ნანა ხუცაიძე

.

კვერცხის შენახვა 7-8 დღის განმავლობაში უმაცივროდაც შეიძლება. ამისათვის ერთი ცალი უნდა გატეხოთ და ცილა დანარჩენებს წაუსვათ, შემდეგ კი სათითაოდ გაახვიოთ გაზეთში.გახსნილ ქილაში ტომატი რომ არ დაობდეს, მარილი მოაყარეთ.

• როგორ შევამოწმოთ კარაქის ვარგისობა?

საჭმელად ვარგის კარაქს უნდა ჰქონდეს:

1. მოთეთრო-მოკრემისფრო ან ღია ყვითელი ფერი;
2. კარგი გემო;
3. ერბოს- რბილი, მარცვლოვანი კონსისტენცია;
4. გამდნარი- გამჭვირვალე უნდა იყოს და არ ჰქონდეს ლექი;
5. უნდა ჰქონდეს დამახასიათებელი სუნი.

• შინაური რეცეპტები

1. თევზით მოწამვლის დროს აიღეთ 1 სუფრის კოვზი ანისულის არაყი, გახსენით ერთ ჭიქა წყალში და უმალვე დალიეთ.
2. მარილების დაგროვების საწინააღმდეგოდ უზმოზე მიიღეთ ანადუღარი, შეგრილებული 1 ჭიქა წყალი და საათ-ნახევრით წამოწექით.
3. ორგანიზმიდან მარილების გამოძევება ასეც შეიძლება: წვრილად დაჭერით ნიახური, დაასხით 1 ქილა მაწონი და დილამდე გააჩერეთ. დალიეთ უზმოზე.
4. კუჭის აშლილობისას აიღეთ 1 წილი მარწყვის ფოთოლი, 1 წილი ტირიფი, ერთმანეთში აურიეთ, დაასხით 500 მლ ცივი წყალი, შედგით ნელ ცეცხლზე და ხარშეთ. გააგრილეთ და გადაწურეთ. სვით ყლუპ-ყლუპად მთელი დღის განმავლობაში.

• როგორ შევარჩიოთ სუნამო

ერთ ჯერზე ჩვენ, ჩვეულებრივი მოკვდავები, მხოლოდ სამი არომატის შეფასებას ვახერხებთ. სუნამოს შერჩევისას თავი დანაღმულ ველზე რომ არ გეგონოთ, აუცილებლად პროფესიონალს მიმართეთ და შეატყობინეთ, როგორ სურნელს ანიჭებთ უპირატესობას. თქვენგან იუველირულ სიზუსტეს არავინ მოითხოვს. საკმარისია, უთხრათ, რომელი არომატი უფრო მეტად მოგწონთ: ტკბილი და თბილი თუ მსუბუქი და ცივი, ყვავილებისა თუ ციტრუსისა, მოტკბო აღმოსავლური თუ პუდრისებრი. დანარჩენი სპეციალისტს მიანდეთ, რადგან თქვენი "ლიმიტი", როგორც უკვე ვთქვით, მესამე ცდაზე ამოიწურება.

სიახლე შეუმჩნეველი რომ არ დარჩეს, სწორად გამოიყენეთ:

1. ტუალეტის წყალი უხვად დაიპკურეთ კანსა და თმაზე. თუ გრძელი თმა გაქვთ, თმის ბოლოებზე დაისხით, თუ მოკლე - თმის ძირებში.
2. სუნამო იპკურეთ ძალიან ცოტა - სულ რამდენიმე წვეთი, თანაც, უმჯობესია, ე.წ. ენერგეტიკულ წერტილებზე - ყურების უკან, საფეთქლებზე, იდაყვებისა და მუხლების მოსახრელში და მაჯაზე.

• გაუფრთხილდით ტანსაცმელს

სუნამო შეგიძლიათ დააპკუროთ მხოლოდ ბუნებრივ ქსოვილებს, თანაც, უმჯობესია, სარჩულზე. შეგიძლიათ, ცხვირსახოცსაც დააწვეთოთ. არ გირჩევთ სუნამოს დასხმას მცხუნვარე მზეზე გასვლის წინ - შესაძლოა, პიგმენტური ლაქები გაგიჩნდეთ.

დაბოლოს, არ დაგავიწყდეთ შენახვის წესი: მოარიდეთ მზის პირდაპირ სხივებს და შეინახეთ აუცილებლად თავდახურული.