რა უნდა გაითვალისწინოთ გაზქურის შეძენისას
კომპლექტში შეიძლება შედიოდეს ცხობისთვის საჭირო ფორმების ნაკრები, ასაწყობი მოწყობილობა სამზარეულო ნივთების შესანახად. ძვირად ღირებულ მოდელებს მოჰყვება ჭურჭელი, რომელიც სწორედ ამ ქურაზე საკვების მოსამზადებლად არის განკუთვნილი.
მოსახარში ხაზი: რომელი უფრო მოხერხებულია?
სხვადასხვა ტიპის ელექტროქურები იმით განსხვავდება ერთმანეთისგან, თუ როგორ არის ორგანიზებული გაცხელების სისტემა - გამაცხელებელი ადგილი ანუ გამაცხელებელი ზედაპირი.
თუჯის სადგამები. ჯერ კიდევ ათი წლის წინ გამოჩნდა თუჯის ბრტყელი, ბლინის ფორმის სადგამი და აქამდე პოპულარულია. თუმცა მის გახურებასა თუ გაგრილებას დიდი დრო მიაქვს. სამაგიეროდ, დღემდე უსაფრთხოდ მიიჩნევა.
მინაკერამიკული. მინაკერამიკული ზედაპირი მოხერხებულია თავისი სიგლუვის გამო, ის სწორია და ჭურჭელი თანაბარ ზედაპირზე არ მოძრაობს, თუ შემთხვევით ხელს გაჰკრავთ, გადმოვარდნის საფრთხე არ ემუქრება. მაგრამ თუ თვალს მოაშორებთ თქვენს "კულინარიულ შედევრს", ქურის გლუვი ზედაპირიდან ის შეიძლება პირდაპირ იატაკზე გადმოვიდეს. მინაკერამიკა სწრაფად ხურდება, რადგან გამაცხელებელი ელემენტები თბოიზოლაციურ მასალაშია მოთავსებული და სიმხურვალე მათგან მხოლოდ ზემოთ, ჭურჭლისკენ მიემართება. მისი გაწმენდა გაცილებით იოლია, ვიდრე ჩვეულებრივი სადგამებისა. მაგრამ ასეთი მოდელი გაცილებით ძვირად ღირებულია და განსაკუთრებული ქვაბებისა და ტაფების შერჩევას მოითხოვს, რომელთაც თანაბარი ძირი აქვთ.
კომბინირებული. თუ გაზიფიცირებულ სახლში ცხოვრობთ, შეგიძლიათ შეარჩიოთ გაზისა და ელექტროქურის კომბინირებული მოდელი, სადაც ერთ ზედაპირზე ორივე სახის სადგამებია.
სადგამები: ჰალოგენი თუ ინდუქცია?
მინაკერამიკულ ქურებზე სხვადასხვა სახის სადგამებს აყენებენ:
1. ჩვეულებრივ სპირალურ სადგამებს;
2. ჰალოგენურებს. ისინი ჰალოგენური ნათურების ზემოქმედებით ხურდება 10-12 წამის განმავლობაში და გამორთვის შემდეგ ასევე სწრაფად უბრუნდება ოთახის ტემპერატურას;
3. ინდუქციურებს. ისინი ელექტრომაგნიტური ველის საშუალებით ხურდება, მხურვალების საჭირო დონეს ძალიან მალე აღწევს და ამასთან, შესწევს უნარი, სწრაფად არეგულიროს ტემპერატურა.
ინდუქციური სადგამების წყალობით პატარა სამზარეულოც კი სასწაულებრივი გვეჩვენება: ქურის ზედაპირზე ჩაიდანი დუღს, მაგრამ შეეხები თუ არა ქურის ზედაპირს გვერდიდან, აღმოაჩენ, რომ ის... ცივია. თუნდაც წვნიანი გადმოგივიდეთ, ლოდინი საჭირო არ არის - შეგიძლიათ, მაშინვე მოსპოთ უსიამოვნო კვალი ზედაპირზე. თუმცაღა ასეთი ქურები საკმაოდ მომთხოვნია ჭურჭლის მიმართ: გაცხელების ინდუქციური მეთოდი მხოლოდ მაშინ ამოქმედდება, თუ თქვენს ქვაბებსა და ტაფებს თუჯის ან ფოლადის დამაგნიტებული ძირები აქვს.
ყველა სადგამი მრგვალი არ არის. ამოზნექილ, ამობურცულ სადგამებზე შეგიძლიათ დადგათ თევზისა თუ იხვის შესაწვავად განკუთვნილი წაგრძელებული ოვალური ტაფები. სადგამების დიამეტრი ჭურჭლისას უნდა დაემთხვას. სწრაფი გახურების სადგამები საჭირო ტემპერატურის მიღწევისას სითბოს მიწოდებას ამცირებს, თუმცა მოცემულ რეჟიმს ინარჩუნებს. ავტომატური სადგამები განსაზღვრავს ადუღების მომენტს და წყვეტს გახურებას. სადგამები, რომლებიც "არკვევს" ჭურჭლის რაგვარობას, ზედაპირს მხოლოდ მაშინ ახურებს, როცა მასზე ქვაბი ან ტაფა იდგმება.
ქურის შეძენის დროს იკითხეთ:
1. როგორ იწმინდება ჰაერღუმელი არჩეულ ელექტროქურაში. თანამედროვე ქურებისთვის არსებობს გაწმენდის ორი ხერხი: პიროლიზი. ჰაერღუმელი მაქსიმალურ ტეპერატურაზე ხურდება და ცხიმის ყველა ნარჩენი უბრალოდ გამოიწვება, რის შემდეგაც ისინი შიგნიდან უნდა გაიწმინდოს. თუმცა გამოწვის დროს სამზარეულოში უსიამოვნო სუნი დგება. ასეთი ქურები იმ შენობაში გამოდგება, სადაც მძლავრი გამწოვია დამონტაჟებული. კატალიზაცია. ჰაერღუმელის ზედაპირს სპეციალური მინანაქრით ფარავენ, რომელიც ცხიმს არ იწვავს. მისი გაწმენდა მხოლოდ ჩვრითაც შეიძლება. სამწუხაროდ, 6-7 წლის ექსპლუატაციის შემდეგ ასეთი ზედაპირები შესამჩნევად კარგავს თავდაპირველ თვისებებს.
2. გახურების როგორი რეჟიმი აქვს ქურის შერჩეულ მოდელს. წესისამებრ, სთავაზობენ ორმაგს, ზემოდან და ქვემოდან გახურების რეჟიმის მქონეს, კონვექციურს და ინფრაწითელს. თუ ჩვეულებრივი კერძების მომზადება გაქვთ დაგეგმილი, თქვენთვის სავსებით საკმარისი იქნება ორმაგი გახურების და, რა თქმა უნდა, გრილის ფუნქციის მქონე ქურა ფრინველისა და თევზის შესაწვავად.
3. არის თუ არა ნარჩენი სითბოს ინდიკატორი მინაკერამიკულ ზედაპირზე. ის დაგეხმარებათ დაინახოთ, ზედაპირის რომელი ზონა არ გაგრილებულა, რათა არ დაიწვათ ან სწრაფად გააცხელოთ გაგრილებული კერძი. სადგამის გახურების ავტომატური გამორთვის ფუნქციას ინფრაწითელი მრიცხველი არეგულირებს. თუ ქურას ეს ფუნქცია აქვს, შეგიძლიათ მშვიდად იყოთ: საკვები არ გადაიხარშება და არ გადმოვა - ელექტრონული მრიცხველი თვითონვე გამოურთავს ქურას ადუღებულ კერძს.