მარიხუანა თუ თამბაქო?
.
ახალ ზელანდიაში საინტერესო გამოკვლევა ჩატარდა. მოხალისეები გაყვეს ოთხ ჯგუფად. პირველში მოხვდნენ მხოლოდ მარიხუანას მწეველები (რომლებიც ბოლო ხუთი წლის მანძილზე დღეში თითო ღერ სიგარეტს მაინც ეწეოდნენ); მეორეში - თამბაქოსა და მარიხუანას მწეველები; მესამეში - მხოლოდ თამბაქოს მწეველები (რომლებიც უკანასკნელი ერთი წლის განმავლობაში დღეში 20-მდე სიგარეტს ეწეოდნენ), ხოლო მეოთხეში - არამწეველები.
თითოეულ მოხალისეს ჩაუტარდა ფილტვების კომპიუტერული ტომოგრაფიული გამოკვლევა და სუნთქვის ფუნქციის შეფასება სპეციალური ტესტების საშუალებით.
აღმოჩნდა, რომ კანაფის მწეველთა უმრავლესობა უჩიოდა ხველას ნახველის გამოყოფით, ქოშინსა და შებოჭვის შეგრძნებას გულმკერდის არეში. გამოკვლევამ აჩვენა, რომ მათ დაზიანებული ჰქონდათ როგორც წვრილი, ისე მსხვილი ბრონქები. ფილტვების მდგომარეობას აუარესებდა აირთა ცვლის დარღვევა, ამასთანავე, სისხლს საჭიროზე ნაკლები ჟანგბადი მიეწოდებოდა. არცთუ იშვიათი გახლდათ ობსტრუქციული ბრონქიტი. ზედა სასუნთქი გზების დაზიანების მოცულობა მოწეული მარიხუანას ოდენობაზე იყო დამოკიდებული.
- მარიხუანას მძიმე უარყოფითი ეფექტი, ერთი მხრივ, მასში ფილტრის არარსებობით აიხსნება, მეორე მხრივ კი იმით, რომ მისი მოწევისას ჩასუნთქულ კვამლს უფრო მაღალი ტემპერატურა აქვს. გარდა ამისა, მარიხუანას მოწევისას კვამლს უფრო ღრმად ისუნთქავენ და უფრო მეტხანს აკავებენ ფილტვებში, ვიდრე ჩვეულებრივი სიგარეტის მოწევისას.
თუმცა ჯანმრთელობისთვის ჩვეულებრივი თამბაქოც არანაკლებ საშიშია, ვინაიდან მას მარიხუანაზე გაცილებით მეტს მოიხმარენ.