ერთად ვიმხიარულოთ!
მთავარია მონდომება! ოჯახში პატარა იზრდება. მისი ყოველდღიური ცხოვრება წუთობით არის დაგეგმილი. მიუხედავად ამისა, მშობლებს ხანდახან ეუფლებათ განცდა, რომ დრო შეჩერდა. თუმცა რა გრძელი, ერთფეროვანი და მონოტონურიც არ უნდა გეჩვენებოდეთ თქვენი ყოველდღიური საქმიანობა, თქვენივე მონდომებით შესაძლებელია ყველაზე ყოფითი საზრუნავიც კი ცოცხალი და საინტერესო გახადოთ არა მარტო ბავშვისათვის, არამედ თქვენთვისაც.
1. მივუსხდეთ მაგიდას
დღის განმავლობაში ბავშვს რამდენჯერმე აჭმევთ. რა თქმა უნდა, ყველა დედისთვის ნაცნობია სიტუაცია, როცა პატარა უარს ამბობს საკვებზე. როგორ მოვიქცეთ ამ დროს?
- ბავშვი საერთო მაგიდასთან დასვით. ჯობს, სხვებთან ერთად მიირთვას.
- თუ შინ მარტო ხართ, სადილზე თქვენი პატარას საყვარელი სათამაშო "დაპატიჟეთ".
- ესაუბრეთ ბავშვს კერძის შესახებ, მოუყევით, როგორ მოამზადეთ ის.
- მოილოკეთ ტუჩები, უთხარით ბავშვს, რომ საჭმელი გემრიელია, ცოტაოდენი თქვენს თეფშზე გადაიღეთ და შეჭამეთ.
- უფროსი ასაკის ბავშვებს შეიძლება თამაში შესთავაზოთ - მაგიდაზე ქაღალდი და ფანქრები დააწყოთ და ყოველი კოვზის ფასად ნახატის თითო დეტალი შექმნათ.
- არასოდეს დატუქსოთ ბავშვი ჭამის დროს.
2. ბანაობა
/* (c)AdOcean 2003-2021, Advertline.https:mkurnali.ge.mkurnali zones.________ _____ */
ado.slave('adoceanadvertlinegelpmmhkfobb', {myMaster: 'gC_g7BxQlx9UWDeCK7yaEdkgIoxg2l6o6JUmNs2rvgn.i7' });
როცა ბავშვი აბაზანაში ზის, ასწავლეთ წყალზე ხელის დარტყმა და ერთად იცინეთ შხეფების გაჩენისას. ეს ყველაფერი თამაშად აქციეთ და პატარასაც გაუხარდება, როცა ბანაობას შესთავაზებთ. იყიდეთ რეზინის სათამაშოები, ერთად აცურავეთ ისინი. გოგონები დიდი სიამოვნებით აბანავებენ თოჯინას, ხოლო ვაჟები - ჯარისკაცებს.
3. მოდი, ვიცეკვოთ!
თუ სტუმრები გეწვიათ ან უბრალოდ რიტმული მუსიკის მოსმენისას მოძრაობის სურვილი გაგიჩნდათ, აუცილებლად "გაიწვიეთ" საცეკვაოდ თქვენი შვილი. ყველა პატარა გოგონა სიამოვნებით ეცეკვება მამას, ხოლო პატარა ბიჭი სიამოვნებით უწევს დედას პარტნიორობას. ცეკვა სასარგებლოა არა მარტო ბავშვისთვის, არამედ დედისთვისაც, ის დაგეხმარებათ ფიზიკური ფორმის შენარჩუნებაში, თუმცა არ უნდა დაივიწყოთ უსაფრთხოების ზომები. თუ ოთახი მომცრო და ავეჯით გადატვირთულია, ბევრ რამეს შეიძლება შეეჯახოთ.
4. სეირნობა
ჰაერზე სეირნობა ბავშვისთვის სასარგებლოა. კარგი იქნება, თუ დღეში რამდენიმეჯერ გაასეირნებთ, ოღონდ ეცადეთ, სეირნობა ერთფეროვანი არ იყოს. ცვალეთ მარშრუტი! გზადაგზა მოუყევით ბავშვს იმ მცენარეების შესახებ, რომელთაც ხედავთ, დაანახეთ ლამაზი ფოთლები, ყვავილები. მიაჩვიეთ, ყველაფერში მშვენიერება დაინახოს, დატკბეს უბრალო საგნების სიდიადით. თუ გზად ისტორიული მნიშვნელობის შენობები გხვდებათ, მოზრდილებს შეგიძლიათ მათ შესახებაც მოუთხროთ. წაიყოლეთ ბავშვი მაღაზიაში. ეს მისთვის სასიამოვნო გასართობი იქნება, მით უფრო - თუ სთხოვთ, დაგეხმაროთ საყიდლების არჩევაში, მოგაწოდოთ პროდუქტი. თუ შვილს ხელში პატარა პარკს მისცემთ და შიგ მსუბუქ შენაძენს ჩადებთ, ის თავს თქვენი საქმიანობის სრულუფლებიან მონაწილედ იგრძნობს.
