ფსიქოლოგიური დახმარება
- მე და ჩემს ქმარს ძალიან გვინდოდა შვილი. როცა გოგონა დაიბადა, ახლობლები და მეგობრები აღფრთოვანებას ვერ მალავდნენ, მე კი ბავშვის არამცთუ ხელში აყვანა, დანახვაც მაღიზიანებდა. ასე ვიტანჯებოდი, სანამ ქმარმა ექიმთან არ წამიყვანა. აღმოჩნდა, რომ ეს მშობიარობის შემდგომი დეპრესია იყო. მკურნალობა მომიხდა, მაგრამ ახლა ძალიან ვნერვიულობ: ჩემმა გოგონამ თავისი სიცოცხლის პირველი თვეები დედის სითბოს გარეშე გაატარა. მოახდენს თუ არა ეს გავლენას მის ხასიათზე? ტატა, 26 წლის
მკითხველის თვალსაზრისი
ანა, 25 წლის: "ძალიან მეცოდება ტატა, მაგრამ ის თვითონ არის დამნაშავე იმაში, რომ "ცუდი დედის" იარლიყი მიიწება. განა შვილის სიყვარულის ხარისხი იმით განისაზღვრება, რამდენჯერ აკოცა დედამ ბავშვს ან შეუსწორა ქუდი? რა სისულელეა!
არ შეიძლება არ გავითვალისწინოთ, როგორი მშობიარობა ჰქონდა ქალს; იქნებ იყო რაიმე გართულება და მისთვის ბავშვი გარკვეული ხნის განმავლობაში ტკივილსა და მტანჯველ შეგრძნებებთან ასოცირდებოდა? მე მგონია, რომ ამაში გასაკვირი არაფერია. მას რომ სადმე დასავლეთში ეცხოვრა, ქმარი მხოლოდ ექიმთან კი არ წაიყვანდა, არამედ ძიძასა და დამხმარე ქალსაც დაუქირავებდა. სამწუხაროდ, ჩვენში ეს მხოლოდ შეძლებულ ოჯახებს თუ ხელეწიფებათ. ახალგაზრდა დედას სამშობიაროდან გამოწერისთანავე უამრავი საქმე უჩნდება: ბავშვის მოვლა, ქმრის მოვლა, სადილ-ვახშმის მომზადება, სარეცხისა და ჭურჭლის რეცხვა... და გამოდის, რომ ახალნამშობიარევი ქალი მთელ ღამეებს თეთრად ათენებს. ხოლო თუ ამ ყველაფერს თავი ვერ გაართვა, მაშინვე "ცუდი" ხდება. მაგრამ ეს ხომ ასე არ არის! თქვენ, თქვენს ქმარს და თქვენს გოგონას ყველაფერი კარგად გექნებათ".
ნანა, 41 წლის: "ტატა, პრობლემა ის არის, რომ მაშინვე ვერ შეძელით გოგონას შეყვარება, მაშინვე ვერ გაითავისეთ დედის როლი. ბავშვისადმი დედობრივი სითბო და სიყვარული ყველა ქალს მშობიარობისთანავე არ ეუფლება. მე თვითონ სამი შვილის დედა ვარ და ვიცი, რასაც ნიშნავს, მოავლინო ამქვეყნად სიცოცხლე. ქალმა მარტო ის კი არ უნდა გააცნობიეროს, რომ დედა გახდა, არამედ ისიც, რომ ამიერიდან ახალ ცხოვრებას იწყებს. ბავშვი გაიძულებს, დაივიწყო უგუნებობა და სისუსტე, უძილო ღამეები, სირთულეები, რომლებსაც ვერ გაექცევი. ამ ყველაფერს წმინდა დედობრივი სიყვარული გადაგვალახვინებს. მართალია, თქვენთან მაშინვე არ მოვიდა ეს გრძნობა, მაგრამ ნუ ნერვიულობთ. რაც მთავარია, თქვენ არ ხართ გულგრილი გოგონას მიმართ, თანაც გვერდით გყავთ შესანიშნავი ადამიანი - თქვენი მეუღლე. ის მზრუნველია, გულთან მიაქვს თქვენი განცდები და ცდილობს დაგეხმაროთ. თქვენ ერთად შესანიშნავი მშობლები იქნებით, გისურვებთ ჯანმრთელობასა და ბედნიერებას!"
