დილა მშვიდობისა!
პირიქით, თავად ჩქარობს, რომ შინიდან გასვლა არ დააგვიანდეს, თქვენ კი ამ დროს მშვიდად ზიხართ სამზარეულოში და ყავას სვამთ. მოდი, ოცნებას თავი დავანებოთ და რეალობას დავუბრუნდეთ. თუ თქვენი დილა უმნიშვნელოდ განსხვავდება ზემოთ აღწერილისგან, შეგიძლიათ, საკუთარი თავით იამაყოთ - ესე იგი, შვილს პატარაობიდანვე შესანიშნავი ჩვევები გამოუმუშავეთ, რომლებიც მომავალში აუცილებლად დაეხმარება. მაგრამ თუ ყოველ დილას ფაციფუცში, ჭირვეულობასა და კინკლაობაში ატარებთ, დროა დაფიქრდეთ და დასახოთ ღონისძიებები მდგომარეობის გამოსასწორებლად.
შევიქმნათ კარგი განწყობა
ბავშვები ინტუიციურად ყოველთვის მოზრდილთა ქცევას იმეორებენ. თუ ყოველ დღეს ხალისით ეგებებით, ასეთივე განწყობა ექნება თქვენს შვილსაც. სწორედ ამიტომ, ვიდრე შვილის გაღვიძებას დააპირებდეთ, სარკეში ჩაიხედეთ, გაიღიმეთ, ჩართეთ მუსიკა, გნებავთ კლასიკა, გნებავთ, საბავშვო სიმღერები. მთავარია, მელოდია მხიარული და ოპტიმისტური იყოს.
კოცნა და ალერსი
პატარა ბავშვს გამუდმებით სჭირდება მშობლებისგან სიყვარულის მტკიცება. საალერსო სიტყვები, კოცნა, მოფერება ბავშვისთვის მარტო სულიერი მოთხოვნილება კი არა, ისეთივე ფიზიკური აუცილებლობაა, როგორიც, მაგალითად, საკვები. პატარას ადგომის დრომდე 10 წუთით ადრე მიუახლოვდით, მოეფერეთ მძინარე ანგელოზს. შეგიძლიათ, გამოღვიძების რიტუალიც გამოიგონოთ - ჯერ ხელები "გამოაღვიძეთ", შემდეგ - სახე...
დილის სიურპრიზი
გამოღვიძების პროცესი უმტკივნეულოდ ჩაივლის, თუ ბავშვს ადგომით დააინტერესებთ. საამისოდ შეგიძლიათ მრავალი მიზეზი იპოვოთ - მულტფილმები, თამაშები, წიგნები, პატარა საჩუქრები. ზოგიერთი პატარა თვალის დახამხამებაში დგება, როცა ხედავს, რომ დედა დილის ვარჯიშს ასრულებს. შეგიძლიათ, შვილს წინა საღამოსვე შეუთანხმდეთ, რომ დილით ერთად ივარჯიშებთ. დაგეხმარებათ დილის საუბარი დღის გეგმების შესახებ. მოუყევით პატარას, რას აპირებთ საღამოს, სად წახვალთ ერთად, ოღონდ გაითვალისწინეთ, რომ დანაპირები აუცილებლად უნდა შეუსრულოთ, დაღლილობა არავითარ შემთხვევაში არ ჩაგეთვლებათ სიტყვის გატეხის საპატიო მიზეზად. თუ იცით, რომ თქვენი სამუშაო დღე იმდენად დატვირთულია, სეირნობას ან გართობას ვერ მოახერხებთ, გეგმა უქმეებისთვის შეადგინეთ.
დიდივით
თუ თქვენი შვილი ოცნებობს, რაც შეიძლება მალე გახდეს დიდი, მიეცით დილაობით გარკვეული, თუნდაც ძალიან მარტივი დავალება: კალენდრის ფურცლის ჩამოხევა, ყვავილების მორწყვა ან საათვისთვის თვალის დევნება, რომ შინიდან გასვლა არ დაგიგვიანდეთ.
საინტერესო საუზმე
ზამთარში, როდესაც დილაობით ჯერ კიდევ ბნელა, ბავშვებს ადგომა უფრო უჭირთ, ხოლო გვიან გაზაფხულზე და ზაფხულში სწრაფად წამოხტებიან ხოლმე. ასე რომ, ეცადეთ, ზამთრის დილა გაახალისოთ. შეგიძლიათ, მაგიდა საუზმისთვის განსაკუთრებული ჭურჭლით გააწყოთ ან საკვებს სხვადასხვა ფიგურის, თუნდაც ცხოველების ფორმა მისცეთ.
რაში გვეხმარება დღის რეჟიმი
დღის რეჟიმი მშვიდი და წყნარი დილის წინაპირობაა. ნიშანი იმისა, რომ თქვენი შვილი რეჟიმით ცხოვრებას მიეჩვია, გახლავთ მისი ადრე გაღვიძება უქმე დღეებშიც. ასე რომ, თუ პატარა კვირას ადრე იღვიძებს, არ არის საჭირო, ლოგინში დიდხანს დარჩენა და ნებივრობა შესთავაზოთ.