იგი მიეკუთვნება როგორც ბიოლოგიურ, ისე კოგნიტურ (შემეცნებით) პროცესებს. ადამიანის ნერვული სისტემა რეცეპტორების მეშვეობით იღებს ინფორმაციას და თავის ტვინის სხვადასხვა განყოფილების ნეირონების მეშვეობით ინახავს გარკვეული დროის განმავლობაში, ხოლო საჭიროების შემთხვევაში პოულობს შენახულ ინფორმაციას და იყენებს მოთხოვნის შესაბამისად.

ადამიანების უმრავლესობას მეხსიერების საკმაოდ დიდი პრობლემა აქვს. ბევრ მათგანს უჭირს დამახსოვრება, გახსენება და უბრალოდ რაიმეს სწავლა. სტატიაში მოცემული 6 რჩევა დაგეხმარებათ, რომ მარტივად დაგამახსოვრდეთ და არ დაგავიწყდეთ.

1) რისი დამახსოვრებაც გსურთ, წიკითხეთ ხმამაღლა.

კვლევებმა აჩვენა, რომ ჩუმად საუბარსა და ფიქრზე უმჯობესი ხმამაღლა კითხვაა, რადგან ეს ეხმარება თქვენს ტვინს , რომ მიღებული ინფორმაცია მარტივად დაიმახსოვროს.

2) ამოაკონსპექტეთ მასალა ხელით და არა კომპიუტერით

მართალია,დღესდღეობით კომპიუტერი ბევრ ჩვენგანს მუშაობასა და სწავლაში გვეხმარება და, რა თქმა უნდა, კომპიუტერით გაცილებით სწრაფად და მარტივად შეგვიძლია ბეჭდვა, ვიდრე ხელით, მაგრამ მეცნიერები გვირჩევენ, რომ ხელით ვწეროთ, რადგან ხელნაწერ მასალას უფრო მარტივად ვიმახსოვრებთ და, აგრეთვე, დიდხანს გვრჩება გონებაში.

3) გამოცადეთ საკუთარი თავი ბევრჯერ

სასურველი, და ამავდროულად, ძალზე მნიშვნელოვანია საკუთარი თავის გამოცდა. ამ დროს თქვენ უკეთ შეიტყობთ, თუ რა გაიგეთ და რა ვერა. კვლევებმა აჩვენა, რომ რაიმეზე არასწორი პასუხის გაცემა საუკეთესო გზაა შემდგომში მისი სწორი პასუხის დასამახსოვრებლად.

4) თუ ვერ იმახსოვრებთ რაიმეს, შეცვალეთ მეცადინეობის მეთოდი

ერთი და იმავე მეთოდით ბევრჯერ გამეორება, მით უმეტეს უშედეგოდ, ვერ დაგეხმარებათ მასალის სწავლაში. უმჯობესია შეცვალოთ მეცადინეობის მეთოდი.

5) მეტი ძილი

ძილს ძალიან დიდი როლი აქვს კარგი მეხსიერების შენარჩუნებისათვის. ხანმოკლე ძილსაც კი შეუძლია გააუმჯობესოს თქვენი მეხსიერების ფუნქციონირება.

6) ასწავლეთ სხვას

თქვენ მიერ მიღებული ცოდნა გაუზიარეთ სხვას, ამით თქვენც კმაყოფილი დარჩებით და სხვებიც. თუნდაც იმის ცოდნა, რომ თქვენი ათვისებული მასალა სხვებს უნდა უამბოთ, დიდ სტიმულსა და მოტივაციას გაძლევთ.

ავტორი: ია რომანაძე