როგორ გავრეცხოთ რბილი სათამაშო
გარდა ამისა, როგორ მოვიქცეთ, რომ ბავშვმა დათუნიას გარეშე არ მოიწყინოს? ყველაზე ოპტიმალური გზაა, პატარასაც მივაღებინოთ მონაწილეობა სათამაშოს გასუფთავებაში, მაგალითად, დათუნიას დავარცხნა დავავალოთ.
რბილი სათამაშო კვირაში ერთხელ მაინც უნდა გაიწმინდოს მტვერსასრუტით. ხელით რეცხვისთვის უნდა გამოვიყენოთ რბილი ღრუბელი ან რბილი ქსოვილის, მაგალითად, ფლანელის, ნაჭერი, ნაზი ქსოვილებისათვის განკუთვნილი სარეცხი საშუალება ან შამპუნი.
სარეცხი საშუალება გახსენით წყალში და ააქაფეთ. ქაფში დაასველეთ ღრუბელი და რბილი სათამაშო ფრთხილად გაწმინდეთ. ეცადეთ, სათამაშომ ბევრი სითხე არ შეიწოვოს. ზედაპირზე დაგროვილი ჭუჭყის მოსაცილებლად ღრუბელი რაც შეიძლება ხშირად ამოაწეთ ქაფში. როცა რეცხვას დაამთავრებთ, სათამაშო გააშრეთ.
რეცხვის ეს მეთოდი შესაფერისია, როცა სათამაშო ძალიან დიდია, მრავალი დეტალი აქვს, მუქი ფერისაა ან ნახერხითაა სავსე. თუ სათამაშოზე მითითებულია, რომ შეიძლება მისი სარეცხ მანქანაში გარეცხვა, უნდა გამოიყენოთ ნაზი რეცხვის რეჟიმი და საბავშვო სარეცხი საშუალება. წყლის ტემპერატურა 30 გრადუსი უნდა იყოს.
მშრალი წმენდისთვის საჭიროა მოზრდილი ცელოფანის პარკი, საჭმელი სოდა და რბილი ჯაგრისი. საშუალო ზომის 2-3 სათამაშოს ნახევარი ჭიქა სოდა ეყოფა. 2-3 სათამაშო მოათავსეთ პაკეტში, ჩაყარეთ შიგ სოდაც, მოუკარით პარკს თავი და დაახლოებით წუთის განმავლობაში ანჯღრიეთ. ამის შემდეგ სათამაშოები ამოიღეთ და რბილი ჯაგრისით გაწმინდეთ, რათა სოდა და ჭუჭყი მოაცილოთ.
დიდი სათამაშოები შეიძლება მტვერსასრუტით გაწმინდოთ. ძლიერ დაბინძურებული სათამაშო შეიძლება ქიმწმენდაში მიიტანოთ. არსებობს მშრალი და სველი ქიმიური წმენდა. მშრალი წმენდისას ჭუჭყის ამოსაყვანად ქიმიურ გამხსნელებს იყენებენ. მათი ორთქლის გავლენა ბავშვის ორგანიზმზე კარგად არ არის შესწავლილი, მაგრამ ცნობილია, რომ მათი აორთქლება 3 თვემდე გრძელდება. რაც უფრო პატარაა ბავშვი, მით უფრო მგრძნობიარეა ის ამ აირების ზემოქმედების მიმართ. ამის გათვალისწინებით ჯობს, სათამაშო სველი წესით დამუშავდეს. ამ შემთხვევაში ჭუჭყს აშორებენ სპეციალური სარეცხი საშუალებებით, გამხსნელების გარეშე.
თუ სათამაშო წლების განმავლობაში არავის გაუწმენდია, მასში უხვად იქნება ტკიპები. ეს არ არის გამოუსწორებელი უბედურება. ტკიპებისგან გათავისუფლებაში სიცივე დაგვეხმარება. საკმარისია, სათამაშო ცელოფანის პარკში ჩავდოთ და ერთი დღე-ღამით საყინულეში შევდოთ. ეს პროცედურა დახოცავს ტკიპებს და სათამაშოს პეწს შესძენს. თუ სათამაშო დიდია და საყინულეში არ ეტევა, ისღა დაგვრჩენია, ზამთარს დაველოდოთ.
სათამაშოს ბავშვისთვის სიხარული მოაქვს, ეხმარება პატარას განვითარებაში, მეგობრობისა და მზრუნველობის უნარის ფორმირებაში - პირველი მეგობარი ხომ ხშირად სწორედ დათუნია ან ბაჭიაა. მას პატარა სახელს არქმევს და საწოლში იწვენს. ჩვენ კი არ უნდა დავივიწყოთ, რომ პატარას ჯანმრთელობა მნიშვნელოვანწილად არის დამოკიდებული სუფთა, სწორად შერჩეულ სათამაშოებზე. უნდა ვიზრუნოთ, რომ სათამაშომ ბავშვს მხოლოდ სიხარული მოუტანოს.