ანემიას ღეროვანი უჯრედებით მკურნალობენ
ნამგლისებრუჯრედოვანი ანემია სისხლის მემკვიდრეობითი დაავადებაა, რომელიც ჰემოგლობინის სტრუქტურაზე პასუხისმგებელი ერთადერთი გენის მუტაციის შედეგად ვითარდება.მასაჩუსეტის შტატის ბიომედიცინის ინსტიტუტის მეცნიერებმა ნამგლისებრუჯრედოვანი ანემიით დაავადებული თაგვები გამოიყვანეს.
ავადმყოფ მღრღნელებს აუღეს კანის შემაერთებელი ქსოვილის - ფიბრინობლასტების უჯრედები და იაპონელ და ამერიკელ მეცნიერთა მიერ ახლახან შემუშავებული მეთოდის დახმარებით ისინი ინდუცირებულ-პოლიპოტენტურ ღეროვან უჯრედებად გადააქციეს. აღსანიშნავია, რომ თვისებებით ეს უჯრედები ემბრიონის უჯრედების ანალოგიურია და ნებისმიერი ორგანოსა და ქსოვილის უჯრედებად ფორმირება შეუძლია. მომდევნო ეტაპზე ექსპერიმენტის ხელმძღვანელმა რუდოლფ ჯენიშმა და მისმა კოლეგებმა ღეროვანი უჯრედები სისხლმბადი უჯრედების მისაღებად გამოიყენეს. შემდეგ ნამგლისებრუჯრედოვანი ანემიის გამომწვევი დეფექტური გენი ნორმალურით შეცვალეს და მიღებული უჯრედები ავადმყოფ თაგვებს გადაუნერგეს.
მკურნალობა შედეგიანი აღმოჩნდა:
-
ცხოველებს სისხლისა და თირკმლის ფუნქციის მაჩვენებლები მოუწესრიგდათ.
"ეს იმის მაჩვენებელია, რომ დაავადების მკურნალობისას ინდუცირებულ-პოლიპოტენტურ ღეროვან უჯრედებს ემბრიონულის მსგავსი პოტენციალი აქვთ, თანაც ემბრიონული ღეროვანი უჯრედების გამოყენება არაეთიკურია და მრავალ სხვა პრობლემას უკავშირდება", - განაცხადა ჯენიშმა.
სპეციალისტები შიშობენ, რომ ღეროვანი უჯრედების მიღების ახალი ტექნოლოგია შესაძლოა ჯანმრთელობისთვის მავნე აღმოჩნდეს. უჯრედების ტრანფორმაციის პროცესში რეტროვირუსი გამოიყენება, ადამიანის ორგანიზმში მის არსებობას კი შეიძლება უარყოფითი შედეგი მოჰყვეს. გარდა ამისა, ექსპერიმენტის დროს გამოყენებულ ერთ-ერთ გენს კანცეროგენული თვისებები აღმოაჩნდა. მიუხედავად ამისა, მეცნიერები მიიჩნევენ, რომ ახალ ტექნოლოგიას ფართო პერსპექტივა აქვს. თეორიულად, ღეროვანი უჯრედები შესაძლოა პარკინსონის დაავადებასთან, დიაბეტთან, ზურგის ტვინის ტრავმებსა და მრავალ სხვა სნეულებასთან ბრძოლის ეფექტურ საშუალებად იქცეს.