იოდის დეფიციტის პროფილაქტიკა
რა სახით უნდა მიიღოს ბავშვმა იოდი?
იოდის დეფიციტის კორექცია უმთავრესად საკვების მეშვეობით უნდა მოხდეს.
იოდის კონცენტრაცია მაღალია ისეთ პროდუქტებში, როგორიც არის:
- იოდიანი მარილი;
- იოდიანი წყალი;
- იოდიანი კარაქი;
- იოდით გამდიდრებული პური, საკონდიტრო ნაწარმი, ხორცის პროდუქტები, რძე, კეფირი და რძის სხვა ნაწარმი;
- ზღვის პროდუქტები - ზღვის კომბოსტო, თევზი, კიბორჩხალა და სხვა;
- ჩვილებისთვის ადაპტირებული რძის ნარევები.
უნდა ვიცოდეთ კიდევ ერთი რამ: ორგანიზმმა იოდი ოპტიმალურად რომ აითვისოს, რაციონი საკმარისი ოდენობით უნდა შიცავდეს ცილებს, რკინას, სპილენძს, A და E ვიტამინებს. ქალებისთვის იოდის დეფიციტის შესავსებად რეკომენდებულია სპეციალური ვიტამინურ-მინერალური კომპლექსები და თვით იოდის პრეპარატები, მაგალითად, იოდიდ-100, იოდომარინი. ამჟამად მსოფლიოში იოდის დეფიციტის პროფილაქტიკის ძირითადი სტრატეგიაა უნივერსალური იოდიანი სუფრის მარილის გამოყენება. იოდიანი მარილის პროგრამა დღესდღეობით 100-ზე მეტ ქვეყანაში მოქმედებს. ამ პროგრამაში ჩართულია საქართველოც. წლამდე ასაკის ბუნებრივ კვებაზე მყოფ ჩვილს იოდის დეფიციტი არ ემუქრება - ითვლება, რომ დედის რძესა და სხვა ნეიტრალურ პროდუქტებში (ხილი, ბოსტნეული და ა. შ.) შემავალი ნატრიუმი სავსებით აკმაყოფილებს ჩვილის მოთხოვნილებას ამ მიკროელემენტზე, ამიტომ საკვებში მისი დამატება საჭირო არ არის. "ხელოვნურ" ჩვილებში იოდდეფიციტის კორექცია შედარებით რთულია. საქმე ის არის, რომ წლამდე ასაკის ბავშვს დღე-ღამეში, დიდი-დიდი, 0,6 გ მარილი სჭირდება, მაგრამ 15 მკგ იოდი, რასაც მარილის ეს ულუფა შეიცავს, ორგანიზმისთვის ცოტაა; იოდის მოთხოვნილება რომ დაკმაყოფილდეს, წლამდე ასაკის ბავშვმა დღე-ღამეში 5-5,5 გ იოდიანი მარილი უნდა მიიღოს, ეს კი თირკმელებს უქადის საფრთხეს. ამიტომაც ხელოვნურ კვებაზე მყოფი ჩვილისთვის იოდის დეფიციტის პროფილაქტიკის ერთადერთ საშუალებად იოდით გამდიდრებული ნარევები და მათგან მომზადებული ფაფები ითვლება. თუ ჩვილი ბუნებრივ კვებაზეა, მაგრამ დედა პროფილაქტიკის მიზნით იოდს არ იღებს, ჩვილმა 6 თვემდე ყოველდღიურად უნდა მიიღოს, სულ ცოტა, 75 მკგ იოდი, ხოლო 6 თვიდან წლამდე - არანაკლებ 100მკგ-ისა.
ამერიკის მეცნიერებათა ნაციონალური აკადემიის 2001 წლის მონაცემებით, იოდის ყოველდღიური მოთხოვნილება ასეთია:
- 0-6 თვე - 110 მკგ
- 7-12 თვე - 130 მკგ
- 1-8 წელი - 90 მკგ
- 9-13 წელი - 120 მკგ
- მოზარდები - 150 მკგ
- ორსულები - 220 მკგ
- მეძუძურები - 290 მკგ
დედებო! თუ გსურთ, თქვენი შვილი გონებრივად და ფიზიკურად სრულყოფილი იყოს, არ დაგავიწყდეთ ორსულობისას იოდის დეფიციტის პროფილაქტიკა!