყალში გავხსნათ 5-7 სადილის კოვზი ზღვის ან მსხვილად დაფქული მარილი, მივიყვანოთ ადუღებამდე და შემდეგ გავაგრილოთ, რომ კანი არ დაწვას. ჯერ თვითონ შევამოწმოთ და მხოლოდ ამის შემდეგ ჩავაყოფინოთ პატარას თითი. დაახლოებით 15 წუთის შემდეგ, როცა წყალი ოთახის ტემპერატურამდე გაგრილდება, პროცედურა შეგვიძლია გავიმეოროთ.
მარილის აბაზანის შემდეგ თითი გავამშრალოთ და დავადოთ ნახვევი დიმექსიდის 10%-იანი ხსნარით: 1 ჩაის კოვზ დიმექსიდის ხსნარს დავუმატოთ 2-4 ჩაის კოვზი თბილი ანადუღარი წყალი და ბავშვს თითი ამ ხსნარში დასველებული მარლის ტამპონით გადავუხვიოთ. 3-4 საათში სახვევი უნდა გამოვუცვალოთ. შეხვევა ვიშნევსკის მალამოთიც შეიძლება.
მარილიანი აბაზანებისა და ნახვევის მონაცვლეობით 5-7 დღეში ანთებითი პროცესი ჩაქრება და შეშუპება ჩაცხრება.