თინიკო, 36 წლის: "როგორც კი ეს წერილი წავიკითხე, მაშინვე მივხვდი, რომ ამ სტრიქონების ავტორი ნაზი და განებივრებული "დედიკოს გოგონაა". ის წერს, რომ მას და მის ქმარს ბავშვი ძალიან უნდოდათ. ტატა ისე გაერთო ორსულობით, რომ ახალმა სტატუსმა შოკში ჩააგდო, თითქოს სულ მალე თოჯინის ყიდვას ჰპირდებოდნენ! გარშემო მყოფთა ყურადღება მაშინვე ახალშობილზე გადაერთო და ტატამ უბრალოდ იეჭვიანა. ექიმთან ვიზიტის შემდეგ ის, რა თქმა უნდა, დამშვიდდა, მაგრამ საქმე მხოლოდ მკურნალობასა და აბებში როდია; მთავარი გახლდათ, რომ ის, ბოლოს და ბოლოს, ყურადღების ცენტრში აღმოჩნდა. თუ ეს ქალი არ შეიცვალა, შვილთან ურთიერთობა მომავალში მართლაც გაუჭირდება".
ფსიქოლოგის რჩევა: ნუ შეგრცხვებათ საკუთარი ემოციების. ნეგატიური განცდები ხშირად მოუგვარებელი პრობლემების შედეგია, ამიტომ მთელი ენერგია უნდა მიმართოთ არა გაღიზიანების დასათრგუნავად, არამედ მისი ფარული მიზეზების გამოსავლენად. გახსოვდეთ: შვილს სჭირდებით.
ხშირად ფსიქოლოგიური პრობლემები ამა თუ იმ კუთხით გარდასულ მოვლენებს უკავშირდება. ზოგიერთის დავიწყება შეძელით, ხოლო ის, რაც გახსოვთ, ვერ ხვდებით, რომ ახალ სირთულეებთან უნდა დააკავშიროთ. მშობიარობის შემდგომი დეპრესიის მიზეზი შესაძლოა ის იყოს, რომ ქმარს ძალიან უნდოდა ბიჭი, და თუნდაც მამა პირველი დღეებიდანვე სიამოვნებით ფუსფუსებდეს გოგონას ირგვლივ, ცოლს მაინც ჰგონია, რომ ქმარი გულწრფელი არ არის. იმისათვის, რომ გრძნობების, აზრებისა და ქცევების ეს კვანძი სწრაფად და ადვილად გაიხსნას, უნდა მიმართოთ ოჯახის ფსიქოლოგს. ნებისმიერი ურთიერთობა დღითი დღე უნდა ვითარდებოდეს, მათ შორის - დედისა და შვილის ურთიერთობაც. თუ დღეს არ გაქვთ განწყობა, შვილს "იავნანა" უმღეროთ, ეს არ არის საიმისო საფუძველი, რომ საკუთარი თავი ცუდ დედად მიიჩნიოთ. თქვენი პატარასთვის თქვენ საუკეთესო დედა ხართ!
- როცა მე და ჩემმა შეყვარებულმა, სანდრომ, ერთმანეთი გავიცანით, მან მითხრა, ჩემი მშობლები შეძლებული ადამიანები არიან, მაგრამ მათთან ნაჩხუბარი ვარ და ამიტომ ფულს არ მაძლევენო... ჩვენ დავქორწინდით. მე ვმუშაობდი, ის სწავლობდა. ფაქტობრივად მხოლოდ ჩემს ხელფასზე ვცხოვრობდით. მალე გოგონა გაგვიჩნდა. სანდრომ კრედიტი აიღო, სანაცვლოდ კი ჩემი ბინა დააგირავა. მერე კი... მიმატოვა. იძულებული გავხდი, ბავშვი დედისთვის მიმებარებინა - დღედაღამ ვმუშაობ, რომ ვალი გავისტუმრო. მარი, 27 წლის
მკითხველის თვალსაზრისი
ხათუნა, 42 წლის: "ისეთი ისტორიაა, სისხლი გაგეყინება ადამიანს. მაკვირვებს, როგორი მიმნდობი და წინდაუხედავი აღმოჩნდა წერილის ავტორი. ჩემი აზრით, ამ სიტუაციაში მან უნდა გააკეთოს სამი რამ.
პირველი: მიმართოს აუტოტრენინგს - დილაობით დადგეს სარკესთან, თვალმოუშორებლად დააკვირდეს საკუთარ გამოსახულებას და იმეოროს: "მე აღარასოდეს წამოვეგები ასეთ ანკესზე";
მეორე: იშოვოს ოჯახის კოდექსი და მოძებნოს საჭირო მუხლი: "ქონება, რომელიც მეუღლეებმა შეიძინეს ქორწინებაში ყოფნის დროს, წარმოადგენს მათ ერთობლივ საკუთრებას", ანუ სანდროს ბინა მასში არსებული ქონებით. ყურადღება მიაქციეთ სტრიქონებს: "საერთო ქონების გაყოფა შესაძლებელია როგორც ქორწინების პერიოდში, ისე ქორწინების შეწყვეტის შემდეგ ნებისმიერი მეუღლის მიერ, ასევე კრედიტორის მოთხოვნის წაყენების შემთხვევაში; ერთ-ერთი მეუღლის თხოვნით ქონების გაყოფის უფლება" და ა.შ.
