News
მეცნიერებმა მათი დნმ-ს ანალიზის შედეგები შეადარეს იმ ქალების ანალიზის შედეგებს, რომლებიც ვიტამინებს არ იღებდნენ. უჯრედის დაყოფისას ხდება დნმ-ს მოლეკულების დამოკლება, რაც სწრაფ დაბერებას იწვევს, ვიტამინები კი ხელს უშლიან მოლეკულების დამოკლებას და, შესაბამისად, ორგანიზმის დაბერებას. უფრო მეტიც: მულტივიტამინებმა, რომლებსაც ქალები რამდენიმე წლის განმავლობაში იღებდნენ, ხელი შეუწყვეს ქრომოსომის 5%-ით ზრდას, რაც სიცოცხლის 9,8 წლით გახანგრძლივებას ნიშნავს.
ხვრინვა თავის ტვინის მუშაობას აფერხებს
ბრიტანელი მეცნიერები წერენ, რომ ხვრინვა მნიშვნელოვან გავლენას ახდენს ტვინის მუშაობაზე. მათ აღმოაჩინეს ბიოქიმიური ცვლილებები, რომლებიც ხვრინვასთან არის დაკავშირებული. მეცნიერები დარწმუნებულნი არიან, რომ ტვინის ფუნქციის დარღვევას ხვრინვის დროს სუნთქვის შეკავებით განპირობებული ჟანგბადის უკმარისობა იწვევს. ამ დროს მომხდარ ცვლილებებს სპეციალისტები ტვინში ინსულტის დროს განვითარებულ დარღვევებს ადარებენ.
ძალისმიერი ვარჯიშები კიბოსგან გვიცავს
თურმე მამაკაცებს, რომლებიც რეგულარულად ვარჯიშობენ, უფრო იშვიათად ემართებათ კიბო. ბოლო ხანს ონკოლოგები კიბოს პროფილაქტიკის ერთ-ერთ საშუალებად ცხოვრების ჯანსაღ წესს, კერძოდ, სირბილსა და აერობიკას მიიჩნევენ, ახლახან კი მეცნიერთა ჯგუფმა დაადგინა, რომ დაავადების პრევენციაში დიდ როლს ასრულებს კუნთოვანი მასა. გამოკვლევაში, რომელიც 20 წელიწადს გრძელდებოდა, მონაწილეობა მიიღო 20-დან 82 წლამდე ასაკის 8677-მა მამაკაცმა. მეცნიერები რეგულარულად იკვლევდნენ მონაწილეებს და აღრიცხავდნენ თითოეული მათგანის კუნთოვან ძალას. აღმოჩნდა, რომ მამაკაცები, რომლებიც რეგულარულად ასრულებდნენ ძალისმიერ ვარჯიშებს და ჰქონდათ დიდი კუნთოვანი მასა, კიბოთი 30-40%-ით იშვიათად ავადმყოფობდნენ. ასე რომ, მეცნიერები დაბეჯითებით ურჩევენ მამაკაცებს, კვირაში ორჯერ მაინც შეასრულონ ძალისმიერი ვარჯიშები და ამასთან ერთად ყურადღება მიაქციონ მასის ნორმალურ ინდექსს.
რძის პროდუქტები ჰიპერტონიის განვითარების რისკს ამცირებს
ბრიტანელმა ექსპერტებმა აღმოაჩინეს, რომ რძე და რძის ნაწარმი ამცირებს წნევას და, შესაბამისად, ჰიპერტონიის განვითარების რისკს, თანაც ეს ეფექტი განსაკუთრებით თვალსაჩინოა ასაკოვან ადამიანებში. სპეციალისტებმა ექვსი წლის განმავლობაში ორი ათასზე მეტი ასაკოვანი ადამიანი გამოიკვლიეს და დაადგინეს, რომ უცხიმო რძისა და რძის პროდუქტების მოყვარულები 7%-ით იშვიათად უჩიოდნენ არტერიული წნევის მომატებას. სპეციალისტებმა ეს იმით ახსნეს, რომ რძის პროდუქტები მდიდარია კალციუმით, რომელიც სისხლძარღვშიგა წნევას არეგულირებს. მკვლევარები აცხადებენ, რომ ჯანმრთელობას შესაძლოა არგოს შედარებით ცხიმიანმა რძის პროდუქტებმაც, მაგრამ ზოგიერთი პირობით, მაგალითად, ყველის მიღება საჭიროა მცენარეულ საკვებთან ერთად, ხოლო არაჟანი და ნაღები უნდა დაემატოს სალათს.
