News
The Telegraph Calcutta იტყობინება, რომ ინდოეთში წარმატებით დასრულდა იმ ვაქცინის კლინიკური კვლევის პირველი ეტაპი, რომელიც ადამიანებს აივ ინფექციისგან დაიცავს.
კლინიკური კვლევა, რომელიც ამჟამად მიმდინარეობს, ძალზე მნიშვნელოვანია, რადგან წარმოდგენას იძლევა პრეპარატის უსაფრთხოებასა და მის შესაძლო გვერდით ეფექტებზე. მიუხედავად იმისა, რომ შიდსის საწინააღმდეგო ვაქცინაზე მთელი მსოფლიოს მეცნიერები ორი ათეული წელია მუშაობენ, წარმატებას ჯერჯერობით ვერ მიაღწიეს. ვირუსი ძალზე ვერაგია - ის სხვადასხვა მექანიზმს იყენებს, რათა ადამიანის იმუნურ სისტემას დაუსხლტეს. მაგალითად, მას შეუძლია, იცვალოს ცილოვანი გარსი, რაც მის ამოცნობასა და "დაჭერას" ართულებს. აღსანიშნავია, რომ უკანასკნელ ხანს შეიქმნა ვაქცინის 30-მდე პროტოტიპი, მაგრამ ყველა მათგანი გამოუსადეგარი აღმოჩნდა. უმთავრესად იმიტომ, რომ მძიმე გვერდით მოვლენებს იწვევდნენ.
ინდოელ მეცნიერთა მიერ შემუშავებული ვაქცინა პირველია, რომელსაც კლინიკური კვლევის პირველ ეტაპზე თანამოვლენები არ გამოუწვევია. პრეპარატი tgAAC09 აივ ინფექციის პროფილაქტიკის საშუალება იქნება და არა წამალი, რომელიც აივ-ინფიცირებულებსა და შიდსით დაავადებულებს განკურნავს. ის მხოლოდ ჯანმრთელ ადამიანებს არადაინფიცირებულ ადამიანის იმუნოდეფიციტის ვირუსისაგან. დღესდღეობით ინდოეთი წარმოადგენს ქვეყანას, სადაც ყველაზე მეტი აივინფიცირებულია - დაახლოებით 2,5-3 მლნ კაცი, ამიტომ მედიცინის ამ სფეროს ხელშეწყობა ინდოეთის ჯანდაცვის პრიორიტეტულ ამოცანას წარმოადგენს.
აღმოჩენილია მუხლის სახსრის დაზიანების ბიომარკერი
/* (c)AdOcean 2003-2021, Advertline.https:mkurnali.ge.mkurnali zones.________ _____ */
ado.slave('adoceanadvertlinegelpmmhkfobb', {myMaster: 'gC_g7BxQlx9UWDeCK7yaEdkgIoxg2l6o6JUmNs2rvgn.i7' });
აშშ-ის ჯანმრთელობის ნაციონალური ინსტიტუტის მონაცემებით, ამჟამად მენისკის დაზიანების სადიაგნოზოდ მაგნიტურ-რეზონანსულ ტომოგრაფიას იყენებენ. სტენფორდის უნივერსიტეტის სამედიცინო სკოლის მეცნიერთა ჯგუფმა კი აღმოაჩინა ბიომარკერი, რომელიც მედიკოსებს მუხლის სახსრის ამ საკმაოდ გავრცელებული დაზიანების ადრეულ დიაგნოსტიკაში დაეხმარება. მეცნიერები გვარწმუნებენ, რომ მენისკის დაზიანების დროს სახსარშიდა სითხეში შეიძლება აღმოვაჩინოთ სპეციფიკური ცილოვანი კომპლექსი. მენისკის დაზიანება, უფრო ზუსტად, მისი გაგლეჯა უმთავრესად სპორტის იმ სახეობათა მიმდევრებს ემუქრება, სადაც თამაში კონტაქტურია. ასეთია, მაგალითად, ფეხბურთი. გამოკვლევის ხელმძღვანელმა, დოქტორმა გაეტანო სკუდერიმ, და მისმა კოლეგებმა ზემოაღნიშნული კომპლექსი მენისკდაზიანებული 30 პაციენტის სახსარშიდა სითხეში აღმოაჩინეს. პაციენტებს, რომლებსაც მენისკი დაზიანებული არ ჰქონდათ, არც ეს კომპლექსი აღმოაჩნდათ.
მეცნიერები კვლევას განაგრძობენ, რათა დაადგინონ, შესაძლებელია თუ არა, ეს ცილოვანი კომპლექსი სამკურნალწამლო საშუალებების მოლეკულურ სამიზნედ იქცეს. სკუდერის თქმით, ზემოქმედება შეიძლება მოხდეს სხვადასხვა დონეზე, დაწყებული კომპლექსის წარმოქმნის ბლოკირებიდან, დამთავრებული დაზიანების ადგილას ლეოკოციტების გააქტიურების თავიდან აცილებით.
მწვავე ბრონქიტს ცხარე სანელებლები უხდება
იქნებ არც დაიჯეროთ - ცხარე სანელებლები: ნიორი, წიწაკა, კარი - ძალიან სასარგებლო ყოფილა ბრონქიტის დროს. მეცნიერები გვირჩევენ, გაციებისას ამ სანელებლებით შეზავებული ქათმის ბულიონი მივირთვათ. თურმე მათი გავლენით ბრონქებში არსებული ლორწო უფრო სწრაფად გაიწოვება. ასევე ძალიან კარგია სანელებლებისგან მომზადებული სავლები.
ზოგიერთი უცხოური გამოცემა ასეთ მარტივ რეცეპტს გვთავაზობს: ერთ ჩაის ჭიქა წყალს ვამატებთ თითო ჩაის კოვზ პირშუშხას, თაფლს და ტაბასკოს საწებელს. ამ ნარევს დღეში რამდენჯერმე ვივლებთ ყელში, ოღონდ კი არ გადმოვაფურთხებთ, არამედ ვყლაპავთ. ცხარე სანელებლები ილექება ხახის ლორწოვანზე და ასტიმულირებს ბრონქებში სითხის სეკრეციას, რაც ნახველის გათხიერებას იწვევს.
თუ ბრონქიტი ერთხელ მაინც გადაიტანეთ, არსებობს განმეორებითი დაავადების ანუ რეციდივის საფრთხე. ქრონიკული ბრონქიტის ჩამოყალიბება თავიდან რომ ავიცილოთ, რეკომენდებულია, ყოველდღე მივირთვათ ნიორი და სხვა ცხარე სანელებლები. თუ უსიამოვნო სუნი შეგაწუხებთ, შეგიძლიათ უბრალოდ ნივრიანი აბები გადაყლაპოთ.
