ნანა კალანდაძე

ვერაფრით იტყვი, რა შეიძლება ჩაიდინოს ასეთმა ბავშვმა ამა თუ იმ მომენტში. ისღა დაგვრჩენია, მათ საქციელზე სწორად რეაგირება ვისწავლოთ.

• ინდიგო-ბავშვს წუთითაც კი არ შეუძლია მშვიდად ჯდომა. ეს ცუდი აღზრდის კი არა, მათი შინაგანი აღქმის თავისებურებების ბრალია. ისინი ადვილად სწვდებიან ნებისმიერი მოვლენისა თუ საგნის არსს და არ ესმით, რატომ ვერ ახერხებენ ამას სხვები. იოლად ითვისებენ განსაზღვრულ ინფორმაციას, მალევე კარგავენ მისდამი ინტერესს და წინ, ახალი ცოდნის შესაძენად მიისწრაფიან. ჩვენი, უფროსების ამოცანაა, მივცეთ პატარას ენერგიას სწორი და უსაფრთხო გეზი.
• ინდიგო-ბავშვები თავს ლიდერებად მიიჩნევენ, ჯიუტები არიან და ყველაფერს იღონებენ, რომ თავისი გაიტანონ. ნუ მოახვევთ თავს თქვენს აზრს, მაგრამ ნურც დაემორჩილებით. ბავშვმა შესაძლოა გაიზიაროს თქვენი აზრი, თუ მას სათანადოდ დაუსაბუთებთ.
• ინდიგო-ბავშვებს გამძაფრებული აქვთ სამართლიანობის გრძნობა. ისინი მყისვე ხვდებიან სიცრუეს და არ პატიობენ. ასე რომ, მათთან ზედმიწევნით გულწრფელი უნდა იყოთ.
• ერთდროულად იწყებენ რამდენიმე საქმეს. დააკვირდით, რომელი საქმიანობა აინტერესებს ყველაზე მეტად, მიანიჭეთ სრული შემოქმედებითი თავისუფლება - იქნებ სწორედ ეს გატაცება იქცეს მისი ცხოვრების მთავარ საქმედ.
• არსებობს კიდევ ერთი პრობლემა: ბევრი ვუნდერკინდი ცუდად ითვისებს სასკოლო პროგრამას. ამ შემთხვევაში საუკეთესო გამოსავალი ინდივიდუალურად მომზადებაა.