ახალი მამა
ძალიან მეშინია, რომ ჩემი შვილი ახალ მამას ვერ შეეწყობა.
როცა ცოლ-ქმარი ერთმანეთს შორდება, როგორც წესი, ქალი ბავშვით ხელში მარტო რჩება. ბევრი თავის ბედნიერებას მსხვერპლად სწირავს შვილის მოჩვენებით სიმშვიდეს, მაგრამ ფსიქოლოგებმა დიდი ხანია დაადგინეს, რომ მარტოხელა და უბედური დედა ბავშვისთვის უფრო დიდი პრობლემაა, ვიდრე მამინაცვალთან ურთიერთობისას თავჩენილი სირთულეები. მით უმეტეს, ამ სირთულეთა მოგვარება შესაძლებელია.
უპირველეს ყოვლისა, ნუ ეცდებით, ყოფილი ქმარი ბავშვის თვალში დაამციროთ და შეურაცხყოთ. ნურც იმას შთააგონებთ შვილს, რომ მას ახლა ახალი მამა ჰყავს. ეს არავითარ შემთხვევაში არ შეიძლება! ამით თქვენ ძლიერ დარტყმას მიაყენებთ პატარას შინაგან სამყაროს. რა თქმა უნდა, ეს არ ეხება ისეთ შემთხვევებს, როცა ნამდვილი მამის დავიწყება მიზეზთა გამო ბავშვისთვის უმჯობესიც კია, მაგრამ ასეთი სიტუაციები, საბედნიეროდ, იშვიათია.
გენეტიკურ მამას ბავშვის ცხოვრებასა და, რაც მთავარია, მის ცნობიერებაში თავისი ადგილი უნდა ეკავოს. ნურც იმას მოსთხოვთ, ცოტა ხნის წინ გაცნობილ მამაკაცს მამა დაუძახოს - ეს სამართლიანი არ იქნება. გარდა ამისა, წოდება "მამა" თავის დაღს აჩნევს ურთიერთობას და აიძულებს მამინაცვალს, საკუთარ თავზე აიღოს პასუხისმგებლობა, რომლისთვისაც შესაძლოა არც კი აღმოჩნდეს მზად.
ნუ აჩქარდებით და ბავშვთან შეუთანხმებლად ნურაფერს გააკეთებთ. ვიდრე ერთად ცხოვრებას გადაწყვეტთ, რაც შეიძლება მეტი დრო გაატარეთ ერთად. იფიქრეთ არა მხოლოდ ერთობლივ დასვენებაზე, არამედ ერთობლივ საქმიანობაზეც. სთხოვეთ თქვენს საქმროს, ბავშვი ბაღიდან ან სკოლიდან გამოიყვანოს, დაეხმაროს მეგობრისთვის საჩუქრის შერჩევაში, მასთან ერთად რაიმე შეაკეთოს და ა. შ. ამით მომავალ მამასაც გამოცდით - თქვენ ხომ არ გჭირდებათ მამაკაცი, რომელიც ბავშვის მიმართ გულგრილი იქნება?
თუ თქვენს რჩეულს საკუთარი ბავშვები არ ჰყავს, ალბათ ვერც კი წარმოუდგენია, რა სირთულეები ელის. აქ კი თქვენ უნდა იყოჩაღოთ, განაწყოთ ის ცვლილებებისთვის, ყველაფერი თანდათანობით, ძალდაუტანებლად აუხსნათ. ბავშვს აუცილებლად აგრძნობინეთ, რომ თქვენთვის ძალიან მნიშვნელოვანია მისი აზრი საყვარელ ადამიანზე, მაგრამ ნუ აჰყვებით მის შფოთვასა და ჭირვეულობას. აუხსენით, რომ დედას მამაკაცის თანადგომა, სითბო და სიყვარული სჭირდება, მისი მამა, სამწუხაროდ, ასეთი მამაკაცი არ აღმოჩნდა და ვეღარც გახდება, თქვენ კი ერთად ძალიან მხიარულად იცხოვრებთ.
აცადეთ ბავშვს თქვენი სიტყვების გაცნობიერება, მიეცით დაფიქრებისა და სიტუაციის გააზრების საშუალება. ის სათანადოდ უნდა მოემზადოს ცხოვრების ახალი ეტაპის დასაწყებად. ეს მოსამზადებელი პერიოდი ბავშვს უამრავ კითხვას გაუჩენს. თუნდაც არაფერი გკითხოთ, ეს იმას არ ნიშნავს, რომ მას კითხვები არ აქვს. მაქსიმალური ყურადღება გამოიჩინეთ, როგორმე ათქმევინეთ, რა აფიქრებს და აწუხებს, ნუ მისცემთ საშუალებას, საკუთარ თავში ჩაიკეტოს - ეს შემდგომ ნევროზში გადაიზრდება.
წარმოიდგინეთ საკუთარი თავი შვილის ადგილას და ეცადეთ, ამ პერიოდში ის თქვენი ყურადღებით იყოს გარემოცული. როგორც არ უნდა გაგიჭირდეთ, უფრო მეტი დრო გაატარეთ მასთან ერთად, წიგნები უკითხეთ, ეთამაშეთ, ახატვინეთ - ყოველივე ეს ბავშვს სტრესს მოუხსნის და პოზიტიურ განწყობას შეუქმნის. რა თქმა უნდა, მამინაცვალს სხვადასხვა ასაკში სხვადასხვანაირად ხვდებიან, მაგრამ თუ ოჯახში არის სიყვარული და პატივისცემა, ნებისმიერი დაბრკოლების გადალახვა შეიძლება.
ფსიქოლოგთა რჩევები მამაკაცებს
არ შეიძლება, მამაკაცმა დაიკავოს ავტორიტარული პოზიცია, მაშინაც კი, როცა ბავშვი გაუგონარი და ცელქია. ეს მხოლოდ გაართულებს სიტუაციას. ავტორიტეტი უნდა მოიპოვოთ თვეობით, წლობით, სიკეთით, სიყვარულით. სასურველია, ბავშვი ჩართოთ რთული საკითხების გადაწყვეტაში, მოაწყოთ ოჯახური საბჭო, აჩვენოთ, რომ მისი აზრი მნიშვნელოვანია.