რა საჭიროა საუზმე
ბავშვი სკოლაში ყოველთვის კარგად ნასაუზმევი გაუშვით. საუზმე, უმჯობესია, თბილი იყოს, მაგალითად, ფაფა, ტაფამწვარი ან კატლეტი. გადამუშავებული საკვები ნივთიერებები კუჭ-ნაწლავიდან სისხლში გადადის, იქიდან კი ტვინში აღწევს, რომელიც ამ საწვავის წყალობით უფრო აქტიურად მუშაობს. შესაბამისად, ბავშვიც უფრო სხარტად აზროვნებს. შუადღისას წახემსება ურიგო არ იქნება. მეორე საუზმე, სასურველია, მსუბუქი იყოს: ხილი, ბუტერბროდი, ჩაი... თუ ბავშვი სკოლის სასადილოში ჭამაზე კატეგორიულ უარს ამბობს, მსუბუქი საკვები გაუხვიეთ და თან გაატანეთ, მაგრამ აუკრძალეთ ჭამა დერეფანში, ფეხზე მდგომს. აუხსენით, რომ უკეთ შეერგება, თუ მაგიდას მიუჯდება და აუჩქარებლად შეჭამს. შოკოლადის მეშვეობით შიმშილთან ბრძოლა დაუშვებელია. ჯერ ერთი, სისხლში მოხვედრილი შოკოლადი ტვინს აწვდის ცრუ ინფორმაციას, თითქოს ბავშვმა ისადილა, რის საპასუხოდაც კუჭი წვენის აქტიურ გამოყოფას იწყებს და მეორეც, კანფეტი პირის ღრუში ქმნის ტკბილ გარემოს, რომელშიც იდეალურად გრძნობენ თავს მიკრობები. კუჭს გამანადგურებელ დარტყმას აყენებს McDonald's-ის ტიპის სასაუზმეები. სასურველია, ბავშვს შებოლილი და ცხარე საკვები 15-17 წლამდე არ მივცეთ. კეტჩუპითა და მაიონეზით შეზავებული ძეხვეული მეტისმეტად აღიზიანებს კუჭის ლორწოვანს.
კუჭ-ნაწლავის პრობლემები ყველაზე ხშირად დღესასწაულებზე მწვავდება, რადგან სადღესასწაულო სუფრას ყოველთვის ამშვენებს კრემიანი ტორტი და კოლა, ასეთ გასტრონომიულ შეტევას კი არამცთუ პატარების, მოზრდილი ადამიანის გამოწრთობილი კუჭ-ნაწლავიც კი ვერ უძლებს.
როდის მივმართოთ ექიმს
აი ის სიმპტომები, რომლებიც ყურადღებას მოითხოვს:
- ბოყინი ჭამის შემდეგ - შესაძლოა გასტრიტის პირველი ნიშანი იყოს;
- უსიამოვნო სუნი პირის ღრუში - ასევე კუჭ-ნაწლავის პრობლემებზე მეტყველებს, თუ, ცხადია, კბილების ან ღრძილების დაავადებით არ არის განპირობებული;
- ძლიერი ტკივილი გულის კოვზთან ან შიმშილის შეგრძნება ჭამის შემდეგაც - შესაძლოა გასტრიტის გამწვავებაზე მიუთითებდეს;
- მჭრელი ტკივილი ჭიპის მიდამოში - შესაძლოა ნაწლავთა დისკინეზიით იყოს განპირობებული;
- ხშირი ფაღარათი ან ყაბზობა - შესაძლოა, დისბაქტერიოზზე მიუთითებდეს;
- კბილების კრაჭუნი, რომელსაც ერთვის უმადობა და ძლიერი ნერწყვდენა - შესაძლოა ჭიების ბრალი იყოს.
ნუ დატოვებთ უყურადღებოდ ბავშვის ჩივილს. გახსოვდეთ: ნებაზე მიშვებული გასტრიტი შესაძლოა ქრონიკულ ფორმაში გადაიზარდოს.