თინათინ გოცაძე

ამ საუცხოო სითხის არაერთი სამკურნალო თვისება იქნა აღმოჩენილი და გამოკვლევებით დადასტურებული.

ლუდს ფართოდ იყენებენ კოსმეტოლოგიაში.

ლუდის ორთქლი და აბაზანები მეტად სასარგებლოა არა მხოლოდ კანისთვის, არამედ მთელი ორგანიზმისთვის. თუ გაძლიერებული ოფლდენა გაწუხებთ, თბილ წყალს 2 ლიტრი ლუდი დაამატეთ და ასეთ აბაზანაში 15-20 წუთით ჩაწექით. აბანოში გავარვარებულ ქვებს ლუდს ასხამენ - მისი ორთქლი კანს ხავერდოვნებას სძენს.

ლუდით თმის დახვევა ვარცხნილობის ფიქსაციის ძველისძველი და, რაც მთავარია, ყველაზე "ეკოლოგიური" მეთოდია. დღეს ლუდის საფუძველზე არაერთი შამპუნი და თმის კონდიციონერი მზადდება.

ლუდის შეზელა, გარდა იმისა, რომ თმას განსაკუთრებულ ბზინვარებასა და ელასტიკურობას ანიჭებს, ხელს უშლის ცვენას. ამ მიზნით თბილი ლუდი კვირაში ორჯერ უნდა შეიზილოთ თმის ძირებში. ინტენსიური მასაჟის შემდეგ სასურველია თმა მთლიანად გაიჟღინთოს ლუდით, 20-25 წუთის შემდეგ კი თავზე თბილი წყალი უნდა გადაივლოთ.

თავის დაბანის შემდეგ ლუდის გადავლება რეკომენდებულია მათთვის, ვისაც ქერტლი აწუხებს. ლუდში შემავალი კომპონენტები კვებავენ თმის ძირებს, ღერებს, თავის კანს, აუმჯობესებენ ნივთიერებათა ცვლას, ხელს უშლიან ქერტლის წარმოქმნას, აჯანსაღებენ თმას, საოცარ ბზინვარებასა და ხიბლს სძენენ მას.

გთავაზობთ თმის მოვლის რამდენიმე რეცეპტს:

• კარგად ათქვიფეთ კვერცხი და თავის დაბანამდე ნახევარი საათით ადრე შეიზილეთ თმის ძირებში.
• მშრალი თმისთვის რეკომენდებულია დაბანის შემდეგ თაფლიანი წყლის გადავლება: ერთ ჭიქა წყალს ერთი სადილის კოვზი თაფლი უნდა შეურიოთ. თაფლი არბილებს თმას და ხელს უწყობს ტენის შენარჩუნებას.
• ცხიმიან თმაზე დაბანის შემდეგ სასურველია ლიმონიანი წყლის გადავლება (ერთი ლიმონის წვენი ერთ ჭიქა წყალზე).
• ქერტლის მოსაცილებლად შეათბეთ ზეითუნის ან ქოქოსის ზეთი, შეიზილეთ თმის ძირებში და მთელი ღამით დაიტოვეთ. დილით შეიზილეთ ლიმონის წვენი და 30 წუთის შემდეგ კარგად დაიბანეთ სუფთა წყლით.
• მტვრევადი, მშრალი და დაზიანებული (ფენისა და ხშირი ღებვისგან გაუხეშებული) თმისთვის რეკომენდებულია ასეთი ნარევი: აიღეთ ერთი ჭიქა თაფლი, ნახევარი ჭიქა ზეითუნის ან შირბახტის ზეთი და 3 სადილის კოვზი ლიმონის წვენი, კარგად აურიეთ, შეიზილეთ თმაში და დილამდე დაიტოვეთ. ნარევი თავდახურულ ჭურჭელში შეინახეთ. ყოველი დაბანის წინ ინტენსიური მასაჟით შეიზილეთ თმის ძირებში, დაიხურეთ პოლიეთილენის ქუდი, 2 საათს გაიჩერეთ და შემდეგ კარგად დაიბანეთ შამპუნით. ამ პროცედურის რეგულარულად ჩატარება თმას აჯანსაღებს.
• ნამდვილი ინა თმის საუკეთესო ბუნებრივი კონდიციონერია. ის ამაგრებს და კვებავს თმის ძირებს, არბილებს, ელასტიკურობას, ბზინვარებასა და პეწს ანიჭებს ღერებს. ინის ფხვნილს დაამატეთ 2 ს/კ ლიმონის წვენი, 2 კვერცხი და ცოტაოდენი ხაჭო. მიღებული მასა წაისვით თმაზე, 30 წუთს გაიჩერეთ და გულდასმით ჩამოიბანეთ.
• სასურველია, დაბანის შემდეგ თმაზე ულუმბოს თესლის ნაყენი გადაივლოთ (მცენარის თესლი წყალში მთელი ღამით გააჩერეთ, დილით კი გადაწურეთ). კარგია საათას ყვავილების ნაყენიც. სასურველია, წყალში ჩაყრამდე ყვავილები ხელით დააქუცმაცოთ. თუ გრილ წყალში ჩაყრით, მთელ ღამეს დატოვეთ, თუ ცხელში - 3-4 საათს. ნაყენის გადაწურვისას გაფუებული ყვავილები კარგად გამოწურეთ.