მაღალი არტერიული წნევა შეიძლება დაკავშირებული იყოს უძილობასთან
კვლევის ავტორები გვირჩევენ, ყურადღებით დააკვირდეთ არტერიულ წნევას და მიაქციოთ ყურადღება უძილობასა და ძილის პრობლემებს.
მასაჩუსეტსის შტატის ბოსტონის ბრიგამისა და ქალთა ჰოსპიტალში ჩატარებულმა ახალმა კვლევამ აჩვენა კავშირი ქალებში არასაკმარის ძილსა და ჰიპერტენზიას შორის.
კვლევის ავტორების რეკომენდაციით, ქალებმა, რომლებსაც არასაკმარისად სძინავთ, უნდა გაიარონ წნევის სკრინინგი და თუ მათ უჭირთ დაძინება, გამოიკვლიონ ძილის პრობლემების გადაჭრის გზები.
კვლევა გამოქვეყნებულია ჟურნალში, Hypertension.
ძილის პრობლემები ზრდის ჰიპერტენზიის რისკს
მკვლევარებმა გაითვალისწინეს კვლევის მონაწილეების ცხოვრების წესი და დემოგრაფიული რისკ-ფაქტორები. დაადგინეს, რომ ქალებში ჰიპერტენზიის რისკი ასოცირდება როგორც არასაკმარისი რაოდენობის ძილთან, ასევე ძილის პრობლემებთან.
ქალები, რომლებსაც 24 საათში 5 საათი ან ნაკლები ეძინათ, 10%-ით უფრო მეტად უვითარდებოდათ ჰიპერტენზია, ხოლო ქალებს, რომლებსაც 6 საათი ეძინათ, 7%-ით უფრო მეტად უვითარდებოდათ ეს მდგომარეობა.
არ იყო ჰიპერტენზიის გაზრდილი რისკი ქალებში, რომლებსაც რვა საათზე მეტი ეძინათ.
ქალები, რომლებიც აცხადებდნენ, რომ ხანდახან ან ხშირად უჭირდათ ძილი, 14%-ით და 28%-ით უფრო მეტად აღენიშნებოდათ ჰიპერტენზია, ვიდრე მათ, ვისაც იშვიათად ჰქონდა ძილის პრობლემები.
რა კავშირშია ძილი ჰიპერტენზიასთან
კვლევა არ ადგენს მიზეზობრიობას. მეცნიერების თქმით, ძნელია იმის გარკვევა, იწვევს თუ არა ძილის პრობლემები ჰიპერტენზიას, თუ პირიქით.
კვლევის წამყვანი ავტორი გვთავაზობს შესაძლო მექანიზმს, რომლითაც ძილმა შეიძლება ხელი შეუწყოს ჰიპერტენზიას:
ძილის პრობლემებმა შესაძლოა გამოიწვიოს მოვლენების ჯაჭვი, რამაც შეიძლება გაზარდოს ნატრიუმის შეკავება და არტერიების გამკვრივება, რაც პოტენციურად იწვევს ჰიპერტენზიას. ძილ-ღვიძილის ციკლის დარღვევამ ასევე შეიძლება გავლენა მოახდინოს სისხლძარღვების შეკუმშვა/რელაქსაციის აქტივობაზე და იმ უჯრედების ფუნქციაზე, რომლებიც არეგულირებენ სისხლძარღვთა ტონუსს.
მეორე მხრივ, კვლევაში მოყვანილი ჰიპოთეზა გვთავაზობს საპირისპირო სცენარს, როდესაც ჰიპერტენზია იწვევს ცუდ ძილს. შესაძლოა, ეს გამოწვეული იყოს მექანიზმით, რომლის დროსაც არტერიული წნევა ეცემა ძილის დროს და იზრდება გაღვიძებისთანავე.
ხაზგასმით უნდა აღინიშნოს, რომ ეს არის მხოლოდ ჰიპოთეზა და საჭიროებს შემდგომ გამოკვლევას.
გარდა ამისა, ჰიპერტენზიის რისკის მიუხედავად, პირებს, რომლებსაც უჭირთ დაძინება ან არ ძინავთ საკმარისად, სასურველია გამოიკვლიონ გამომწვევი მიზეზები.