სრულყოფილი სიამოვნება
გაუფრთხილდით დეკოლტეს
ლამაზ ნამზეურს ნამდვილად არ შეშვენის დამწვარი კანი და მისი თანმხლები მტკივნეული შეგრძნებები, რომლებიც განწყობაზეც უარყოფითად აისახება. გარუჯვისას აუცილებლად უნდა წაისვათ ულტრაიისფერფილტრიანი დამცავი კრემი, ხოლო მზეზე დიდხანს ყოფნის შემდეგ კანი სპეციალური დამარბილებელი და დამატენიანებელი საშუალებებით დაიმუშაოთ.
სხეულის სურნელი
სიცხე დააჭერს თუ არა, თავს იჩენს სერიოზული პრობლემა - ოფლის სუნი. დილასა და საღამოს შხაპი აუცილებელია - ამაზე ორი აზრი არ არსებობს. ამასთან ერთად აუცილებლად გამოიყენეთ დეზოდორანტები. ყურადღება მიაქციეთ ეპილაციას: თმიანი საფარველი ოფლის სუნს უფრო მეტად ინარჩუნებს. არსებობს სპეციალური დეზოდორანტები, რომლებიც თმის ზრდას ანელებენ.
ქვედა სართული
პილინგის დროს არ უნდა დავივიწყოთ სხეულის ყველაზე დაბლა მდებარე წერტილები. რა თქმა უნდა, ფეხებს ვგულისხმობთ. დანარჩენი სხეულის პილინგის შემდეგ აუცილებლად დაიმუშავეთ ფეხისგულები, ტერფები, ქუსლები, წაისვით მკვებავი კრემი. ყავის ნალექისა და ზღვის მარილის გამოყენებაც შესანიშნავ ეფექტს იძლევა. თუ ეპილაციას არ გაიკეთებთ, ნატიფი პედიკურიც ვერ გიშველით.
იდაყვის ზონა
იდაყვები არანაკლებ უსიამოვნებას გვაყენებენ: მათზე კანი მშრალი, მუქი და ულამაზოა, ზოგჯერ იქერცლება კიდეც... უმჯობესია, საქმე აქამდე არ მიიყვანოთ, მაგრამ თუ პრობლემებმა მაინც იჩინა თავი, ისარგებლეთ მარტივი რეცეპტით: გასათეთრებლად იდაყვები ლიმონის `ფინჯნებში~ ჩაყავით, დასარბილებლად გამოიყენეთ ცხელი აბაზანა (ზეითუნის ზეთს დაუმატეთ რამდენიმე წვეთი ლიმონის წვენი).
იზრუნეთ თმაზეც
...წინააღმდეგ შემთხვევაში მცხუნვარე მზისა და ზღვის წყლისგან დაზიანებული თმა შემოდგომაზე შესაჭრელი გაგიხდებათ. ჩვეულებრივის ნაცვლად უნდა გამოვიყენოთ მზისგან დამცავი ფაქტორის შემცველი შამპუნი, ბალზამი და თმის მოსავლელი ყველა სხვა საშუალება (ფიქსატორი, ლაქი...)
რამდენიმე საგულისხმო რჩევა
ზღვის სანაპიროზე თავშიშველი ნუ გაჩერდებით. დაიხურეთ ტილოს ან ჩალის ქუდი, წაიკარით ხილაბანდი. ნუ იბანავებთ ზღვაში თმაგაშლილი, თმა სარჭით დაიმაგრეთ კეფაზე. ზღვაში ბანაობის შემდეგ აუცილებლად გადაივლეთ თმაზე წყალი.
ბრინჯაოსფერი ნამზეური
მომხიბვლელი ნამზეური ზაფხულში იშვითობა არ არის. პირიქით, ამ დროს ფერმკრთალ დეკოლტეს უფრო ძნელად მოჰკრავთ თვალს. სჭირდება თუ არა გარუჯულ სახეს მაკიაჟი? თუ წვეულებაზე მიბრძანდებით, აუცილებლად! აქტუალურია მბზინავი საშუალებები მოციმციმე ეფექტით, ავტონამზეური ერთგვაროვანი ტონალობის მისაღწევად. აქცენტი თვალებზე უნდა გაკეთდეს. შეგიძლიათ, ფანქარი არ გამოიყენოთ, მხოლოდ თვალის ჩრდილს დასჯერდეთ. პუდრი კანისფერი ან ოდნავ მუქი უნდა იყოს. ტუჩზე ფაქიზად წაისვით ოქროსფერი ან ბრინჯაოსფერი მბზინავი საცხი. გაითვალისწინეთ ყველა რჩევა და სიამოვნებაც სრულყოფილი იქნება.