დეჰიდრატაციის 5 ნიშანი
წყურვილის გრძნობა რთული ფიზიოლოგიური პროცესის შედეგია. კვლევებმა აჩვენა, რომ ეს გაფრთხილებაა იმისა, რომ დეჰიდრატირებული ხართ.
დეჰიდრატაცია არ ნიშნავს მხოლოდ იმას, რომ თქვენი ორგანიზმი კარგავს წყალს. ეს ასევე ნიშნავს, რომ თქვენ კარგავთ ელექტროლიტებს, როგორიცაა ნატრიუმი, მაგნიუმი და კალიუმი.
ჯანმრთელობის გარკვეულმა მდგომარეობამ, მათ შორის დიაბეტმა, შეიძლება გაზარდოს დეჰიდრატაციის რისკი. თუ ზედმეტად ოფლიანობდით სიცხის ან გადატვირთვის გამო, ან გქონდათ ფაღარათი გრიპის ან სხვა მწვავე დაავადების გამო, განსაკუთრებით მნიშვნელოვანია ყურადღება მიაქციოთ წყლის მარაგის შევსებას.
არანამკურნალევმა გაუწყლოებამ შეიძლება გამოიწვიოს გულისცემის გახშირება.
ჯანდაცვის მსოფლიო ორგანიზაციის მიხედვით, სხეულის წონის 10%-ზე მეტი სითხის დაკარგვამ შეიძლება გამოიწვიოს დაზიანება ან ფატალური გართულებები. შეიძლება განვითარდეს კრუნჩხვები, გულის არითმია ან ჰიპოვოლემიური შოკი, რადგან სისხლის მოცულობა იკლებს.
უმეტეს შემთხვევაში თქვენ შეგიძლიათ მარტივად შეავსოთ სითხის მარაგი და თავიდან აიცილოთ დეჰიდრატაცია. წყურვილი, თავის ტკივილი და პირის სიმშრალე იმის ნიშანია, რომ უნდა მიიღოთ წყალი. მაგრამ, დეჰიდრატაციის ნიშნები ყოველთვის ასე აშკარა არ არის.
დეჰიდრატაციის ხუთი ნიშანი:
არასასიამოვნო სუნი პირიდან
ნერწყვს აქვს ანტიბაქტერიული თვისებები, მაგრამ გაუწყლოებამ შეიძლება ხელი შეუშალოს საკმარისი ნერწყვის გამომუშავებას. ამ დროს შესაძლოა ბაქტერიების ჭარბი რაოდენობა დაგროვდეს პირის ღრუში, რაც არასასიამოვნო სუნს იწვევს.
მშრალი ან გაწითლებული კანი
კანთან დაკავშირებული დეჰიდრატაციის კიდევ ერთი მთავარი სიმპტომია კანის ელასტიურობის დაკარგვა.
კუნთების კრუნჩხვები
ერთ-ერთი სიმპტომი, რომელსაც ყურადღება უნდა მიაქციოთ, არის კუნთების კრუნჩხვები, რაც შეიძლება მოხდეს ვარჯიშის დროს, განსაკუთრებით ცხელ ამინდში. ელექტროლიტების ცვლილებებმა, როგორიცაა ნატრიუმი და კალიუმი, შეიძლება გამოიწვიოს კუნთების კრუნჩხვა. გრილ ამინდშიც კი, დეჰიდრატაცია შესაძლებელია, თუ ვარჯიშის დროს დაკარგულ სითხეს არ შეავსებთ.
საკვებისადმი ლტოლვა, განსაკუთრებით ტკბილეულის მიმართ
როდესაც დეჰიდრატირებული ხართ, ისეთ ორგანოებს, როგორიცაა ღვიძლი, რომელიც წყალს იყენებს, შეიძლება გაუჭირდეს გლიკოგენის, შენახული გლუკოზის, და ენერგიის მარაგების სხვა კომპონენტების გამოთავისუფლება. ტკბილეულისადმი ლტოლვა ხშირია, რადგან ორგანიზმს შეიძლება უჭირდეს გლიკოგენის დაშლა.
თავის ტკივილი
მსუბუქმა დეჰიდრატაციამაც კი შეიძლება გამოიწვიოს თავის ტკივილი. მიუხედავად იმისა, რომ დეჰიდრატაციის გარდა სხვადასხვა ფაქტორმა შეიძლება გამოიწვიოს თავის ტკივილი, სავსე ჭიქა წყლის დალევა და დღის განმავლობაში მეტი სითხის დალევის გაგრძელება მარტივი გზაა ტკივილის შესამსუბუქებლად.
თუ გწყურიათ, უკვე დეჰიდრატირებული ხართ. მაგრამ წყურვილის ნაკლებობა სულაც არ ნიშნავს, რომ კარგად ხართ ჰიდრატირებული. არსებობს რამდენიმე მეთოდი ჰიდრატაციის დონის შესამოწმებლად, მაგალითად:
კანის ტესტი - თითით დააჭირეთ კანს და შემდეგ გაუშვით. კანი უნდა დაუბრუნდეს თავის ნორმალურ მდგომარეობას რამდენიმე წამზე ნაკლებ დროში. თუ კანი ნელა უბრუნდება ნორმალურ მდგომარეობას, შესაძლოა დეჰიდრატირებული იყოთ.
შარდის ფერი - თუ კარგად ხართ ჰიდრატირებული შარდი ძირითადად გამჭვირვალე იქნება ღია ყვითელი ელფერით. მუქი ყვითელი ან ნარინჯისფერი არის "გამაფრთხილებელი" ფერები, რომელსაც ყურადღება უნდა მიაქციოთ.