ფეხების მოვლა ზაფხულში
ფეხების ჰიგიენური და კოსმეტიკური მოვლა
- ყოველდღიურად, ფეხების თბილი წყლით დაბანის შემდეგ, წვივებზე გადაივლეთ ცივი წყალი.
- დაბანის დროს ტერფები გაიხეხეთ მინქაფათი, განსაკუთრებით - ის უბნები, რომლებიც კოჟიჟებით არის დაზიანებული.
- დაბანის შემდეგ ფეხები შეიმშრალეთ ხაოიანი პირსახოცით და კანზე წრიული მოძრაობით წაისვით ცხიმიანი კრემი.
- თუ თქვენი საქმიანობა ფეხზე დიდხანს დგომას ან სიარულს მოითხოვს, გირჩევთ, სისხლისა და ლიმფის მოძრაობის გასაუმჯობესებლად ფეხები ძილის დროს ოდნავ შემაღლებულზე შემოაწყოთ (ფეხებქვეშ ამოიდოთ ბალიში ან მუთაქა).
- ძალიან სასარგებლოა ფეხებისთვის რეგულარული აბაზანა (კვირაში არანაკლებ 2-ჯერ).
- გვირილის ან ორკბილას თბილი აბაზანები ამშვიდებს ფეხებს და ამცირებს ანთებას. ანთების საწინააღმდეგო, დამამშვიდებელი და გამაჯანსაღებელი ეფექტი აქვთ ზღვის მარილის აბაზანებს.
- დაღლილობასა და დაძაბულობას მოგიხსნით პიტნის, ჭინჭრის, მრავალძარღვას, ვირისტერფას აბაზანები. შეგიძლიათ, დაამატოთ სოდა და აბაზანის არომატული ქაფიც. აბაზანის ხანგრძლივობა შეიძლება იყოს 15-20 წუთი, წყლის ტემპერატურა - 38°C-მდე.
- სისხლის მიმოქცევას აუმჯობესებს კონტრასტული ჰიდროაბაზანაც. თავდაპირველად ფეხები ჩაყავით ცხელ წყალში (ტემპერატურა - 40°C) და გააჩერეთ 3-5 წუთი, შემდეგ რამდენიმე წამით - ცივში ჭურჭელში (დაახლოებით 15°C). პროცედურის შემდეგ ფეხებზე გადაივლეთ თბილი წყალი და გაიმშრალეთ რბილი პირსახოცით. შეშუპების დროს მიიღეთ მენთოლიანი აბაზანა.
- აბაზანის შემდეგ, როდესაც კანი რბილია, შეიძლება შევუდგეთ მის მოწესრიგებას. მინქაფათი გაიხეხეთ გაუხეშებული ქუსლები. შეიძლება პილინგის ჩატარებაც სკრაბით. ბოლოს კი წაისვით სპეციალური კრემი ვიტამინებითა და ანტისეპტიკური დანამატებით.
საერთოდ, წყლის ნებისმიერი პროცედურის შემდეგ ფეხებზე უნდა წავისვათ დამატენიანებელი კრემი, კოსმეტიკური რძე ან ტანის ბალზამი, ამასთან, არა მარტო ტერფზე, არამედ მთელ სიგრძეზე. ფეხების მოვლის ბუნებრივი საშუალებები და შინაური რეცეპტები:
გამაჯანსაღებელი კუბიკები
- ღიღილოსა და გვირილის ყვავილების გაყინული ნაყენი შესანიშნავი საშუალებაა ვენების გაგანიერების პროფილაქტიკისთვის.
- ავიღოთ 3 სუფრის კოვზი ღიღილოს ან გვირილის ყვავილი, ჩავყაროთ მომინანქრებულ ჭურჭელში, დავასხათ 200 მლ გადადუღებული, ოთახის ტემპერატურის წყალი, დავახუროთ თავზე და გავაჩეროთ 10-15 წუთი ორთქლის აბაზანაზე. ჩავასხათ ნაყენი ყინულისთვის განკუთვნილ ფორმებში და შევდგათ საყინულეში. დავიზილოთ ფეხები ამ ყინულით.
მცენარეული აბაზანები
- აიღეთ 5 სუფრის კოვზი პიტნა, 5 სუფრის კოვზი მაიორანი, 3 სუფრის კოვზი როზმარინი, 3 სუფრის კოვზი კვლიავი და 1 პეშვი ზღვის მარილი. ჩაყარეთ ქვაბში, დაასხით მდუღარე წყალი, ადუღეთ 5 წუთი ნელ ცეცხლზე, გააჩერეთ კიდევ 20 წუთი, გადაწურეთ და ნარევი ჩაასხით თასში, დაამატეთ ზღვის მარილი. ჩაუშვით ფეხები 5-10 წუთით. ეს აბაზანა ხსნის დაღლილობას, არბილებს გაუხეშებულ კანს.
- აიღეთ 2-2 სუფრის კოვზი გვირილის გამხმარი ყვავილი, სელის თესლი და შვიტა. დაასხით 2 ლიტრი მდუღარე წყალი, გააჩერეთ 2 საათი. ხსნის დაღლილობას, ანთებას, არბილებს გაუხეშებულ კანს.
- 3 სუფრის კოვზ გულყვითელას ყვავილს დაასხით 1 ჩაის ჭიქა მდუღარე წყალი, გააჩერეთ 1 საათი და გადაწურეთ. უხდება ფეხის სოკოს. პროცედურის ხანგრძლივობა 7-10 წუთია.
- 50 გრამ ცაცხვის ყვავილს დაასხით მდუღარე წყალი, გააჩერეთ 20-30 წუთი. გახსენით 1 ლიტრ თბილ წყალში, დაუმატეთ 1 სუფრის კოვზი სუფრის მარილი. ხსნის შეშუპებას.
- ფეხებში სისხლის მიმოქცევას აუმჯობესებს ნაძვისა და ფიჭვის წიწვების აბაზანა. აბაზანას შეიძლება დავუმატოთ სუფრის ან ზღვის მარილი.
- კანის ანთებითი დაავადებების დროს რეკომენდებულია ჭინჭრის, ნაძვის წიწვებისა და გვირილის ნაყენი.
- ფეხების ოფლიანობის დროს ეფექტურია მუხის ქერქის ნაყენის აბაზანა.