ლალი ჩხიკვაძე

• თმას ყოველდღიური მოვლა სჭირდება

• • თმა უნდა ვკვებოთ ვიტამინებით. ამაში შეუცვლელ დამხმარებას გაგვიწევს აბუსალათინის ზეთი. ის ანელებს თმის ცვენას და თმას სისქესა და ბრწყინვალებას ანიჭებს.
  • თმის ვარცხნა სასურველია ხის სავარცხლით. იგი შედარებით ძვირია, მაგრამ გაცილებით ნაკლები ზიანი მოაქვს, ვიდრე რკინისკბილება სავარცხელს.
  • თავის დ აბანა საჭიროა მაშინ, როცა ის დაბინძურდება. მეტისმეტად ხშირი ბანა თმის ცვენასა და ქერტლის წარმოქმნას უწყობს ხელს. მან, ვისაც თმა სწრაფად უცხიმიანდება, უნდა გადაივლოს ჭინჭრის ან ოროვანდის ნახარში, ხოლო რომ არ აეწეწოს - ძმარი.
  • ძილის წინ საჭიროა თავის მასაჟი. უბრალოდ დაიზილეთ თავის კანი თითებით. ეს გააუმჯობესებს სისხლის მიმოქცევას და თმა უკეთესად გაიზრდება.
  • ყურადღება მიაქციეთ საკვებს. თმის მდგომარეობა დამოკიდებულია იმაზეც, ვიღებთ თუ არა აუცილებელ ვიტამინებს. რაციონში ჩართეთ მეტი ხილი, თევზი, თხილი. ნაკლები მიირთვით ცხიმიანი საკვები.
  • შამპუნი სასურველია გვირილას, პიტნას ან კვერცხის გულს შეიცავდეს.
  • თუ ხშირად ხმარობთ ფენს, არ დაგავიწყდეთ თმაზე სპეციალური გელის ან სპრეის წასმა, რათა თმის ღერები მტვრევადი არ გახდეს.

• რა სიხშირით უნდა დავიბანოთ თმა?

თუ თმა 2-3 დღის განმავლობაში კარგად, მოვლილად გამოიყურება და არავითარ დისკომფორტს არ განიცდით, დაიბანეთ 2-3 დღის შემდეგ. თუ ცხიმიანი თმა გაქვთ, რომელიც დაბანის მეორე დღესვე არასასიამოვნოდ გამოიყურება, ყოველდღე უნდა დაიბანოთ, თანაც სპეციალური შამპუნით.

დაბანის სიხშირე დამოკიდებულია თმის სიგრძეზეც. თუ გრძელი თმა გაქვთ, ვარცხნილობის შენარჩუნება შედარებით ძნელია, ამიტომ მისი ყოველდღე დაბანა და მოწესრიგებაა საჭირო. ამასთან, გაითვალისწინეთ - ხშირი ბანა თმისთვის მავნებელია. კოსმეტიკური შამპუნებიც არცთუ ისე კარგ ეფექტს იძლევა, ამიტომ უნდა შევარჩიოთ რბილი შამპუნი. ძალიან მნიშვნელოვანია შამპუნთან ერთად ბალზამის გამოყენებაც. ბალზამი მოცულობას ანიჭებს თმას და აადვილებს მის დავარცხნას.

სჯობს, დაბანისთანავე დავარცხნისგან თავი შევიკავოთ, რადგან სველი თმა სათუთია. დაივარცხნეთ მხოლოდ მას შემდეგ, რაც თმა ბუნებრივად გაგიშრებათ.

ფენი რაც შეიძლება იშვიათად გამოიყენეთ, ხოლო აუცილებელობის შემთხვევაში ისარგებლეთ დამზოგველი ცივი შრობის რეჟიმით. ფენიდან თავამდე მანძილი არანაკლებ 40 სმ უნდა იყოს.

თმის პირსახოცით ღონივრად გამშრალებაც არ არის სასარგებლო - დიდია დაზიანების რისკი. მოკლე თმის დავარცხნა ძირებიდან დაიწყეთ, ხოლო გრძელისა - ბოლოებიდან. 2-3 თვეში ერთხელ აუცილებელია ბოლოების მოჭრა.

• როგორ მოვუაროთ გრძელ თმას?

როგორც პროფესიონალები ამბობენ, გრძელი თმა შეიძლება გამოიყურებოდეს ან საშინლად, ან ბრწყინვალედ.

