როგორც სპეციალისტები ამბობენ, ძალიან ხშირად დაავადებულები თვითმკურნალობას მიმართავენ, სვამენ ანტიბიოტიკებს და იღებენ ვიტამინებს იმ მიდგომით, რომ ორგანიზმს ვიტამინები მაინც არაფერს ავნებს.

როგორც ინფექციონისტი ალექსანდრე გოგინავა ამბობს, ექიმის დანიშნულების გარეშე სხვადასხვა ვიტამინის მიღება არ შეიძლება. ის მოუწოდებს ინფიცირებულ ადამიანებს, ყველა შემთხვევაში ვიტამინის მიღება ექიმთან შეათანხმონ. „ამბულატორიული სერვისისთვის სხვადასხვა საერთაშორისო მართვის გაიდლიანები არსებობს, სადაც რეკომენდებულია ვიტამინების მიღება, მაგრამ საკუთარი სურვილით დიდი რაოდენობით C ვიტამინის მიღება არ შეიძლება. ამან შეიძლება ზიანი მიაყენოს ორგანიზმს. ვიტამინის მიღებაც უნდა მოხდეს ექიმის თანხმობით, მასთან შეთანხმებით. შეიძლება ადამიანს აქვს კუჭის პრობლემა და თუ მიიღებს C ვიტამინს, არ არის გამორიცხული, ამან კუჭი გაუღიზიანოს, გასტრიტი გაუმწვავოს, ან სხვა რამე პრობლემა გამოიწვიოს.

ვიტამინებს საკმაოდ ხშირად ახასიათებს, ასევე, ალერგიული რეაქციები, ამიტომ მათ დამატებით მიღება უნდა შეფასდეს ექიმის მიერ, უნდა იყოს განხილული ინდივიდუალურად და არა ისე, რომ ყველა ადამიანმა, როგორც კი დაემართება კოვიდი, დაიწყოს დიდი რაოდენობით ვიტამინების მიღება და ამით თავის ჯანმრთელობას დამატებით საფრთხე შეუქმნას“, - ამბობს ინფექციონისტი ალექსანდრე გოგინავა. იგი ასევე მოუწოდებს ადამიანებს, რომ არავითარ შემთხვევაში არანაირი ანტიბიოტიკი და სისხლის გამათხელებელი არ მიიღონ.

„კატეგორიულად უარს ვამბობ ნებისმიერ ანტიბიოტიკზე. მედიკამენტოზური ჩარევა ყოველთვის უნდა იყოს ექიმთან შეთანხმებული, თუ ვთქვათ, ვერ უკავშირდებით ექიმს, ხართ კოვიდინფიცირებული და სვამთ ანტიბიოტიკებს, პირველ რიგში, უნდა დაანებოთ თავი ანტიბიოტიკებს, სისხლის გამათხელებლებს. ვიტამინების მიღებას ანტიბიოტიკებთან შედარებით ნაკლები ზიანი მოაქვს, მაგრამ არ არის აუცილებელი ყველა ადამიანისთვის ვიტმინებიც“.

ჩვენს კითხვას, შეიძლება თუ არა D ვიტამინის მიღება, რადგან ამბობენ, რომ D ვიტამინის დეფიციტის დროს უფრო რთულდება პაციენტის მდგომარეობა, ექიმი ასე პასუხობს:

„ზოგადად, ამ მხრივ ბევრი კვლევაა ჩატარებული. იმ ადამიანებს, ვისაც აქვთ D ვიტამინის დეფიციტი, ინფექციები და, განსაკუთრებით, სასუნთქი გზების ინფექციები, ვირუსი მიმდინარეობს მძიმედ, აქედან გამომდინარე, მოხდა დაშვება - D ვიტამინი კარგ შედეგს გამოიღებს კორონავირუსული ინფექციის დროს, მაგრამ თუ ადამიანს ნორმაში აქვს D ვიტამინი, მაშინ დამატებით მისი მიღება, თანაც მწვავე ინფექციის დროს, არანაირად მიზანშეწონილი არ არის.

თუმცა თუ პაციენტს D ვიტამინის დეფიციტი აქვს, მან შესაძლებელია, დანამატის სახით მიიღოს D ვიტამინი და ამით მეტ-ნაკლებად შეუშალოს ხელი დავადების მძიმე მიმდინარეობას. მაგრამ აქაც ყველამ არა, მხოლოდ იმ ადამიანებმა უნდა მიიღონ, ვისთანაც დიაგნოსტირებულია, ან არის ეჭვი, რომ არის D ვიტამინის დეფიციტი.

ანალიზების და, ზოგადად, კვალიფიციური ექიმის შეფასების გარეშე ნებისმიერი მედიკამენტის მიღება არის კითხვის ნიშნის ქვეშ. მაგრამ ჩვენ თუ დავახარისხებთ, ცალსახად ვიტყვი, ანტიბიოტიკისა და სისხლის გამათხელებლის მიღება ექიმის გარეშე არ შეიძლება, რაც შეეხება სიცხის დამწევს და ვიტამინებს, უფრო თამამად შეიძლება მიიღოს ადამიანმა, მაგრამ უმჯობესია, ესეც ექიმის რეკომენდაციით მოხდეს“.