თუ ბავშვი გულძმარვას უჩივის
შემწვარი საკვების მიღების შემდეგ. რისი ბრალი უნდა იყოს ეს ან როგორ მოვიქცე?
გულძმარვა ერთ-ერთი ნიშანია გასტრიტისა - კუჭის ლორწოვანი გარსის ანთებისა, რომელიც გაზაფხულობით მწვავდება. გულძმარვას იწვევს საკვების კუჭიდან უკან, საყლაპავში გადასროლა. დისკომფორტი წარმოიშობა, როცა საყლაპავის ქვედა ნაწილში კუჭის მჟავე შიგთავსი ხვდება. ასეა, მაგალითად, მომატებული მჟავიანობით მიმდინარე გასტრიტის დროს, ასევე - მაშინ, როცა პატარა მჟავე ხილის - ფორთოხლის, ლიმონის, ბროწეულის - წვენს მიირთმევს.
არ დაალევინოთ ბავშვს გაუზავებელი მჟავე ხილის ან ციტრუსის წვენი. აუცილებლად გააზავეთ ადუღებული წყლით, პროპორციით 1:1 ან 1:2.
რა ხდება ამ დროს
/* (c)AdOcean 2003-2021, Advertline.https:mkurnali.ge.mkurnali zones.________ _____ */
ado.slave('adoceanadvertlinegelpmmhkfobb', {myMaster: 'gC_g7BxQlx9UWDeCK7yaEdkgIoxg2l6o6JUmNs2rvgn.i7' });
კუჭის მჟავე შიგთავსი აღიზიანებს საყლაპავის ლორწოვანს და იწვევს ანთებით პროცესს - რეფლუქს-ეზოფაგიტს. ამ დროს ბავშვის კვება ძნელდება, ყლაპვა მტკივნეული ხდება, რადგან ჩაყლაპული საკვები მექანიკურად აღიზიანებს ანთებით დაზიანებულ საყლაპავის ქვედა ნაწილს.
დაბალი მჟავიანობით მიმდინარე გასტრიტის დროს რეფლუქსი ანუ საკვების კუჭიდან საყლაპავში გადმოსროლა შეიძლება დღეში რამდენიმეჯერ მოხდეს, მაგრამ ბავშვს ტკივილის, წვის, გულძმარვის შეგრძნება არ აქვს.
რეფლუქსს მხოლოდ პროფილაქტიკური გასინჯვის დროს აღმოაჩენენ.
საჭიროა თუ არა დიეტა
მშობლებს, განსაკუთრებით - მამებს, უხარიათ, როცა ბავშვს სუფრასთან გვერდით მოისვამენ და ისიც სტუმრებთან ერთად შეექცევა "დიდების" საჭმელს. ამ შემთხვევაში პატარას გულძმარვა გარანტირებული აქვს. უსიამოვნო შეგრძნებებს იწვევს აგრეთვე ახალი თეთრი პურის ბუტერბროდი, კიტრის, პომიდვრის, კომბოსტოს მწნილი, ძეხვის თუნდაც პატარა ნაჭერი, ბეკონთან ერთად შემწვარი კარტოფილი, კვერცხი. ასე რომ, ეცადეთ, არ გადაუტვირთოთ ბავშვს კუჭ-ნაწლავი ასაკისთვის შეუფერებელი საკვებით.
ყველას უყვარს შოკოლადი
კაკაო, შოკოლადი და გაზიანი სასმელები იწვევს სფინქტერის (საყლაპავისა და კუჭის გამყოფი კუნთოვანი შრე) მოდუნებას, რის შედეგადაც კუჭის წვენი ადვილად გადადის საყლაპავში, აღიზიანებს ისედაც დაზიანებულ ლორწოვანს და იწვევს გულძმარვას. გირჩევთ, ბავშვს კაკაო მხოლოდ რძიანი დაალევინოთ, ხოლო შოკოლადი და გაზიანი სასმელები სამ წლამდე საერთოდ არ არის რეკომენდებული.
ხველა და გულძმარვა
რა კავშირი შეიძლება ჰქონდეს ერთმანეთთან ხველას და გულძმარვას? ყველა ვირუსული ინფექცია, რომელსაც თან სდევს ხველა, აძლიერებს დისკომფორტს. დიაფრაგმის შეკუმშვის შედეგად წარმოიქმნება ხველითი ბიძგები; დიაფრაგმის შეკუმშვას თან სდევს კუჭის წვენის გადმოსროლა საყლაპავ პარკში.
ხველა რომ შევამციროთ და პატარას თავიდან ავაცილოთ გულძმარვა, უნდა მივცეთ ნახველის გამათხიერებელი პრეპარატები, ვასვათ პიტნის, ბარამბოს ან სალბის თბილი ჩაი, ჩავუტაროთ არომათერაპიის სეანსები ამავე მცენარეებისა და ლიმონის ეთერზეთებით, გავუკეთოთ ინჰალაციები.
როგორ მოვიქცეთ გულძმარვის დროს?
კუჭის წვენი უმთავრესად მარილმჟავასგან შედგება. მასში ჭარბი მარილმჟავა რომ არ დაგროვდეს, ჭამიდან ჭამამდე 2,5-3,5 საათი უნდა გავიდეს. კუჭის წვენს კუჭში გადასამუშავებელი საკვები უნდა დახვდეს, თორემ ჭარბად დაგროვდება და ლორწოვანს გააღიზიანებს. თუ გამოუვალი მდგომარეობაა და ბავშვს შინ ვერ ასადილებთ, თან იქონიეთ საბავშვო ორცხობილა (პეჩენია), ვაშლი ან ბანანი. ჭამის შემდეგ წამოწოლა რეკომენდებული არ არის - წოლისას საკვები უკან უფრო ადვილად გადმოედინება. პირიქით, ბავშვი ხუთი წუთით დააყენეთ კედელთან, ხელები მაღლა ააწევინეთ ან თავს უკან შემოაწყობინეთ. ეს პოზა ხელს უწყობს საყლაპავის სფინქტერის მყარად დაკეტვას.
გულძმარვამ შეიძლება შეაწუხოს ბავშვი აქტიური მოძრაობის, თამაშის დროსაც. ამ დროს კუჭში იმატებს წნევა, რაც შიგთავსის საყლაპავისკენ გადმოსროლას უწყობს ხელს. ამიტომ ბავშვმა აქტიური თამაში ან ვარჯიში უნდა დაიწყოს ჭამიდან არანაკლებ ნახევარი საათის შემდეგ.
ასე რომ, კვებისა და დღის რეჟიმის მართებულად ორგანიზებით პატარას გულძმარვა შეიძლება თავიდან ავაცილოთ, მაგრამ ექიმს მაინც მიმართეთ - გულძმარვა ხომ გასტრიტის ერთ-ერთი ნიშანია.
