როგორ დავაღწიოთ თავი ტოქსიკოზს ორსულობის პერიოდში
ორსულთა ტოქსიკოზი მრავალსიმპტომური პათოლოგიური მდგომარეობაა, რომელიც ორსულის ორგანიზმში ადაპტაციური პროცესების დარღვევისას ვითარდება. ის უშუალოდ ორსულის ორგანიზმში მიმდინარე ჰორმონული, სისხლძარღვოვანი და იმუნოლოგიური ცვლილებებით არის გამოწვეული. სხვაგვარად რომ ვთქვათ, ტოქსიკოზი ორსულობაზე ორგანიზმის გაუკუღმართებული რეაქციაა. პირობითად განასხვავებენ ორსულთა ადრეულ და გვიან ტოქსიკოზებს.
ადრეული ტოქსიკოზი პირველ ტრიმესტრში იჩენს თავს და, წესისამებრ, 12 კვირის შემდეგ გაივლის, გვიანი კი მესამე ტრიმესტრში ვითარდება. ადრეული ტოქსიკოზის სიმპტომებია ღებინება, ნერწყვდენა, გვიანი ტოქსიკოზისა - პრეეკლამფსია და ეკლამფსია.
გთავაზობთ რამდენიმე რჩევას, რომლებიც ორსულებს გულისრევის, ღებინების, საკვების აუტანლობის დროს გამოადგებათ:
საკვების სუნმა შესაძლოა გულისრევა და პირღებინება გამოიწვიოს. ცივ საკვებს უფრო სუსტი სუნი აქვს, ამიტომ მისი მიღება სჯობს. ტოქსიკოზზე მოქმედებს სისხლში გლუკოზის დონეც, ამიტომ მნიშვნელოვანია მისი ოპტიმალური ოდენობის შენარჩუნება. მიიღეთ რაც შეიძლება მეტი ცილა. მსუბუქი საკვები საწოლის თავთანაც დაიდეთ, რათა ღამით ან დილით წაიხემსოთ. მოერიდეთ დაკონსერვებულ ხილის წვენებს, ტკბილეულს. ცხიმიანი საკვები მძიმე გადასამუშავებელია, ამიტომ უმჯობესია ერიდოთ. ტოქსიკოზს აპროვოცირებს ცხარე, მჟავე, შემწვარი საკვებიც. ეცადეთ, დღის განმავლობაში მიიღოთ საკმაო სითხე (ჩაი, წვნიანები, გამაგრილებელი სასმელები), მაგრამ მცირე ყლუპებითა და ულუფებით. დიდი ოდენობით სითხის ერთბაშად მიღებამ შესაძლოა ღებინება გამოიწვიოს.
ტოქსიკოზს ამცირებს კოჭა, რომელიც შეგიძლიათ დაღეჭოთ ან ჩაის მიაყოლოთ. არსებობს დაშაქრული კოჭა, კოჭას ლუდი და ორცხობილა. შეგიძლიათ, ისინიც მიიღოთ. რაციონიდან ამოიღეთ ის პროდუქტები, რომლებიც გულისრევას იწვევს.
მდგომარეობას ამსუბუქებს ლუდის საფუარი. შეძლებისამებრ უხვად ჭამეთ მარცვლეული, პარკოსნები, კვერცხი, თევზი, ქათმის ხორცი, კაკალი და ავოკადო. ისინი შეიცავს ვიტამინ B6-ს და, ზოგიერთი მონაცემით, ამცირებს ტოქსიკოზის გამოვლინებას. ლიმონს შეუძლია, გულისრევა შეაჩეროს. გაჭერით ოთხად და როდესაც გულისრევის მოახლოებას იგრძნობთ, წუწნეთ. პიტნაც ამცირებს გულისრევას და ამშვიდებს კუჭ-ნაწლავს. სვით პიტნის ჩაი.
როგორ მოამზადოთ ტოქსიკოზის საწინააღმდეგო ნაყენი:
- აიღეთ 2 ჩაის კოვზი პიტნის ფოთოლი, 1 ჩაის კოვზი კატაბალახას ფესვი, 2 ჩაის კოვზი გულყვითელას ყვავილი, 2 ჩაის კოვზი ფარსმანდუკი.
- ნარევს დაასხით 400 მლ ადუღებული წყალი, დააყენეთ 30 წუთით და გაწურეთ.
- სვით 50 მლ დღეში 6-ჯერ, 25 დღის განმავლობაში.
- კურსი გაიმეორეთ სამჯერ, 15-დღიანი შესვენებებით.
ეს მცენარეები მოქმედებს კუჭის ლორწოვანზე, ასტიმულირებს კუჭისა და თირკმლის სეკრეციას, აქვს სპაზმოლიზური ეფექტი, ამშვიდებს ნერვულ სისტემას.
ვრცლად ამ და სხვა თემებზე, შეგიძლიათ წაიკითხოთ „8 წიგნი ჯანმრთელობაზე“ მეოთხე ტომში, რომელიც ეძღვნება მეან-გინეკოლოგიას, სექსოლოგიას, ვენეროლოგიას, უროლოგიასა და ნეფროლოგიას. წიგნში მკითხველი მიიღებს საჭირო ინფორმაციას, რაც დიდ დახმარებას გაუწევს ყველა ძირითადი დაავადების და ცალკეული სიმპტომის დროს. მეოთხე ნაწილში ამომწურავად გაეცნობით ამ სფეროებთან დაკავშირებულ არაერთ საკითხს, როგორიცაა: გინეკოლოგიური დაავადებები, ნორმალური და პათოლოგიური ორსულობა, სქესობრივი ლტოლვა, მამაკაცთა სქესობრივი პრობლემები, ვენერიული დაავადებები და სხვ.
მეოთხე ნაწილის შეძენა შეგიძლიათ 13 მარტიდან „ბიბლუსის“ მაღაზიათა ქსელში და პრესის გავრცელების ჯიხურებში.