მწვანე ჩაი აივ-ინფექციის წინააღმდეგ
გერმანელმა მეცნიერებმა აღმოაჩინეს, რომ მწვანე ჩაის კომპონენტებს უნარი შესწევთ, უჯრედები აივ ინფექციისგან დაიცვან. რამდენიმე ხნის წინ დამტკიცებულ იქნა, რომ სპერმაში შემავალ პროტეინებს აივ-ინფექციის უჯრედებში შეყვანა შეეძლოთ, ამიტომ სპეციალისტებმა ამ პროტეინთა მოქმედების დამბლოკავი საშუალების პოვნა გადაწყვიტეს. ინფექციის შეჩერების უნარი მწვანე ჩაის კომპონენტებს აღმოაჩნდათ. ამჟამად მიმდინარეობს მუშაობა ვაგინალური გელის შესაქმნელად, რომელსაც ინფექციის შეფერხება შეეძლება და კანის გაღიზიანებასაც არ გამოიწვევს. ამ გელის ერთ-ერთი აქტიური კომპონენტი მწვანე ჩაის კონცენტრატი იქნება.
ძილის წინ ტელევიზორის ყურება შესაძლოა ქრონიკული დაავადებების მიზეზად იქცეს
ფსიქოთერაპევტებმა კიდევ ერთხელ დაამტკიცეს, რომ საძინებელში ტელევიზორის დადგმა არ შეიძლება - უშუალოდ ძილის წინ ტელეგადაცემებისა და ფილმების ყურება უძილობასა და ქრონიკულ დაავადებებს იწვევს. ამერიკელმა მეცნიერებმა 21 500 კაცი გამოიკვლიეს. მათი თავის ტვინის სკანირებამ აჩვენა, რომ ტელევიზორის ყურების დროს ტვინი ისევე აქტიურად მუშაობს, როგორც ფიზიკური ვარჯიშის დროს, რამაც, ადვილი შესაძლებელია, უძილობა გამოიწვიოს, ძილის დარღვევა კი მოქმედებს იმუნიტეტზე და ხელს უწყობს ქრონიკული დაავადებების განვითარებას. ჯანმრთელობის პრობლემების თავიდან ასაცილებლად სპეციალისტები გვირჩევენ, არ დავიდგათ საწოლ ოთახში ტელევიზორი და არ ვუყუროთ ტელეგადაცემებსა და ფილმებს უშუალოდ ძილის წინ.
აღმოჩენილია გენი, რომელიც მენსტრუაციისა და მენოპაუზის დაწყების დროს განსაზღვრავს
ამერიკელმა მეცნიერებმა აღმოაჩინეს გენი, რომელიც მენსტრუაციის და კლიმაქსის დაწყებას განაგებს. 17 438 ქალის გამოკვლევის შედეგად მათ მენსტრუაციის დაწყების დროსთან დაკავშირებული გენების 19 ვარიანტი და მენოპაუზის დაწყებასთან დაკავშირებული გენების 13 ვარიანტი გამოავლინეს. გამოკვლევის ავტორის აზრით, სქესობრივი მომწიფებისა და მენოპაუზის ვადის გენეტიკური ბუნების აღმოჩენა მედიცინას ქალის რეპროდუქციულ ფუნქციასთან დაკავშირებული დაავადებების შესწავლაში დაეხმარება.
იაპონური პირშუშხა კარიესის წინააღმდეგ
იაპონური მწვანე პირშუშხა ამცირებს კიბოსა და თრომბების წარმოქმნის რისკს, აიშვიათებს ასთმის შეტევებს. გარდა ამისა, აქვს ძლიერი ანტიმიკრობული მოქმედება. მისგან დამზადებულ საკაზმს უმი თევზისგან მომზადებულ კერძებთან ერთად მიირთმევენ. ახლახან კი იაპონელმა მეცნიერებმა მისი კიდევ ერთი სამკურნალო თვისება აღმოაჩინეს: თურმე პირშუშხას კარიესის განვითარების შეფერხება შესძლებია. მის შემადგენლობაში შედის იზოთიოციანატები, რომლებიც კარიესის გამომწვევ მიკროორგანიზმებს დაავადების განვითარების საშუალებას არ აძლევენ.
ჰორტენზია - დიაბეტისა და ართრიტის სამკურნალო საშუალება
ჰორტენზიის ფესვების საფუძველზე დამზადებული პრეპარატები შველის ისეთ დაავადებებს, როგორიც არის გაფანტული სკლეროზი, ფსორიაზი, დიაბეტისა და ართრიტის ზოგიერთი ფორმა. საქმე ის არის, რომ ჩამოთვლილი დაავადებები ემართებათ ადამიანებს, რომელთაც იმუნიტეტი აქვთ დაქვეითებული. ამჟამად არსებულ იმუნოსტიმულატორებს ყველაზე მძიმე შემთხვევებში მიმართავენ როგორც უკანასკნელ საშუალებას. ისინი პაციენტს ინფექციებისგან არ იცავენ, თანაც გვერდითი ეფექტებიც აქვთ. სწორედ მათ ალტერნატივად შეიძლება იქცეს ახალი წამალი. ