ავადმყოფობის შიში
ავად გახდომისგან არც ერთი ბავშვი არ არის დაზღვეული. ავადმყოფობა ხანგრძლივიც შეიძლება იყოს და ხანმოკლეც. სხვადასხვა დაავადება სხვადასხვა რეჟიმის დაცვას მოითხოვს. უმეტესად ბავშვს წოლით რეჟიმს უნიშნავენ, რადგან ავადმყოფობა ასუსტებს, ენერგიასა და სასიცოცხლო ძალებს კი აღდგენა სჭირდება. ბავშვს უჭირს ამ რეჟიმის დაცვა, საწოლში უმოძრაოდ წოლა. ასე რომ, თქვენი შვილის თავს უჩვეულო არაფერი ხდება - ბავშვს, უბრალოდ, აქვს მოთხოვნილება, რამე აკეთოს, რამით გაერთოს. ასეთ დროს შეიძლება პატარ-პატარა ხრიკებს მივმართოთ, მოვიფიქროთ რამე ისეთი, რომ წოლითი რეჟიმი ადვილად ასატანი გახდეს.
თუ ბავშვის მდგომარეობა საშუალებას იძლევა, მიეცით უფლება, ხატოს. საწოლში საამისო პირობების შექმნა არ არის ძნელი: საკმარისია, მისცეთ ბრტყელზედაპირიანი მაგარი ნივთი, რომელზეც დადებს სახატავ რვეულს ან ფურცლებს. შესთავაზეთ დახატოს რამე ისეთი, რაც სასიამოვნო ასოციაციებს აღუძრავს - ზაფხული, აგარაკი, ზღვა... ეს მას განწყობილებას აუმაღლებს და იმის გაცნობიერებაში დაეხმარება, რომ ავადმყოფობა ჩვეულებრივი მოვლენაა, როგორც მოვიდა, ისე წავა; კარგი განწყობა, დადებითი ემოციები ენერგიას შემატებს და ავადმყოფობის დაძლევაში დაეხმარება.
დააკვირდით ბავშვის ნახატს, მიაქციეთ ყურადღება ფერთა გამას: მუქი ან ბაცი ტონები იმაზე მეტყველებს, რომ ბავშვი სუსტადაა, ხოლო ნათელი, მკვეთრი და ხალისიანი ფერები მიგახვედრებენ, რომ საქმე უკეთესობისკენ მიდის. გაითვალისწინეთ: ავადმყოფი ბავშვი ირჩევს იმ ფერს, რომელიც მისთვის ჯანმრთელობასთან ასოცირდება. ხალისიანი ნახატი შეიძლება საწოლის თავზე ჩამოკიდოთ.
თუ ბავშვს ხატვის სურვილი არ აქვს, ნუ დააძალებთ - ეს იმას ნიშნავს, რომ ის ჯერ კიდევ სუსტად გრძნობს თავს. ამ შემთხვევაში შეიძლება შევთავაზოთ ოჯახური ფოტოსურათების დათვალიერება. ყურადღება გაამახვილეთ იმ სურათებზე, სადაც პატარა კმაყოფილი, მხიარული და ბედნიერი ჩანს. ეს მას განწყობილებას აუმაღლებს.
თუ ბავშვი უკვე სავსებით აქტიურია, შესთავაზეთ თამაშები, რომლებშიც გამარჯვებისთვის ძალა ეყოფა - გამარჯვებით გამოწვეული სიხარული მას ენერგიას შემატებს. მაგალითად, თამაში "ცხელა-ცივა" (საწოლის ფარგლებში), "გამოიცანი, რა შეიცვალა?" (აჩვენეთ პატარას რამდენიმე სათამაშო, შემდეგ თვალები დაახუჭვინეთ და სათამაშოებს ერთი მოაკელით ან დაამატეთ), "რომელ ხელში მიჭირავს მონეტა?" და სხვა. შეგიძლიათ შესთავაზოთ ბავშვს მშვიდი გასართობი: მოზაიკა, პაზლი (ასაწყობი ნახატი), აპლიკაცია, კონსტრუქტორი... ასევე - საბავშვო ჟურნალები გამოცანებით, გასაფერადებლებით, სათამაშო დავალებებით ("მოძებნე განსხვავებები ნახატებს შორის", "დაეხმარე თაგუნას ლაბირინთის გავლაში").
თუ ბავშვს თავი ან თვალები არ სტკივა, კარგ სამსახურს გაგვიწევს კომპიუტერული თამაშები. შეიძლება წავუკითხოთ ბავშვს წიგნი, მოვუყვეთ ზღაპარს, ჩავურთოთ აუდიოწიგნი ან საყვარელი მუსიკა. გაითვალისწინეთ; ავადმყოფობის დროს ბავშვი უფრო ადვილად აღიქვამს რაიმე ნაცნობს, რადგან ახალი ინფორმაციის გააზრება ძალას, ენერგიას მოითხოვს. მეორე მხრივ, ზოგჯერ სწორედ ახალი წიგნი ან სათამაშო იქცევა იმ რესურსად, რომელიც გამოჯანმრთელებას აჩქარებს.
სასურველია, ავადმყოფობის დროს ბავშვს საკვები ლამაზი, მოხატული ჭურჭლით შევთავაზოთ. ეს მადას გაუღვიძებს და ძალ-ღონის აღდგენაში დაეხმარება.