მარიამ ფოლადაშვილი

არასწორი კვება, დატვირთული რეჟიმი, პასიური ცხოვრების წესი, არასაკმარისი ძილი და სხვა უამრავი რამ ხშირად დაღლილობის მიზეზი ხდება. თუ ამ ფაქტორების აღმოფხვრამ დაღლილობა არ გააქრო, შესაძლოა, რომელიმე დაავადების მანიშნებელი იყოს.

დაღლილობის მიზეზი შეიძლება გახდეს:

• ენდოკრინული ცვლილებები (ანემია, ფარისებრი ჯირკვლის ფუნქციის მოშლა, თირკმლის დაავადებები);
• ინფექციური დაავადებები;
• გულისა და ფილტვის პათოლოგიები;
• რევმატული დაავადებები;
• სიმსუქნე;
• ქიმიოთერაპია, სხივური თერაპია;
• ქრონიკული ტკივილი;
• არასაკმარისი ფიზიკური აქტივობა ან პირიქით გადაჭარბებული აქტივობა;
• ფსიქოემოციური დარღვევები(შფოთვა, დეპრესია, სტრესი, კვების დარღვევები-ანორექსია ან ბულიმია);
• მედიკამენტები(ანტიდეპრესანტები, ზოგიერთი დამამშვიდებელი საშუალება);
• ძილის პრობლემები

დაღლილობა შესაძლოა გამოიხატოს გონებრივი, ფიზიკური და ემოციური ცვლილებებით, რომელთაც თან ახლავს:

• აპათია;
• დღისით მოთენთილობა;
• კონცენტრაციის ნაკლებობა;
• გაღიზიანებადობა;
• თავის ტკივილი;
• შენელებული რეაქციები;
• კუჭ-ნაწლავის ტრაქტის პრობლემები

დაღლილობის შესამცირებლად და ცხოვრების ხარისხის გასაუმჯობესებლად უმნიშვნელოვანესია ძილისა და კვების რეჟიმის მოწესრიგება, ფიზიკური აქტივობა. ამისათვის კი უმჯობესი იქნება, თუ გაითვალისწინებთ შემდეგ რეკომენდაციებს:

• მიირთვით ხშირად და მცირე ულუფებით;
• მოერიდეთ შაქრის შემცველ საკვებს, ამის მაგივრად მიიღეთ მეტი ხილი და ბოსტნეული;
• ეცადეთ კოფეინი მიიღოთ დღის პირველ ნახევარში;
• ზომიერად დაიტვირთეთ ფიზიკურად;
• ეცადეთ ყოველდღე ერთსა და იმავე დროს დაიძინოთ და გაიღვიძოთ;
• მოერიდეთ ძილის წინ ჭამას;
• ძილის წინ სასურველია მიიღოთ თბილი აბაზანა;
• ძილისას ოთახში უნდა იყოს სიწყნარე და სიბნელე;
• დაძინებამდე(დაახლოებით 1 საათით ადრე) მოერიდეთ ეკრანის გამოსხივებას, რადგან ის ასტიმულირებს ტვინს და უარყოფითად მოქმედებს ძილის ხარისხზე