სახალწლო სამზადისი
რა არის ამისთვის საჭირო?
აბაზანა
საქმეს რომ მორჩებით, მიიღეთ აბაზანა. მიეცით თავს მოდუნების უფლება და საშუალება. თბილ აბაზანაში ჩაყარეთ ზღვის მარილი, ჩაასხით არომატული ქაფი, ზეთი ან რძე. არსებობს სპეციალური რძეც აბაზანისთვის. ყველაფერი ეს მოგადუნებთ და დაღლილობას მოგიხსნით.
გაწმენდა და პილინგი
საახალწლო სამზადისი, სახალწლო წვეულებები, მშრალი ჰაერი, სიგარეტის კვამლი, ყოველდღიური მაკიაჟი კანს აზიანებს. მას სჭირდება გულმოდგინე გაწმენდა და პილინგი. მიეცით კანს საშუალება, დაისვენოს და ენერგიით აივსოს. გამოიყენეთ პილინგის საშუალებები, რომლებსაც ცნობილი კოსმეტიკური ფირმები გვთავაზობენ.
მოუარეთ სხეულს!
სადღესასწაულო სუფრას ზედმეტი კილოგრამები მოაქვს. აუცილებლად იფიქრეთ ამაზე. შეძლებისდაგვარად მოიწყვეთ განტვირთვის დღეები, შეარჩიეთ დიეტა. არსებობს მამოდელირებელი კრემები სხეულისთვის ნარუჯის ეფექტით. ეცადეთ, შეიძინოთ.
შენიღბვის საშუალებები
თუ საჭიროა თავის სწრაფად მოწესრიგება, უპეები კი შეშუპებული გაქვთ, გამოიყენეთ კორექტორ-კონსილერი.
იზრუნეთ თვალებზე
წაისვით ქუთუთოების კრემი, ფრთხილად გაატარეთ ცერა თითები წარბებქვეშ და წარბებზემოთ, მსუბუქად მიირტყით თითის ბალიშები თვალების ქვეშ. შემდეგ გაიკეთეთ მინინიღაბი. გამოიყენეთ ლიფტინგ-საშუალება თვალის კორექტურისთვის.
მომდევნო ეტაპი
სადღესასწაულო მაკიაჟი წუნდაუდებელი უნდა იყოს, ამისთვის კი გულისყურით უნდა მოამზადოთ სახის კანი, რათა მან გაუძლოს მაკიაჟსაც, უძილობასაც და დილამდე შეინარჩუნოს სიხალასე და სილამაზე. ამიტომ დღეგამოშვებით იკეთეთ დამატენიანებელი ნიღაბი, ხოლო უშუალოდ დღესასწაულის წინ - ლიფტინგ-ნიღაბი. ნურც პილინგს დაივიწყებთ. უყურადღებოდ ნუ დატოვებთ ტუჩებს - მათაც სჭირდებათ პილინგი და ბალზამის რეგულარული წასმა.
ხელები და სხეული
საახალწლო კაბები, როგორც წესი, დეკოლტირებულია. თუ დღესასწაულის წინ ანტიცელულიტური პროცედურის ჩატარებას ვერ ახერხებთ, ჯობს დიეტა დაიცვათ და სოლარიუმის მომსახურებით ან ავტონარუჯით ისარგებლოთ. თუ დიეტის დროს ფიგურის მოდელირების საშუალებასაც გამოიყენებთ, შედეგი უკეთესი იქნება, კანი გაიჭიმება და გაცილებით გლუვი და მკვრივი გახდება. მოიწესრიგეთ ხელებიც: მთელი დარჩენილი დროის განმავლობაში იკეთეთ აბაზანები და ნიღბები, ხოლო მანიკიური უშუალოდ დღესასწაულის წინ გაიკეთეთ.
პედიკიურის შესახებ
ის აუცილებელია, თუნდაც ღია ფეხსაცმლის ჩაცმას არ აპირებდეთ. თუ ლაქი არ გიყვართ, ნუ წაისვამთ, მაგრამ ჰიგიენური პედიკიური აუცილებელია. ის დღესასწაულამდე 2-3 დღით ადრე გაიკეთეთ, რათა ბოლო წუთებში არ მოგიხდეთ ისეთი პროცედურის ჩატარება, რომელიც სიფრთხილეს მოითხოვს. წვეულების წინ კი ფეხების აბაზანა ზედმეტი ნამდვილად არ იქნება - ის დაღლილობასაც მოგიხსნით და კომფორტის განცდასაც მოგანიჭებთ. რჩევა: ნუ შეიცვლით იმიჯს დღესასწაულის წინ: ვაითუ საკუთარი თავი აღარ მოგეწონოთ, ეს კი განწყობაზეც იმოქმედებს.
უკანასკნელი შტრიხები
- დეკოლტეს მიდამოში და მხრებზე წაისვით ოქროსფერი პუდრი, რათა კანი ერთგვაროვანი ფერისა გახდეს და ბზინვარება შეიძინოს.
- კანსა და მაკიაჟს გაგიხალისებთ სპეციალური საშუალება - შესასხურებელი თერმული წყალი. გაინაწილეთ ის სახესა და დეკოლტეს მიდამოზე.
თმა
გსურთ, დაუვიწყარი შთაბეჭდილება მოახდინოთ? ყველაზე მარტივი ხერხია, შეიცვალოთ ვარცხნილობა. ვარცხნილობის შერჩევისას, ისევე როგორც ტანსაცმლისა და მაკიაჟის შერჩევის დროს, უნდა დაფაროთ ნაკლი და ხაზი გაუსვათ ღირსებას. მაგალითად, თუ დიდი თვალები გაქვთ, ნუ დამალავთ ჩამოშლილი თმის ქვეშ, აი, ფართო ყურები კი შეგიძლიათ თმის ვუალით დაფაროთ. თუ ყოველივე ამაზე წინასწარ იზრუნებთ, საახალწლო ღამეს შეუდარებელი იქნებით, ეს კი საოცარ განწყობილებას შეგიქმნით, რომელიც მთელი წელი გაგყვებათ.