არდადეგები, არდადეგები!
1. მიეცით თქვენი შვილის ტვინს დასვენების საშუალება - შეწყვიტეთ მეცადინეობები, შეუცვალეთ ბავშვს გარემო. ეს კი სულაც არ ნიშნავს ფეშენებელურ კურორტზე გამგზავრებას, საკმარისია, ბავშვი წინაპრების სოფელს ეწვიოს. ფრაზა "მეცადინეობების შეწყვეტა" კი ბავშვის იძულებით სწავლებაზე უარის თქმას გულისხმობს, მიეცით მას საშუალება, თავისი ინტერესებისა და სურვილების შესაბამისად გაიმდიდროს ინტელექტი.
2. მაქსიმალური ფიზიკური აქტივობა - სეირნობა, სირბილი, ხტომა, ცურვა, ველოსიპედი, ნიჩბებიანი ნავი - ეს მხოლოდ არასრული ჩამონათვალია.
3. კვება მხოლოდ მადის მიხედვით და არა იძულებით - შეიძლება პარადოქსულად ჟღერდეს, მაგრამ ამ შემთხვევაში მადა უფრო მოიმატებს, ვიდრე ძალდატანებისას.
4. სუფთა ჰაერი - თუნდაც სრულიად უცნობი და შორეული სოფელი ამ მხრივ შესაფერისი ადგილია, რადგან თქვენი შვილი მანქანებისაგან, ქარხნებისა და ზოგადად დაბინძურებული ჰაერისგან შორს იქნება.
როგორც ხედავთ, ამ პრინციპების დაცვა სულაც არ არის დაკავშირებული ძალიან დიდ სირთულეებთან. ნებისმიერმა ოჯახმა უნდა მოახერხოს, რომ საზაფხულო არდადეგები ოჯახს მძიმე მატერიალურ დარტყმად არ დაუჯდეს. წინააღმდეგ შემთხვევაში, ფინანსური პრობლემები შეიძლება მშობელთა შორის უთანხმოების მიზეზიც კი გახდეს, რაც ბავშვს იმდენად დიდ დისკომფორტს შეუქმნის, რომ ზაფხულში მიღებული სიამოვნება მალევე გაუფერულდება... რა თქმა უნდა, სოფელში, ბებიასთან დასვენება გაცილებით იაფია, ვიდრე ზღვისპირა კურორტზე გართობა. თუ თქვენი ფინანსები საზღვაო კურორტებს სწვდება, ამ შემთხვევაშიც აუცილებლად უნდა დაიცვათ გარკვეული პრინციპები:
- 3 წლის ბავშვი შეიძლება ზღვაში აბანაოთ, როცა ღელვა ძალიან სუსტია - ერთ ბალს არ აღემატება. წყლის ტემპერატურა 24-25 C უნდა იყოს, პირველი ბანაობის ხანგრძლივობა კი 1,5-2 წუთს არ აღემატებოდეს. ყოველდღიურად ეს დრო შეიძლება თანდათან გაზარდოთ 5-6 წუთამდე.
- 3 წლამდე ბავშვებს ზღვაში ბანაობისთვის სპეციალური მომზადება სჭირდებათ. 3-5 დღის განმავლობაში, დილა-საღამოს 1-2-ჯერ, მხოლოდ რამდენიმე წამით უნდა შეუშვათ წყალში, რომლის ტემპერატურაც 30-32 C-ზე მაღალი უნდა იყოს.
- ბანაობის შემდეგ ბავშვს პირსახოცი უნდა შემოახვიოთ, ტანი და თმა კარგად შეუმშრალოთ და სველი საცურაო კოსტიუმი მაშინვე გამოუცვალოთ.