ჟურნალის რედაქცია

ავსტრალიელმა მეცნიერებმა საექსპერიმენტო ცხოველებზე ჩატარებული კვლევის შედეგად დაადგინეს, რომ ყავის ჭარბი მოხმარება ხელს უწყობს სიმსუქნეს. ადამიანები, რომლებიც ყოველდღე ხუთ და მეტ ფინჯან ყავას სვამენ, სიმსუქნისა და ქრონიკული დაავადებების განვითარების რისკის წინაშე დგანან. აღმოჩნდა, რომ ამ ოდენობის ყავის მიღებისას მუცლის ღრუს ორგანოთა შემომგარსველი ცხიმის მოცულობა ორმაგდება. მეცნიერები ამის მიზეზად მიიჩნევენ ქლოროგენის მჟავას, რომელიც წინათ, პირიქით, სასარგებლოდ მიაჩნდათ.

შეგახსენებთ, რომ სწორედ მუცლის ღრუს ორგანოების შემომგარსველი ცხიმია სასიკვდილო დაავადებების ხელშემწყობი ფაქტორი. აქამდე მეცნიერებს ეგონათ, რომ ყავა სასარგებლო იყო, რადგან ტესტირებას მცირე ულუფებზე (1-2 ფინჯანზე) ატარებდნენ. მჟავას ასეთი დოზა ზრდის ინსულინისადმი მგრძნობელობას, ამცირებს წნევას და ამუხრუჭებს ცხიმის დაგროვებას, დიდი კი საპირისპირო ეფექტს იწვევს - იმატებს მუცლის ღრუს ორგანოთა შემომგარსველი ცხიმი (რაც დიაბეტისა და გულ-სისხლძარღვთა დარღვევების რისკფაქტორია), იმატებს ინსულინისადმი რეზისტენტობა და შაქრის აუტანლობა.

აღსანიშნავია, რომ ქლოროგენის მჟავას შეიცავს ზოგიერთი ხილიც, მათ შორის - ქლიავი.

• ნარკომანია პოტენციის შეუქცევად დაქვეითებას იწვევს

ამერიკელ მეცნიერთა მიერ ახლახან ჩატარებული კვლევის მასალებში ნათქვამია, რომ ნარკომანია გამოუსწორებელ ზიანს აყენებს მამაკაცის სქესობრივ შესაძლებლობებს - იწვევს ცვლილებებს, რომლებიც აღარ უკუვითარდება, თუნდაც ადამიანმა სამუდამოდ თქვას უარი ამ მავნე ნივთიერებების მოხმარებაზე.

ეს დასკვნა ეწინააღმდეგება აქამდე ჩატარებული გამოკვლევების შედეგებს, რომელთა თანახმადაც, ნარკომანების სქესობრივი ფუნქცია ფსიქოაქტიური ნივთიერებების მოხმარების შეწყვეტიდან სამი კვირის შემდეგ აღდგება.

ამერიკელ მეცნიერთა მიერ ჩატარებულ გამოკვლევაში მონაწილეობდა სხვადასხვა ასაკის 905 მამაკაცი, რომელთაგან 505 წარსულში კოკაინზე, ჰეროინზე, მარიხუანასა და შპეედბალლ-ზე (კოკაინისა და ჰეროინის ნარევი) იყო დამოკიდებული. დანარჩენები, რომლებსაც არასდროს მიუღიათ ნარკოტიკი, შეადგენდნენ საკონტროლო ჯგუფს და მათი პოტენციის მაჩვენებელი ფასდებოდა როგორც საშუალო.

მეცნიერები მამაკაცების პოტენციას აფასებდნენ ოთხი კრიტერიუმით: სქესობრივი ლტოლვა, სქესობრივი კმაყოფილება, სქესობრივი აღგზნება და ორგაზმის სიძლიერე.

გამოკვლევამ აჩვენა, რომ საკვლევ ჯგუფს ოთხივე კრიტერიუმის მაჩვენებლები საკონტროლო ჯგუფის წევრებთან შედარებით დაქვეითებული ჰქონდათ. ამასთან, გაირკვა, რომ სხვადასხვა ტიპის ნარკოტიკები ორგანიზმზე პრინციპულად განსხვავებულ ზემოქმედებას ახდენს. მაგალითად, კოკაინი თრგუნავს სექსუალურ კმაყოფილებას, მაგრამ მოკლე ხნით ასტიმულირებს სქესობრივ ლტოლვას.

ჰეროინის ხანგრძლივი აღკვეთისას ითრგუნება როგორც სქესობრივი ლტოლვა, ისე კმაყოფილება. სხვაგვარად რომ ვთქვათ, ჰეროინს შეუძლია, თავდაპირველად რამდენიმეჯერ გააუმჯობესოს ერექცია, მაგრამ მოგვიანებით მამაკაცი ვეღარ შეძლებს მის შენარჩუნებას ნარკოტიკის გარეშე.

ხანგრძლივ პერსპექტივაში პრაქტიკულად ყველა ნარკოტიკი ნორმასთან შედარებით 30%-ით ამცირებს აღგზნების ძალას, თანაც რაც უფრო ხანგრძლივი ისტორია აქვს ნარკოტიკზე დამოკიდებულებას, მით უფრო მძაფრადაა გამოხატული ერექციული უკმარისობა.

ამ გამოკვლევის პრინციპულად ახალ აღმოჩენად იქცა ის, რომ ყოფილ ნარკოდამოკიდებულს პოტენცია სრულად არასდროს აღუდგება. თუნდაც მტკიცედ გადაწყვიტოს ნარკოტიკებისთვის თავის დანებება და ცხოვრების ჯანსაღ წესს მისდიოს, მისი მამაკაცური ძალა მაინც არ იქნება ისეთი, როგორიც იქნებოდა, ნარკოტიკები რომ არასდროს გაესინჯა.

საბოლოო ჯამში, ყოფილი ნარკომანები გაცილებით ადრე იგრძნობენ იმპოტენციის პირველ ნიშნებს, ვიდრე ის ადამიანები, რომლებიც ნარკოტიკულ პრეპარატებს არ მოიხმარდნენ.