როგორ შევარჩიოთ დეზოდორანტი - სპრეი თუ ბურთულიანი?
დეზოდორანტები და ანტიპერსპირანტები. დეზოდორანტები ანეიტრალებენ ოფლის სუნს და არ არეგულირებენ ოფლის გამოყოფას. მათი შემადგენელი ნივთიერებები ბაქტერიებს არ აძლევენ გამრავლების საშუალებას. ცნობილია, რომ სწორედ ეს ბაქტერიებია ოფლის სუნის გამომწვევი. ოფლი თითქმის უსუნოა. თუმცა კანზე მოხვედრისა და ბაქტერიებთან რეაქციაში შესვლისას, მისი სუნი ძლიერდება და უსიამოვნო ხდება.
ანტიპერსპირანტები ამცირებენ თავად ოფლის გამოყოფის პროცესს. ისინი შეიცავენ ალუმინის მარილებს, რომლებიც ავიწროვებენ საოფლე ჯირკვლებს.
მავნებელია თუ არა საოფლე ჯირკვლებისათვის ალუმინის მარილები?
მეცნიერული კვლევებით ეს არ დასტურდება. ცალკეულ შემთხვევებში პერსპირანტებმა შეიძლება გამოიწვიოს საოფლე ჯირკვლების ანთება და ეს ხდება ორი მიზეზით. პირველი, როდესაც ადამიანს აღენიშნება ალუმინის მარილებზე ალერგია და მეორე, როდესაც ადამიანი იყენებს ე.წ. "ხანგრძლივი გამოყენების" დეზოდორანტებს. ეს არის დეზოდორანტების ჯგუფი, რომელთა გამოყენებაც დასაშვებია კვირაში ერთხელ ან ორჯერ. ალუმინის მარილების მაღალი კონცენტრაციის ხარჯზე, ისინი ხანგრძლივად მოქმედებენ. ამ საშუალებების დასაშვებზე ხშირად გამოყენებისას, შესაძლებელია განვითარდეს ანთებითი რეაქცია.
სპრეი თუ ბურთულიანი დეზოდორანტი?
უსაფრთხოების თვალსაზრისით, განმასხვავებელი მათ შორის არაფერია. ბურთულის ფორმის გამო, არსებობს მოსაზრება, რომ ის ახშობს ფორებს, რაც არასწორია და ეს დაკავშირებულია ადამიანის ტაქტილურ შეგრძნებებთან. აქედან გმომდინარე, ბევრს ჰგონია, რომ სპრეი უფრო ჰაეროვანია და რბილად მოქმედებს კანზე. დეზოდორანტის შერჩევისას, მნიშვნლოვანია პირადი კომფორტი.
რაზე უნდა გავამახვილოთ ყურადღება?
დეზოდორანტი უნდა შეიცავდეს მინიმალური რაოდენობით კონსერვანტებს, არომატიზატორებს, სასურველია არ შეიცავდეს სპირტს. სპირტმა შეიძლება გამოაშროს კანი და მტკივნეული რეაქციების პროვოცირება: სიწითლე, გამონაყარი და ქავილი გამოიწვიოს.
მოზარდებსა და ხანდაზმული ასაკის ადამიანებში დეზოდორანტებზე რეაქცია ხშირად აღინიშნება. პირველ შემთხვევაში იმუნური სისტემა ახლადფორმირებულია, ხოლო ხანდაზმულ ასაკში ასაკოვანი ცვლილებების გამო, დასუსტებულია. ამ შემთხვევაში საჭიროა ნატურალური კრისტალების საფუძველზე დამზადებული ან ორგანული დეზოდორანტების გამოყენება. ეს საშუალებები მოქმედებენ როგორც ანტისეპტიკები, არ შეიცავენ დანამატებს და არ მოქმედებენ საოფლე ჯირკვლების ფუნქციონირებაზე.
