როგორ მოქმედებს ალკოჰოლი ჯანმრთელობაზე და რა რაოდენობის ალკოჰოლი ითვლება ნორმად
თავის ტვინი:
ალკოჰოლი ხელს უშლის ტვინის საკომუნიკაციო გზების ფუნქცინირებას და შეუძლია გავლენა მოახდინოს ტვინის მუშაობაზე. ამ დარღვევამ შეიძლება შეცვალოს განწყობა, ქცევა, გაართულოს მკაფიოდ აზროვნება და კოორდინირებული მოძრაობა.
ღვიძლი:
ჭარბი სასმელი ზიანს აყენებს ღვიძლს და შეიძლება გამოიწვიოს სხვადასხვა პრობლემები, მათ შორის:
- სტეატოზი(ღვიძლის ცხიმოვანი ინფილტრაცია);
- ალკოჰოლური ჰეპატიტი;
- ფიბროზი;
- ციროზი
ასევე, ალკოჰოლის ჭარბი გამოყენება იწვევს ბაქტერიების ზრდას ნაწლავში. საბოლოოდ ბაქტერიები შეიძლება გადავიდეს ღვიძლში, რაც ამ ორგანოს დაზიანებას იწვევს.
გული:
ბევრი ალკოჰოლი ცუდად მოქმედებს გულზე. მას შეუძლია გამოიწვიოს კარდიომიოპათია და არითმია. ის ასევე ადამიანებს მაღალი წნევის განვითარების რისკის ქვეშ აყენებს.
პანკრეასი:
ალკოჰოლის ჭარბად გამოყენების შედეგად ადამიანებს შეიძლება განუვითარდეთ პანკრეატიტი.
იმუნური სისტემა:
ალკოჰოლს შეუძლია გავლენა მოახდინოს იმუნურ სისტემაზე. ის პირები, რომლებიც ყოველდღე ჭარბად იღებენ ალკოჰოლს სხვადასხვა დაავადებით უფრო ხშირად ავადდებიან, ვიდრე ადამიანები, რომლებიც არ სვამენ. ეს იმიტომ ხდება, რომ ალკოჰოლს შეუძლია შეასუსტოს იმუნური სისტემა და ორგანიზმი უფრო მგრძნობიარე გახადოს ინფექციების მიმართ.
ადამიანებს, რომლებიც ქრონიკულად სვამენ, მეტად ემართებათ ისეთი დაავადებები, როგორებიცაა: პნევმონია და ტუბერკულოზი. ალკოჰოლის მოხმარება აფერხებს ორგანიზმის ინფექციებისგან თავდაცვის უნარს.
გადაბმით სმა იწვევს B ჯგუფის ვიტამინების, განსაკუთრებით – თიამინის (B1) დეფიციტს.
ჭარბი დალევა ქმნის ზოგიერთი კიბოს განვითარების რისკს: მაგალითად, პირის ღრუს, საყლაპავის, ყელის, ღვიძლისა და სარძევე ჯირკვლის კიბო.
აშშ-ს ჯანდაცვისა და ადამიანური სერვისების დეპარტამენტისა და აშშ-ს სოფლის მეურნეობის დეპარტამენტის მიხედვით, მოზრდილებს შეუძლიათ დალიონ ზომიერად, დღეში 2 ჭიქა ან ნაკლები(მამაკაცებს), ხოლო დღეში 1 ჭიქა ან ნაკლები ქალებს.
ალკოჰოლიზმის ეროვნული ინსტიტუტის მიხედვით კი, ალკოჰოლის ჭარბი მოხმარება განისაზღვრება შემდეგნაირად: ზრდასრული ადამიანისთვის ალკოჰოლის ჭარბი დოზა შეესაბამება 5 ან მეტ ჭიქა ალკოჰოლური სასმლის (მამაკაცის) მოხმარებას, ხოლო ქალებში 4 ან მეტი ჭიქა სასმლის მოხმარებას(დაახლოებით, 2 საათის განმავლობაში).
