საჭირო ღილაკი!
6 წლამდე ასაკის ბავშვებისთვის კომპიუტერთან ურთიერთობის ხანგრძლივობა 20 წუთს არ უნდა აღემატებოდეს.. 7-8 წლის ბავშვებისთვის ეს დრო შეიძლება დღეში 30-40 წუთამდე გავზარდოთ.. 9-დან 11 წლამდე ასაკის ბავშვებისთვის კომპიუტერთან ყოფნის ხანგრძლივობა არ უნდა აღემატებოდეს 1-1,5 საათს.
წინასწარ მოელაპარაკეთ შვილს რეგლამენტის შესახებ. მაშინ პრობლემა "როგორ ავაგლიჯოთ ბავშვი კომპიუტერს" თქვენს წინაშე აღარ დადგება. რაც მთავარია, აუხსენით ბავშვს, რატომ არის მავნებელი კომპიუტერთან დიდხანს ჯდომა, როგორ გავლენას ახდენს ის თვალებზე. რამდენადაც კომპიუტერთან ურთიერთობისას მთავარი პრობლემა მხედველობითი დატვირთვაა, იზრუნეთ იმაზე, რომ პატარას თვალები კომფორტულ მდგომარეობაში იყოს:
- გაასწორეთ მონიტორის სიმკვეთრე და კონტრასტულობა;
- უზრუნველყავით ეკრანის განახლების მაქსიმალური სიხშირე (100 ჰერცი და მეტი);
- კომპიუტერის მაგიდაზე მოათავსეთ სურათი მშვიდი ტონებით. სასურველია მწვანე ფერის სიჭარბე, რადგან ეს ფერი საგრძნობლად ამცირებს მხედველობით დაძაბულობას.
არ დაგავიწყდეთ თვალების ვარჯიში - ის მარტივია და პატარებისთვისაც კი იოლი შესასრულებელია. შეასწავლეთ ბავშვს ზოგიერთი ვარჯიში. ისინი მან დამოუკიდებლად უნდა შეასრულოს კომპიუტერთან დაჯდომიდან 10 წუთის შემდეგ და ადგომისთანავე. მაგალითად, სასარგებლოა ამგვარი ვარჯიში თვალებით: ზემოთ-ქვემოთ, მარჯვნივ-მარცხნივ, შემდეგ კი წრიული მოძრაობა თვალის კაკლებით, ჯერ საათის ისრის მიმართულებით, შემდეგ კი საათის ისრის საწინააღმდეგოდ. თითოეული ვარჯიში სრულდება 6-8-ჯერ.
"სროლების" გარეშე!
აუცილებლად ესაუბრეთ ბავშვს იმაზე, რომელი კომპიუტერული თამაშებია უფრო მეტად მისაღები, რომელს უნდა მიანიჭოთ უპირატესობა. "სასროლები" სისასტიკით გამოირჩევა, ამიტომ ჯობს, მათ თავი არიდოთ. ასეთი თამაშები ბავშვებში აგრესიას აღვიძებს. საუკეთესო არჩევანია ასაკის შესატყვისი შემეცნებითი, სასწავლო და განმავითარებელი თამაშები. რათა დარწმუნდეთ, რომ ესა თუ ის თამაში ბავშვისთვის ნამდვილად სასარგებლოა, მასთან ერთად გაიარეთ რამდენიმე ეტაპი.
წარმოდგენა, რომ კომპიუტერი მავნე გამოსხივების წყაროა, უსაფუძვლოა. თანამედროვე მოდელები აღჭურვილია საიმედო დამცავი საშუალებებით და ჰიგიენური მოთხოვნების დაცვის შემთხვევაში ჯანმრთელობას არ ვნებს, სარგებლობა კი გონივრული მიდგომის შემთხვევაში საგრძნობი იქნება. კომპიუტერთან მუშაობა ავითარებს მეხსიერებას და ყურადღებას, ლოგიკურ და აბსტრაქტულ აზროვნებას, ხელების მცირე მოტორულ მოქმედებას.
- თუ კომპიუტერს აღვიქვამთ როგორც სხვადასხვა ამოცანის გადასაჭრელ ინსტრუმენტს და არა როგორც სათამაშოს, მაშინ ბავშვი მასზე ფსიქოლოგიურად დამოკიდებული არ გახდება. დღეს კომპიუტერული განათლება ისევე აუცილებელია, როგორც ასოებისა და ციფრების ცოდნა.
- კომპიუტერი კუთხეში დადგით, რათა გამოსხივება მონიტორის უკანა მხრიდან და გვერდებიდან კედლებისაკენ იყოს მიმართული.
- ყოველდღე დაალაგეთ ოთახი სველი წესით და გაანიავეთ.
- კომპიუტერთან მუშაობის დაწყებამდე და დამთავრების შემდეგ ეკრანი სპეციალური ხელსაწმენდით გაწმინდეთ.
პირადი სივრცე
- სათანადოდ მოაწყვეთ ბავშვის სამუშაო ადგილი. როცა ბავშვი მაგიდასთან ზის, მისი კიდე მკერდის დონეზე უნდა იყოს, ფეხები ჩამოკიდებული კი არ უნდა ჰქონდეს, არამედ სწორი კუთხით ედგას ხარიხაზე.
- სკამი აუცილებლად ზურგიანი უნდა იყოს. უმჯობესია, სამუშაო სავარძელი შეიძინოთ. დასაჯდომისა და საზურგის სიმაღლის რეგულირება სხეულის ზომების გათვალისწინებით უნდა ხდებოდეს. დასაჯდომი ადგილი ღრმა არ უნდა იყოს - მაშინ ბავშვი აღარ მოიხრება.
თუ ამ წესებს არ დაიცავთ, თვალებისა და ხერხემლის დაზიანებას თავიდან ვერ აიცილებთ.