მედიცინის სიახლეები - მკურნალი.გე

ნინო ჩარგეიშვილი

სპერმის ხარისხი ძვლების მდგომარეობაზეა დამოკიდებული.

ნიუ იორკში, კოლუმბიის უნივერსიტეტში, ჯერარდ კარსენტის ხელმძღვანელობით გამოკვლევაც კი ჩატარდა. მკვლევრებმა შეისწავლეს ჰორმონ ოსტეოკალცინის გავლენა თაგვების რეპროდუქციულ სისტემაზე.

ოსტეოკალცინს ძვლების ახალგაზრდა უჯრედები, ოსტეობლასტები, ასინთეზებს. ეს ჰორმონი მონაწილეობს ძვლის ქსოვილის განვითარებაში, ასევე არეგულირებს ინსულინის გამომუშავებას და ზრდის უჯრედების მგრძნობელობას მის მიმართ.

მეცნიერებმა ოსტეობლასტები თაგვების საკვერცხეებიდან და სათესლეებიდან აღებული უჯრედების კულტურაში მოათავსეს. შედეგად მამრობითი სასქესო ჯირკვლების უჯრედებში შემჩნეულ იქნა მამრობითი სასქესო ჰორმონის, ტესტოსტერონის, გამომუშავების სამჯერადი მატება, რაც აუცილებელია სპერმის ნორმალური მომწიფებისთვის.საკვერცხეების ჰორმონულ ფუნქციაზე ოსტეობლასტებს გავლენა არ მოუხდენია.

გამოკვლევის მეორე ეტაპზე მკვლევრებმა გამოიყვანეს მღრღნელები, რომლებსაც ოსტეოკალცინის სინთეზზე პასუხისმგებელი გენი ჰქონდათ გამორთული. გენეტიკურად მოდიფიცირებულ თაგვებს ნორმაზე გაცილებით პატარა სათესლეები განუვითარდათ. გარდა ამისა, მათი სპერმა ნაკლებ სპერმატოზოიდს შეიცავდა, ვიდრე ჯანსაღი მღრღნელებისა.

მეცნიერები ვარაუდობენ, რომ ოსტეოკალცინს უნარი შესწევს, გაზარდოს მამაკაცის ფერტილობა (ჩასახვის უნარი). სამომავლოდ მათ განზრახული აქვთ გაარკვიონ, შეიძლება თუ არა ამ ჰორმონის გამოყენება მამაკაცთა უნაყოფობის სამკურნალოდ.

ფიზიკური ვარჯიში მარიხუანას მიმართ ლტოლვას ამცირებს

ვანდერბილტის უნივერსიტეტის (აშშ) სპეციალისტებმა დაადგინეს, რომ ფიზიკური ვარჯიში მარიხუანას მომხმარებლებში საგრძნობლად ამცირებს ამ ნარკოტიკისადმი ლტოლვას. ჩატარდა გამოკვლევა, რომელშიც მონაწილეობა მიიღეს მარიხუანას მომხმარებლებმა. მათ სარბენ ბილიკზე ყოველდღიურად 10-30 წუთის განმავლობაში ავარჯიშებდნენ. ორკვირიანი ტრენირების შემდეგ კვლევაში მონაწილეებმა კანაფის გამოყენება 50%-ით და მეტად შეამცირეს.

ამრიგად, ნარკოლოგებმა პირველად დაამტკიცეს ფიზიკური აქტივობის სარგებლობა მარიხუანას მოხმარებასთან მიმართებით.

უკანასკნელი ათწლეულის განმავლობაში აშშ-ში კანაფის მოხმარებამ ყველა ასაკობრივ ჯგუფში მოიმატა. 2009 წლის მონაცემებით, კანაფს ყოველთვიურად ეწეოდა 12 წელს გადაცილებული 16 700 ამერიკელი, ხოლო 6 მლნ კანაფს თვეში 20-ჯერ მაინც ეწეოდა. ექიმების თქმით, ის, რაც ერთი შეხედვით უვნებელ ჩვევას ჰგავს, ხშირად უბრუნდება ადამიანს დაავადებად, რომელიც ხანგრძლივ მკურნალობას საჭიროებს. სახელდობრ, კანაფის მოწევამ შეიძლება ფსიქოზიც გამოიწვიოს.

ნევროლოგებს მიაჩნიათ, რომ ფიზიკური ვარჯიში დადებით გავლენას ახდენს ტვინის მუშაობაზე და ადამიანს კანაფისადმი ლტოლვის დაძლევაში ეხმარება.

ცილოვანი დიეტა ქალებს შვილოსნობის უნარის აღდგენაში დაეხმარება

მილანის უნივერსიტეტის მკვლევრებმა ცხოველებზე ჩატარებული გამოკვლევის შედეგად დაასკვნეს, რომ ღვიძლში არსებული ესტროგენების რეცეპტორები მნიშვნელოვანია ფერტილობის შენარჩუნებისთვის. მკვლევართა აზრით, ეს რეცეპტორები პროტეინების შემადგენლობაში შემავალ ამინომჟავებზეა დამოკიდებული.

თაგვებზე ჩატარებული გამოკვლევის შედეგებმა აჩვენა, რამდენად მნიშვნელოვანია აღნიშნული პროცესები უნაყოფობის ზოგიერთი ფორმისა და მენოპაუზასთან დაკავშირებული მეტაბოლური პროცესებისთვის.

სამეცნიერო სამუშაოს მიმდინარეობისას მეცნიერთა ჯგუფმა მაშინვე არ მიაქცია ყურადღება ღვიძლს. თავდაპირველად ექსპერტები ვარაუდობდნენ, რომ ესტროგენების რეცეპტორთა მაღალ აქტივობას გამრავლების უნართან კავშირი არ ჰქონდა. ამ თეორიის შესამოწმებლად მეცნიერებმა თაგვებზე ექსპერიმენტი ჩაატარეს. ცხოველებს, რომელთა რაციონიც მცირე რაოდენობით შეიცავდა ცილოვან პროდუქტებს, დაქვეითებული აღმოაჩნდათ IGF-1 ჰორმონის დონე. იმავდროულად შეინიშნებოდა ღვიძლში გამოყოფილი ესტროგენის ნაკლებობაც. როდესაც ცხოველებს საკვებში ცილებით მდიდარი პროდუქტები დაუმატეს, მათი რეპროდუქციული ციკლი ჩვეულ რიტმს დაუბრუნდა. ცხიმებითა და ნახშირწყლებით მდიდარ დიეტას ასეთივე ეფექტი არ მოჰყოლია.

სპეციალისტებმა დაასკვნეს, რომ IGF-1 ჰორმონის დისფუნქციას უშუალო კავშირი აქვს ღვიძლში ესტროგენების რეცეპტორების მუშაობასთან. სამომავლოდ მეცნიერები გეგმავენ კლინიკური გამოცდების ჩატარებას, რათა გაიგონ, რა გავლენას ახდენს ღვიძლის მუშაობა მენსტრუალურ ციკლსა და ქალის რეპროდუქციულ ფუნქციაზე.