სტუმრად მივდივართ!
მაგრამ ბავშვი ხომ მთელ სიამოვნებას ჩაგამწარებთ, მასპინძლებსაც შეაწუხებს და არც თქვენ მოგცემთ გართობის საშუალებას...
სინამდვილეში შეუძლებელი არაფერია. პატარა სულაც არ შეგიქმნით დაბრკოლებას ახლობლებთან, მეგობრებთან ურთიერთობისას. მთავარია მონდომება, თორემ პატარასთან ერთად შეიძლება ნაცნობ ოჯახში ღამითაც კი დარჩეთ.
მოდი, ერთად გავარკვიოთ, რას გულისხმობს ამ შემთხვევაში სიტყვა "მონდომება".
დედები, რომლებიც პატარა ბავშვთან ერთად მხოლოდ ეზოში ჩადიან და სახლთან ახლოს მდებარე მაღაზიას ეწვევიან ხოლმე, პირობითად შეიძლება ორ კატეგორიად დავყოთ. მათ ერთ ნაწილს საერთოდ არ უჩნდება მოთხოვნილება, საკუთარი შვილის გარდა ვინმეს ესაუბროს; არიან ისეთებიც, რომელთაც ძალიან უნდათ, ცოტა ხნით მაინც დასხდნენ მეგობრებთან, ფინჯანი ყავა ან ჩაი მიირთვან, მაგრამ ეშინიათ. ეშინიათ, ახლობლების თვალში ცუდი დედის შთაბეჭდილება არ დატოვონ, გაკიცხვა არ დაიმსახურონ - როგორ შეიძლება, ქალს, რომელსაც ჩვილი ბავშვი ჰყავს, საკუთარი შვილის გარდა რაიმე აინტერესებდეს?! ეშინიათ, რომ თუ პატარასთან ერთად სტუმრად ივლიან, შესაძლოა, ბავშვს რამე დაემართოს, რეჟიმი დაერღვეს... თქვენ წარმოიდგინეთ, ეშინიათ იმ დედებსაც, რომლებიც სტუმრად არ დადიან და არც ამის სურვილი აქვთ - ეშინიათ, რომ პატარა ხალხთან ურთიერთობას ვერ მიეჩვევა. მაინც როგორ მოვიქცეთ - წავიდეთ ჩვილთან ერთად სტუმრად თუ არა?
სპეციალისტებს მიაჩნიათ, რომ უნდა მოვიქცეთ ისე, როგორც გვსურს. ცნობილია, რომ ის ბავშვები, რომლებიც სიცოცხლის პირველ წელს "სტუმრად" მხოლოდ ექიმთან დადიოდნენ, სულაც არ ყალიბდებიან საკუთარ თავში ჩაკეტილ და დათრგუნულ პიროვნებებად. უნდა ვაღიაროთ, რომ იმ დედების რიცხვი, რომელთაც მეგობრებთან ურთიერთობას მთელი დღე შვილთან ყოფნა და სამზარეულოში ფუსფუსი ურჩევნიათ, მცირეა. სავსებით ნორმალურია, რომ ახალგაზრდა ქალს საფენების გამოცვლასა და პატარას კვებაზე ფიქრს დროდადრო თანატოლებთან ურთიერთობა და მოდის უკანასკნელი ტენდენციების განხილვა ერჩივნოს. შეიძლება, პატარა ცოტა ხნით ბებიას ან ძიძას დავუტოვოთ, თუმცა არსებობს ალტერნატიული ვარიანტიც - შვილი თან წავიყვანოთ.
არიან დედები, რომელთაც ბავშვი სტუმრად ერთი თვიდან დაჰყავთ. ისინი ჯერ კიდევ ორსულობისას ადგენენ გეგმას, როგორ მოახდინონ შვილის "ჩართვა სოციუმში". ასეთი ქალები ხვდებიან, რომ თუ საზოგადოებაში აქტიურად არ იქნებიან ჩართულნი, დეპრესიაში ჩავარდებიან, დეპრესიაში მყოფი დედა კი შვილს ნამდვილად ვერ გაზრდის. ასეთი ქალების შვილები სიცოცხლის პირველ თვეს შინ ატარებენ, მერე კი იწყება ვიზიტები...
