ჰომოსექსუალობის გენი ქალის ნაყოფიერების უნარს ზრდის
რამდენიმე კვლევამ აჩვენა, რომ ჰომოსექსუალ მამაკაცებს დედის მხრიდან უფრო მეტი არატრადიციული ორიენტაციის ნათესავი ჰყავთ, ვიდრე მამის მხრიდან. მემკვიდრეობის ასეთი სურათი დამახასიათებელია სქესთან შეჭიდულობის ნიშნებისთვის, რაც იმას ნიშნავს, რომ ჰომოსექსუალობის განმსაზღვრელი გენი ქალის სასქესო ქრომოსომაში - X-ქრომოსომაში მდებარეობს. 2004 წელს იტალიელმა მეცნიერებმა დაადგინეს, რომ ქალებს, რომელთაც ჰომოსექსუალი ნათესავები ჰყავთ, უფრო მეტი შვილი უჩნდებათ, ვიდრე მათ, ვის გვარსაც შეუძლია, უპირატესად ჰეტეროსექსუალებით მოიწონოს თავი.
ანდრეა კამპერიო ჩიანიმ და მისმა კოლეგებმა ამ ფაქტის ახსნა განიზრახეს. ამისთვის მეცნიერებმა ააწყვეს ერთმანეთისგან განსხვავებული მათემატიკური მოდელები, რომლებიც ნათელს ჰფენდა ზემოთ აღწერილი დამემკვიდრების სურათს. მკვლევარებმა განიხილეს 20-ზე მეტი შესაძლებლობა, მათ შორის - ჰომოსექსუალობის გენის სხვადასხვა ოდენობა, მდება-რეობა, ქალის ნაყოფიერების უნარზე მისი ზემოქმედების ხარისხი. მათ ის ვარიანტებიც გაითვალისწინეს, როცა ჰომოსექსუა-ლიზმის გენი მდებარეობდა X ქრომოსომაზე, Y ქრომოსომაზე ან აუტოსომებზე - არასასქესო ქრომოსომებზე. მათი დასკვნის თანახმად, ჰომოსექსუალობის გენები სწორედ X ქრომოსომებზე მდებარეობს, თანაც ქალის ნაყოფიერების უნარს ზრდის, მამაკაცისას კი ამცირებს. ეს ფენომენი აქამდეც იყო ცნობილი, თუმცა არა ადამიანში, არამედ მწერებსა და ზოგიერთ ფეხსა-ხსრიანში. ამას მეცნიერები სქესობრივ ანტაგონიზმს უწოდებენ. ანტაგონისტური ნიშნები სასარგებლოა საპირისპირო სქესის წარმომადგენელთა გადარჩენისთვის, მაგრამ უსარგებლო და მავნე - იმავე სქესის წარმომადგენლებისთვის.