მაყვლის საწებელი
ინგრედიენტები:
- ცერეცო – 1 ღერი;
- მაყვალი – 1.5 კილო;
- ომბალო;
- მწვანე წიწაკა;
- ნიორი;
- მარილი;
- კამა;
- ქინძი;
- ნიგოზი – 5 ლებანი;
- ნუში – 5 ლებანი.
მომზადების წესი:
ერთ ღერ ცერეცოსთან ერთად მოხარშეთ მაყვალი (1,500 დაახლოებით), დაასხით ცოტა წყალი. რომ მოიხარშება, წყლის ნაწილი შეინახეთ, რომ რასაც გაუშვებს სასურველ კონდიციამდე გაათხელოთ. მოხარშვის შემდეგ, ცხელივე წვრილ საწურზე გახეხეთ. შემდეგ შეურიეთ დანაყილი ომბალო, ცოტაოდენი მწვანე წიწაკა, ნიორი, მარილი, კამა, ცერეცო, ქინძი (ამას ყველაფერს თვალის ზომით ვუკეთებ და გემოვნებით). გაუკეთეთ ძალიან ცოტა 4-5 ლებანი ნიგოზი და ამავე რაოდენობის ნუში, შემდეგ აადუღეთ. ეს ცხელი მასა ჩაასხით გასტერილებულ ქილებში (თუ მაშინვე საჭმელად გინდათ და არა შესანახად, ნუ წამოადუღებთ).
ღოღნოშოს საწებელი
ინგრედიენტები:
- მარილი და პილპილი;
- უცხო სუნელი;
- ნიორი;
- ცერეცო;
- ქინძი;
- ღოღნოშო.
მომზადების წესი:
ღოღნოშო გავრეცხე და ჩავყარე ქვაბში, თან ჩავაყოლე ჩასახარშად თითო დიდი შეკვრა აყვავებული ქინძი, ცერეცო. დავასხი წყალი და მოვთუთქე. რომ გაცივდა, გავხეხე.
ცალკე გავარჩიე და გავრეცხე თითო-თითო დიდი შეკვრა ქინძი და ცერეცო, ასევე 5 საშუალო თავი ნიორი. მწვანილი და ნიორი გავატარე ხორცსაკეპ მანქანაში. დავამატე ხმელი ქინძი და უცხო სუნელი, მარილი და წიწაკა გემოვნებით.
ვასტერილებ ქილებს, ვასხამ ქაფქაფა საწებელს და ვხუფავ. ასპირინს არასდროს ვამატებ, უბრალოდ კარგად ვასტერილებ და არასდროს ფუჭდება.
გთავაზობთ უგემრიელესი საწებლის რეცეპტს, რომელიც განსაკუთრებით უხდება ხორცს.
ინგრედიენტები:
- პომიდორი 500 გ;
- ხახვი 1 ც;
- მწვანილი 0,5 კონა;
- ოხრახუში 0,5 კონა;
- ბაზილიკი 0,5 კონა;
- ქინძი 0,5 კონა;
- ნიორი 5 კბილი;
- წითელი წიწაკა 1 ც;
- მზესუმზირის ზეთი 100 მლ;
- მარილი, შაქარი, ძმარი და შავი პილპილი _ გემოვნებით.
მომზადების წესი:
გარეცხეთ პომიდორი და დაასხით მდუღარე წყალი.
მოაცილეთ კანი და მსხვილად დაჭერით.
ხახვი დაჭერით პატარა კუბებად, ჩაყარეთ ქილაში და დაასხით ძმრიანი წყალი. ქილა შეანჯღრიეთ და დატოვეთ, რომ მარინადი მომზადდეს.
ტაფაზე დაასხით ზეთი და დააწყვეთ პომიდვრის ნაჭრები. შუშეთ, სანამ სოუსი მზად არ იქნება.
გაატარეთ ბადეში. თუ სოუსი ძალიან სქელია, გააზავეთ გადადუღებული წყლით.
წვრილად დაჭერით წიწაკა. დაუმატეთ პომიდორს მარილთან, შაქართან და ძმართან ერთად.
შუშეთ. დაუმატეთ ნიორი (გახეხილი). დააფარეთ ტაფას თავსახური და გააჩერეთ. ბოლოს დაუმატეთ წვრილად დაჭრილი მწვანილი და დამარინადებული ხახვი.
სოუსი შეგიძლიათ მაშინვე ჭამოთ ან შეინახოთ მაცივარში.
სახლში მომზადებული კეტჩუპი სულ სხვაა!
ინგრედიენტები:
- წიწაკა ჩილი, დაფქული;
- პამიდორი;
- ტკბილი წიწაკა, წითელი;
- ვაშლი;
- ხახვი;
- შაქარი;
- მარილი;
- დარიჩინი;
- მიხაკი;
- მუსკატის კაკალი (ჯავზი);
- ძმარი.
მომზადების წესი:
კეტჩუპის მომზადების მრავალი რეცეპტი არსებობს, მეტ-ნაკლები განსხვავებებით. ზოგიერთი მათგანი ვაშლის გარეშეა, ზოგში წიწაკაა ამოღებული. ამ რეცეპტში შაქრის მინიმალური დოზაა მოცემული, სურვილის შემთხვევაში შეგვიძლია მისი რაოდენობა გავზარდოთ.
კეტჩუპისთვის მწიფე, კარგი წითელი ფერის პამიდორი შევარჩიოთ. სასურველი ძალიან წვნიანი ჯიშის არ იყოს.
ვაშლს და წიწაკას ამოვაცალოთ თესლი, შემდეგ ხახვთან და პომიდორთან ერთად ხორცსაკეპ მანქანაში გავატაროთ. პიურე მოვათავსოთ ქვაბში, დავაყაროთ შაქარი, მარილი და წამოვადუღოთ. როდესაც ადუღდება, ცეცხლს დავუწიოთ. დრო და დრო ამოვურიოთ. დაახლოებით 2 საათის შემდეგ კეტჩუპი მზად იქნება, დავაყაროთ სანელებლები და გადმოვდგათ ცეცხლიდან. შეგრილებული მასა გავატაროთ საცერში, დავამატოთ ძმარი და მოვათავსოთ გასტერილებულ ქილებში ან ბოთლებში. შევინახოთ გრილ და მშრალ ადგილას.
ზოგიერთი რეცეპტით, კეტჩუპს ნიორსაც ამატებენ. თუ ასეთი კეტჩუპი მოგვწონს, შეგვიძლია ნივრის გარჩეული კბილები დაუფქველ სუნელებთან ერთად დოლბანდში გამოვკრათ და ისე ვხარშოთ, შემდეგ კი გადავაგდოთ. სანელებლების რაოდენობა გემოვნების მიხედვით განვსაზღვროთ.
თუ კეტჩუპი საკმარისად არ გასქელდა და მაინც თხელია, სახამებელი დავამატოთ. დაახლოებით 4 ს.კ. სახამებელი გავხსნათ ცოტაოდენ გაგრილებულ კეტჩუპში, ჩავამატოთ მთლიან მასას და წამოვადუღოთ.