მესამე: აიყვანეთ ადვოკატი, რომელიც თქვენს ინტერესებს დაიცავს და მიაღწევს ბინის გაყოფას თქვენი და თქვენი შვილის სასარგებლოდ".
ელენე, 27 წლის: "თითოეულ ჩვენგანს ჰქონია პერიოდი, როცა გზაჯვარედინზე იდგა და არ იცოდა, როგორ მოქცეულიყო. ამ წერილის ავტორსაც მოუხდა გადაწყვეტილების მიღება წარუმატებელი ქორწინების შემდეგ, თუმცა მან არც ისე იოლი არჩევანი გააკეთა - ყველა პრობლემის მოგვარება საკუთარ თავზე აიღო. როგორც ჩანს, სხვაგვარად არ შეეძლო, რადგან აქვს თავისი პრინციპები, ეს კი იმას ნიშნავს, რომ მისი საქციელი გამართლებულია".
ვიკა, 35 წლის: "მე გამაოცა მარიმ. ასეთი საქციელი კარგია და გამართლებული ქველმოქმედების დროს, მაგრამ როგორ შეიძლება, უპრინციპო ალფონსის გამო საკუთარ თავსა და შვილსაც ამდენი ზიანი მიაყენო? ეს ხომ სანდრომ აიღო კრედიტები და ვალებში ჩავარდა! მაშ, რატომ იღებთ საკუთარ თავზე ასეთი სერიოზული პრობლემების მოგვარებას? თქვენს ბინას ხომ საფრთხე ემუქრება (ის კი მგონი თქვენი იყო - ქორწინებამდე გქონდათ). თქვენმა ალფონსმა კეთილი ინებოს და ვალები საკუთარი ქონებით გადაიხადოს. ვინ იცის, სადღაც აქვე არხეინად ცხოვრობს და თქვენს გულუბრყვილობაზე ეცინება!
ნუ ფიქრობთ სიამაყეზე. ეცადეთ, პრობლემა კანონის ფარგლებში მოაგვაროთ და არ დაინდოთ ფინანსური დამნაშავე, - უფრო რბილ სიტყვებს ის არ იმსახურებს".
ნინო, 39 წლის: "მე მტკიცედ ვარ დარწმუნებული, რომ ადამიანი სიხარულისა და სიყვარულისთვის არის შექმნილი. ყველაფერი მის ბუნებასა და რწმენაზეა დამოკიდებული. უფალი ძალას გვაძლევს, რომ განსაცდელი დავითმინოთ. დაუნდობლობასა და ღალატს ტკივილი და ტანჯვა მოაქვს, მაგრამ ჩვენ მაშინ ვართ ძლიერები, როცა ამ ყველაფერს ვუძლებთ და არ ვბოროტდებით. მარის უნდა ვუთხრა, რომ ის ყოჩაღია. მძიმე განსაცდელი მან ვაჟკაცურად გადაიტანა".
ფსიქოლოგის კომენტარი: რაც უნდა კარგი იყოს მამაკაცი, რომელსაც თქვენ შეხვდით, მან თავისი ქცევით უნდა დაამტკიცოს ეს, რათა თქვენი ნდობა მოიპოვოს. არასოდეს მოგერიდოთ კითხვების დასმა, როცა რამე არ მოგწონთ. სამწუხაროდ, ალფონსებს შორის იშვიათად შეხვდებით დამნაშავის გარეგნობის მქონე მამაკაცებს, - ისინი მომხიბვლელნი, კარგად ჩაცმულნი და კარგი გემოვნებისანი არიან, იციან ლამაზად საუბარიც - ეს მათი ხელობაა!
რეალისტი უნდა იყოთ, უნდა ენდოთ, მაგრამ შეამოწმოთ. სწორად შეაფასეთ თქვენი შესაძლებლობები, დაგეგმეთ თქვენი ცხოვრება, ყოველთვის გაითვალისწინეთ ის, რაც ახლა გაქვთ და არასოდეს დარჩეთ იმის იმედად, რაც შეიძლება გქონდეთ მომავალში. ასე რომ, თუ მამაკაცს არ აქვს სამუშაო, ნუ იჩქარებთ ბავშვის გაჩენას. ნუ შეგაშინებთ ის, რომ შეიძლება სუსტი გამოჩნდეთ. ალფონსს იმედი აქვს, რომ მასზე შეყვარებული ქალი მისთვის ყველაფერს გააკეთებს. ნუ იჩქარებთ თქვენი მზაობის დემონსტრირებას. თანაუგრძნეთ, მიეცით რჩევა, შემდეგ კი დააკვირდით მის რეაქციას. ღირსეული მამაკაცი ყოველთვის იპოვის პრობლემის მოგვარების გზას თქვენი მონაწილეობის გარეშე.