ლალი ჩხიკვაძე

სულ რამდენიმე წლის წინ ჩვენი მენიუ განიხილდებოდა იმ კუთხით, რომ სადილზე აუცილებელი იყო "პირველი კერძის" ან "ცხელი წვნიანის" სავალდებულო მიღება. და ეს იყო დოგმა. არსებობდა მითები, რომ წინააღმდეგ შემთხვევაში გასტრიტი ან თუნდაც წყლული დაგვემართებოდა. მაგრამ როგორ არის სინამდვილეში?

სუპი არ არის ადამიანის ჯანსაღი კვების რაციონის განუყოფელი ნაწილი. თუმცა, სურვილის შემთხვევაში, შეგიძლიათ წვნიანი შეიტანოთ როგორც ზრდასრულთა, ასევე ბავშვის რაციონში.

საკითხავია, როგორი უნდა იყოს კარგი სუპი?

• მიზანშეწონილია ხორცის ბულიონის პირველი ნახარში გადაწუროთ ცხიმის საერთო შემცველობის შესამცირებლად. თუ ბულიონი არ არის ცხიმიანი, არ გჭირდებათ მისი გადაწურვა, მაგრამ ხარშვისას აუცილებლად მოხსენით ქაფი.
• ბოსტნეულის ბულიონი, თევზი, სოკო - შესანიშნავი საშუალებაა მენიუს გამრავალფეროვნებისათვის. კრემ-სუპები, მისოს სუპები - კარგი არჩევანია! გახსოვდეთ: რაც უფრო მრავალფეროვანია თქვენი კვების რაციონი, მით უკეთესია იგი ჯანმრთელობისათვის!
• სუპის მირთმევა კვების რაციონში ბოსტნეულის რაოდენობის გაზრდის შესანიშნავი საშუალებაა. წვნიანი სასურველია შეიცავდეს მინიმუმ სამი ფერის ბოსტნეულს: მაგალითად, სტაფილო, წითელი წიწაკა და მწვანე ოხრახუში.
• წვნიანში ცხიმიანი ნაღების და არაჟანის დაამატება გაზრდის კერძის კალორაჟს, ამიტომ მოერიდეთ მათ ან აირჩიე ნაკლებად ცხიმიანი ალტერნატივები.
• ბოსტნეულიდან ცილის ულუფის მისაღებად წვნიანში რეკომენდებულია პარკოსნების დამატება. ეს შეიძლება იყოს ბარდა, ოსპი, ლობიო.
• წვნიანს შეგიძლიათ და უნდა დაამატოთ მარცვლეული, მაკარონი და კარტოფილიც კი (მაგრამ უმჯობესია აირჩიოთ მხოლოდ ერთ-ერთი).

ვიცით, რომ კარტოფილი კი არ გვასუქებს, არამედ ჭარბი კვება და დაბალი აქტივობა

• ბოსტნეულის ბულიონში შეგიძლიათ და უნდა დაამატოთ ფრინველის ხორცი და თევზი - მოხარშული ან გუფთების სახით.

თუმცა, უნდა გავითვალისწინოთ, რომ წვნიანი ძალიან კარგად ანაყრებს მისი მოცულობის გამო. მაგრამ იმის გამო, რომ ის დაბალკალორიულია, დანაყრების გრძნობა დიდხანს არ გრძელდება და მალე კვლავ მოგინდებათ ჭამა. თუ წვნიანი მსუბუქია, დაამატეთ მთელი მარცვლეულის პურის ნაჭერი, ბოსტნეულის სალათი ან სრული ძირითადი კერძი.

რატომ ჯობია არ მივცეთ უჭმელ ბავშვებს წვნიანი?

• ის კუჭს აავსებს და სხვა რამის ჭამის სურვილს გააქრობს.

აუცილებელია თუ არა სუპი ნაწლავის ნორმალური ფუნქციონირებისთვის?

არა, ამისათვის უნდა მივიღოთ ბოჭკოვანი (მინიმუმ 400 გრამი ბოსტნეული და ხილი დღეში), მთელი მარცვლეულის და სითხეები.