ლალი ჩხიკვაძე

დასვენებამ სასიამოვნო შთაბეჭდილებები რომ დაგვიტოვოს და ზაფხულის სამი თვე უსიამოვნებამ არ გაგვიუფერულოს, ადრევე უნდა ვიფიქროთ ბავშვების უსაფრთხოებაზე. ზაფხული საუკეთესო დროა იმისათვის, რომ ბავშვებს ასწავლოთ მცენარეების, ხილისა და კენკრის სახელები. თუ საკუთარი ნაკვეთი გაქვთ, შეეცადეთ, იქ არაფერი იყოს ბავშვისთვის მავნებელი. ბავშვებმა შეიძლება ლამაზი შეფერილობის ნაყოფი, რომლის ჭამაც არ შეიძლება, პირში ჩაიდონ. ნებისმიერ შემთხვევაში, დაუწესეთ, რომ პირში არაფერი ჩაიდოს.

მწერებისგან დაცვა

ბოტანიკის გარდა, ზაფხულში თვალნათლივ შეიძლება ზოოლოგიის შესწავლაც. აუხსენით ბავშვს, რომ ფუტკართან და ბზიკთან ახლოს ხელების ქნევა არ შეიძლება. არ შეიძლება მკვეთრი სუნის მქონე საპნის ან ძლიერი არომატის საბავშვო კოსმეტიკის ხმარება, მწერები ტკბილი სუნებით რომ არ მივიზიდოთ. საშიში მწერებისგან თავდასაცავად, შეარჩიეთ ბავშვისთვის ნებადართული ნატურალური კომპონენტების რეპელენტი და გამოიყენეთ ინსტრუქციის შესაბამისად.

მზისგან დაცვა

ბავშვს რაც შეიძლება ადრე უნდა ახმაროთ მზისგან დამცავი კრემი, აუხსნათ რისთვისაა ის საჭირო და რამდენად ხშირად უნდა გამოიყენოთ. კრემის წასმის მიუხედავად, არ დაგვავიწყდეს თა­ვსაბურავი და ქოლგა პლაჟზე თამაშისას. არ გაიყვანოთ ბავშვი მზეზე აქტიური მზის პერიოდში (10:00-17:00-მდე).

წყალში ცურვა სასურველი მხოლოდ უფროსის ზედამხედველობით

მაშინაც კი, თუ ბავშვი კარგად ცურავს, სპეციალური ჟილეტი ან რგოლი უკეთია, უფროსი აუცილებლად ყურადღებით უნდა ადევნებდეს მას თვალს. ასე გააკონტროლებთ, ცურავს თუ არა უსაფრთხო და სპეციალურად გამოყოფილ ადგილას.

დამცავი ტანსაცმელი

ველოსიპედით, გორგოლაჭებითა თუ სკეიტბორდი სიარულისას ბავშვმა აუცილებლად უნდა გამოიყენოს შლემი და ტრამვისგან დამცავი სხვა საშუალებები. სპეციალური აღჭურვილობის მოხმარება აუცილებელ წესად უნდა იქცეს.

უსაფრთხო სათამაშო მოედნები

ვიდრე ბავშვს საქანელაზე დასვამთ, დავრწმუნდით, რომ სამაგრები მყარია, დასაჯდომი სწორი და გლუვი, ლურსმნებისა და ხიჭვების გარეშე. პარკში ატრაქციონები უნდა შეარჩიოთ ასაკობრივი თავისებურებების გათვალსიწინებით. არ უნდა დაგავიწყდეთ ბავშვისთვის ატრაქციონზე ქამრის შეკვრა. ბატუტზე ხტომისას უფროსი გვერდით უნდა იყოს. განსაკუთრებით საყურადღებოა, ბატუტზე ერთდროულად რამდენიმე ბავშვის ხტუნაობა. გასათვალისწინებელია, რომ სათამაშო კონსტრუქციების ლითონის ნაწილები შეიძლება ძალიან გაცხელდეს და ვიდრე სასრიალოზე დაეშვებით, დავრწმუნდით, რომ ზედაპირი ცხელი არ არის.

ჭამის წინ ხელების დაბანა, ხილისა და ბოსტნეულის კარგად გარეცხვა

ინფექციისა და „ჭუჭყიანი ხელების დაავადებების“ თავიდან ასაცილებლად ბავშვებს უნდა შეასწავლოთ ჰიგიენის მარტივი წესები, ასევე თან უნდა იქონიოთ სველი ხელსახოცები, იმ შემთხვევისთვის, თუ წყალი ახლოს არ აღმოჩნდება. ზაფხულში განსაკუთრებით უნდა მოერიდოთ მალფუჭებადი პროდუქტების მიღებას და არ შეინახოთ ისინი ოთახის ტემპერატურაზე.

ამინდის და სიტუაციის გათვალისწინებით ჩაცმა

ცხელი ამინდისთვის უნდა შეარჩიოთ ნატურალური ქსოვილის ტანსაცმელი. ტყეში უნდა ჩაიცვათ გრძელსახელოებიანი სამოსი, შარვალი და დახურული ფეხსაცმელი, რათა თავი დაიცვათ მწერების ნაკბენისაგან.

წვიმის დროს უსაფრთხო თავშესაფარი

მაშინაც კი, თუ ბავშვს არ ეშინია ხმაურის, ჭექა-ქუხილის, უნდა აუხსნათ, რა საშიშროების შემცველია ადამიანისთვის ჭექა-ქუხილი ღია სივრცეში და რამდენად აუცილებელია ამ დროს შენობაში ყოფნა.

საკმარისი რაოდენობის წყლის მიღება

ბავშვს თან უნდა ჰქონდეს თავისი ჩანთა წყლით სავსე ბოთლით. აქტიური თამაშისას, წყალი უნდა მიიღოს ყოველ 15-20 წუთში. განსაკუთრებით ცხელ დღეებში ზედმეტი არ იქნება სხეულზე საფრქვევით თერმული ან ჩვეულებრივი წყლის შესხმა. სასურველია, რომ სახლიდან გამოსვლისას, უფროსებს ჩანთით ჰქონდეთ სტანდარტული ზაფხულის ნაკრები: წყალი, მზისგან დამცავი კრემი, მინი-აფთიაქი, ქუდი და მსუბუქი საჭმელი. თუკი აუცილებელი საგნები ხელთ გექნებათ, უფროსებიც და ბავშვებიც ზაფხულს სასიამოვნოდ გაატარებთ.