მრავალ დედას მიაჩნია, რომ პატარასთან ერთად სტუმრად სიარული სულაც არ არის რთული; მთავარია, ბავშვს მოხერხებულად ეცვას. კარგი იქნება, გვქონდეს სპეციალური ჩანთაც მის გადასაყვანად. თუმცა აუცილებელია რამდენიმე პირობის დაცვაც:
საკუთარი ავტომობილი ან ტაქსი გამოძახებით. თვეების პატარას ავტობუსით ტარება არ არის სასურველი.
- გამოსაცვლელი ტანსაცმელი და პამპერსები - შეუძლებელია იმის პროგნოზირება, რამდენ პამპერსს დასვრის პატარა, რამდენჯერ წამოაქაფებს ან როდის ჩაყოფს ხელს სალათის თეფშში, ამიტომ უმჯობესია, ტანსაცმელი და საფენები სათანადო რაოდენობით მოიმარაგოთ.
- თბილი წყალი და ელექტრობა - ეს ყველაფერი ჩვილის დედას ძალიან სჭირდება. თუ იქ, სადაც მიემგზავრებით, ეს ყოველივე არ გექნებათ, სველი ხელსახოცები მოიმარაგეთ.
- მამა ან სხვა თანმხლები პირი - სტუმრად ყოფნისას პატარასთან მონაცვლეობით იმორიგევებთ.
- ოჯახში, სადაც პატარასთან ერთად მიდიხართ, არავითარ შემთხვევაში არ უნდა ეწეოდნენ.
- პირველი სტუმრობა ხანგრძლივი არ უნდა იყოს. არ არის გამორიცხული, მასპინძელთაგან რომელიმეს გაუჩნდეს სურვილი, ბავშვს ცოცხალ თოჯინასავით მოექცეს. რა თქმა უნდა, ეს დაუშვებელია.
- უმჯობესია ვიზიტისთვის ისეთი დრო შეარჩიოთ, რომ პატარას ეძინოს. ასე თქვენც უფრო მშვიდად იქნებით და ისიც. მით უმეტეს, რომ 2-4 თვის ბავშვს დღის უმეტესი ნაწილი სძინავს.
ღირს თუ არა ბავშვთან ერთად სტუმრად წასვლა? - ამის გასარკვევად უპასუხეთ ქვემოთ მოყვანილ შეკითხვებს:
- ჯანმრთელია თუ არა თქვენი ბავშვი? თუ პასუხი უარყოფითია, შემდგომი შეკითხვები აზრს კარგავს. ვიზიტი უნდა გადაიდოს.
- შეძლებთ თუ არა, პატარა მანქანით წაიყვანოთ და შინ ასევე დააბრუნოთ?
- მეტისმეტად ბევრი ხალხი ხომ არ დაგხვდებათ ან მეტისმეტი ხმაური ხომ არ იქნება?
- რამდენ ხანს აპირებთ სტუმრად დარჩენას? ოპტიმალურია არა უმეტეს სამი საათისა.
- როგორი რეაქცია აქვს თქვენს შვილს უცხო ადამიანების დანახვისას? სიამოვნებს თუ არა ყურადღების ცენტრში ყოფნა?
- აქვთ თუ არა მასპინძლებს საშუალება, გამოგიყონ ოთახი, სადაც პატარას აჭმევთ ან დააძინებთ?
- ახლა კი პლუსები და მინუსები დააჯამეთ და შესაბამისად იმოქმედეთ.
თუ წასვლა გადაწყვიტეთ, არ დაგავიწყდეთ აუცილებელი ნივთების წაღება. ესენია:
- პამპერსები;
- საკვები, წყალი;
- ტანსაცმელი;
- საწოვარა;
- სათამაშო;
- ერთჯერადი ცხვირსახოცი;
- სველი ხელსახოცები.