გრძელი თმის მოვლის პირველი პუნქტია სისუფთავე. გრძელ თმას ხშირად იბანენ, რამდენადაც, გარდა ცხიმისა, ის შეიძლება დაბინძურდეს ქუჩის მტვრით, ქუდის, ტანსაცმლის, ხელის ხშირი შეხების შედეგად.

• • სწორად შევარჩიოთ შამპუნი და კონდიციონერი

გრძელი თმის პატრონებს ხშირად აქვთ ცხიმიანი ძირებისა და მშრალი ბოლოების პრობლემა. შამპუნი ასეთი თმისთვის გულდასმით უნდა შევარჩიოთ. თანამედროვე კოსმეტიკური კომპანიები გვთავაზობენ შესანიშნავ კომბინირებულ შამპუნებს მშრალი და ცხიმიანი ტიპის თმისთვის. ეცადეთ შეარჩიოთ შამპუნი, რომელიც თქვენი თმის ტიპისთვის მეტ-ნაკლებად ოპტიმალური იქნება. თუ შეღებილი თმა გაქვთ, სპეციალური შამპუნი დაგჭირდებათ. მისი წყალობით თმა მუდამ ტენიანი იქნება და მისი ფერი დიდი ხნის განმავლობაში მოგანიჭებთ სიხარულს.

გრძელი თმის მოვლის საშუალებების შერჩევისას არ დაგავიწყდეთ კონდიციონერის შეძენა, რათა თმა იყოს სწორი და არ აიბურდოს. ამასთან, კონდიციონერი დაატენიანებს თმას და თავიდან აგვაცილებს ცხიმის ზედმეტ გამოყოფას.

• • თმის სწორად მოვლა

გრძელი თმა კვირაში 2-3-ჯერ დაიბანეთ. შამპუნი თმის მთელ სიგრძეზე თანაბრად წაისვით და კარგად ჩამოიბანეთ, წინააღმდეგ შემთხვევაში ქერტლი გაგიჩნდებათ. ყოველი დაბანის შემდეგ თმის ბოლოებზე წაისვით კონდიციონერი.

თმა ლამაზი და ჯანსაღი იქნება, თუ ხშირად არ გამოიყენებთ მაფიქსირებელ საშუალებებს. ისინი ახშობენ ცხიმოვან ჯირკვლებს, რაც ან სიმშრალეს, ან თმის ჭარბ ცხიმიანობას იწვევს.

ფრთხილად დაივარცხნეთ თმა. ვიდრე ის სველია, ჯობს, მეჩხერკბილება სავარცხლით დაივარცხნოთ. თუ თმის ფენით გაშრობა აუცილებელია, ჯერ დაივარცხნეთ - ასე ის ოდნავ შეშრება. გაშრობა ჯობს დაიწყოთ თმის ბოლოებიდან და თანდათანობით მივიდეთ ძირებამდე. თმა უფრო სქელი რომ გამოჩნდეს, გამოიყენეთ ჯაგრისი.

ცხიმიანი ძირები და მშრალი ბოლოები თანდაყოლილი არ არის, შეძენილია. ამის მიზეზად მრავალი ფაქტორი შეიძლება იქცეს. მაგალითად, ქარი, მზის სხივები, ყინვა, ქიმიური დახვევა, თერმული დამუშავება, შეღებვა, ხისტი წყალი, რის შედეგადაც თმა ჯანსაღ ელვარებას კარგავს.

ბუნებრივი სილამაზის აღსადგენად საჭიროა მინიმუმამდე დავიყვანოთ დამაზიანებელი ფაქტორის ზემოქმედება:

• • უარი ვთქვათ ფენზე ან გამოვიყენოთ ის რაც შეიძლება იშვიათად;
  • ვიხმაროთ დამზოგველი საღებავები ან მსუბუქი ელფერის მუსი და ტონიკი;
  • იშვიათად გამოვიყენოთ თმის უთო და თმის ლაქი (ეს უკანასკნელი ხელს უშლის თმის სუნთქვას. საღამოს ლაქი აუცილებლად უნდა ჩამოვიბანოთ);
  • დაბანის ან ფენით გაშრობის შემდეგ მაშინვე ნუ გახვალთ ქუჩაში - ტემპერატურის მკვეთრი ცვალებადობა კარგს არაფერს მოგიტანთ-თმამ შეიძლება ბზინვარება დაკარგოს და უფერული და მტვრევადი გახდეს.