ნანა კალანდაძე

არსებობს ჭურჭელი, რომელშიც შეგიძლიათ მოამზადოთ სადილი, გააცხელოთ მიკროტალღოვან ღუმელში და შემდეგ კერძის დარჩენილი ნაწილი მაცივარში შედგათ (მასში საკვები შესანიშნავად ინახება). ასეთი ჭურჭელი იატაკზე დაცემის შემთხვევაშიც კი არ ტყდება. გარდა ამისა, ადვილად ირეცხება, თანაც ძალიან მოხერხებული და სასიამოვნო შესახებია. ყველა ეს ღირსება სილიკონისგან დამზადებულ ჭურჭელს ახასიათებს. რა არის სილიკონი? ეს არის ნივთიერება, რომელიც კვარცის ქვიშისგან მზადდება. რამდენიმე ქიმიური რეაქციის შემდეგ წარმოიქმნება უსუნო, პლასტიკური, თერმულად მდგრადი, ნეიტრალური ნივთიერება. სილიკონის სხვადასხვა სახეობას იყენებენ მშენებლობაში, ოპტიკაში, სილამაზის ინდუსტრიაში.

სილიკონის ჭურჭელი სამზარეულოში შეუცვლელია. ამ მასალისგან დამზადებული ნამცხვრისა და ტორტის ფორმები, რა თქმა უნდა, არ იწვის. რაც მთავარია, ასეთ ფორმებში ყველაფერი ძალიან სწრაფად მზადდება. სილიკონის ვაკუუმური თავსახურები ჰერმეტულად იცავენ საკვებს - ხელს უშლიან მასში ჰაერის შეღწევას და არც გარეთ უშვებენ ცხელ ორთქლს. ყინულისთვის განკუთვნილი ფორმები საყინულეშიც კი ინარჩუნებენ სირბილეს. იქიდან ადვილად ამოიღებთ ნაყინის ბურთულებსა თუ ბალახის ნაყენის გაყინულ ნატეხებს სახის გასაწმენდად. კიდევ ერთი სასარგებლო სიახლეა ნიჩბები და კოვზები ისეთი ჭურჭლისთვის, რომელიც მიწვის საწინააღმდეგო ფენით არის დაფარული. შიგნით მოთავსებულია ლითონის ან მაგარი პლასტიკის კარკასი, გარედან კი სილიკონის შრე, რომელიც არ კაწრავს ქვაბებისა და ტაფების ფაქიზ ზედაპირს. სილიკონის რბილი ხელთათმანი დაგიცავთ ქვაბის ცხელი სახელურისა თუ ღუმლის სიმხურვალისგან. ის არ სრიალებს, თუნდაც დაასველოთ. სილიკონის დანა შეგიძლიათ გამოიყენოთ ტორტის ან ღუმელში მომზადებული კერძის პირდაპირ ფორმაში დასაჭრელად - ის ჭურჭლის ზედაპირს არ დააზიანებს.

არსებობს მყარი სილიკონისგან დამზადებული ჭურჭელიც. მას ზოგიერთი ჩინური საწარმო აწარმოებს. ასეთი სილიკონი ადამიანისთვის საშიშია, ამიტომ კვების მრეწველობაში მისი გამოყენება აკრძალულია. ხარისხიანი სამზარეულო ნივთები მზადდება თხევადი სილიკონისგან, რომელიც გაცილებით მოქნილი და გამჭვირვალეა, ვიდრე მისი მყარი სახეობები. სხვათა შორის, მედიცინაშიც სწორედ თხევადი სილიკონი გამოიყენება. კარგ, ხარისხიან სილიკონის ჭურჭელს სუნი არ აქვს. მის შემადგენლობაში მხოლოდ ნეიტრალური საღებავები შედის. ამის შესახებ მითითებულია ნაწარმისთვის დართულ სერტიფიკატზე.

სილიკონის ჭურჭელი

ნამდვილი აღმოჩენაა ნებისმიერი დიასახლისისთვის. რატომ?

1. ის უძლებს როგორც სიცხეს, ისე სიცივეს. მასში პროდუქტები შეგიძლიათ გაყინოთ (ფორმა უძლებს -60 გრადუსამდე ტემპერატურას), მოათავსოთ მიკროტალღოვან ღუმელში ან ჰაერღუმელში (სილიკონი უძლებს +280 გრადუსამდე ტემპერატურას), ხოლო თვით ჭურჭელი უშიშრად გამოხარშოთ.

2. სილიკონის ჭურჭელი კერძს არ იწვავს. თუ დიეტაზე ხართ და ზეთსა და კარაქს არ იყენებთ, სილიკონის ფორმა თქვენთვის პირდაპირ მისწრებაა - კერძის ამოსაღებად ის უბრალოდ უნდა გადაღუნოთ.

3. არ აკავებს არანაირ სუნს. მის ზედაპირზე არ რჩება თევზისა თუ სანელებლების არომატი.

4. კარგად უძლებს მჟავებსა და ტუტეებს. სილიკონისგან დამზადებული აქსესუარები ჭურჭლის სარეცხი საშუალებების ზემოქმედებით არ იშლება. მათზე არც ხილისა და კენკრის მჟავე წვენები მოქმედებს. ეს იმას ნიშნავს, რომ საკვებში მავნე ნაერთები არ გადავა.

5. ეკოლოგიურად სუფთაა, აბსოლუტურად უსაფრთხო, რადგან სავსებით ნეიტრალური ნივთიერებაა, არ შეიცავს არავითარ მავნე კომპონენტს, არ გააჩნია შხამიანი ნივთიერებების დაგროვების უნარი.

მოვლის წესები

თქვენი საყვარელი ჭურჭელი დიდხანს რომ გემსახუროთ, საჭიროა, დაიცვათ მარტივი წესები:

1. ნუ დადგამთ ღია ცეცხლზე ან პირდაპირ ელექტროზედაპირზე.

2. ვიდრე კერძს ულუფებად გაანაწილებდეთ, ფორმიდან ამოიღეთ - დანამ სილიკონი შეიძლება ადვილად გაჭრას ან გახვრიტოს.

3. ნუ გარეცხავთ სილიკონის ჭურჭელს ფხვნილით - საამისოდ რბილი ჟელეს გამოყენება ჯობს.

4. ტორტის პირველი გამოცხობისას ფორმას ცხიმი წაუსვით. ასევე მოიქეცით ხორცის შეწვის დროსაც. მომავალში ცხიმის გამოყენება აღარ დაგჭირდებათ.