ექიმის ინფორმაციით, ლანჩხუთში გუშინ საღამოს დაჭრილი ოთხი მამაკაციდან კლინიკაში სამი გადაიყვანეს, საიდანაც ერთის მდგომარეობა მძიმე იყო
ერთ-ერთი ამ დრომდე კლინიკაში რჩება, მას სასწრაფო ოპერაცია ჩაუტარდა, ორი კლინიკიდან უკვე გაეწერა. კიდევ ერთ ახალგაზრდას კი სამედიცინო დაწესებულებაში გადაყვანა არ დასჭირდა. კლინიკა ,,მედალფას" დირექტორის რევაზ კვერენჩხილაძის თქმით, ერთი ახალგაზრდის მდგომარეობა იყო მძიმე. მისივე თქმით, სამივე მათგანს, დაზიანებები სავარაუდოდ, ცივი იარაღით ჰქონდა მიყენებული.
„გუშინ საღამოს ჩვენს კლინიკაში შემოიყვანეს სამი ახალგაზრდა, აქედან ერთ-ერთის მდგომარეობა იყო საკმაოდ მძიმე, აღენიშნებოდა მუცლის ღრუში შემავალი ჭრილობა, ღვიძლის დაზიანება. ჰქონდა შინაგანი სისხლდენა. პაციენტს სასწრაფოდ ჩაუტარდა ქირურგიული ოპერაცია, ოპერაციამ ჩაიარა წარმატებით. ამჟამად პაციენტის მდგომარეობა დამაკმაყოფილებელია და უტარდება შესაბამისი მკურნალობა. დანარჩენი ორი გაეწერა ბინაზე. სავარაუდოდ, დაზიანებები მიყენებული იყო ცივი იარაღით", - განაცხადა რევაზ კვერენჩხილაძემ.
შეგახსენებთ, რომ გუშინ ლანჩხუთში, ერთ-ერთ რესტორანში ახალგაზრდებს შორის დაწყებული ურთიერთშელაპარაკება სისხლიანი გარჩევით დასრულდა. რესტორნის მიმდებარე ტერიტორიაზე ერთმა ახალგაზრდამ ოთხ მამაკაცს დაზიანებები ცივი იარაღით მიაყენა.
სამართალდამცველებმა ბრალდებული უკვე დააკავა. შსს-მ ჯანმრთელობის განზრახ მძიმე დაზიანების ფაქტზე გამოძიება საქართველოს სისხლის სამართლის კოდექსის 117-ე მუხლის 1-ლი ნაწილით დაიწყო.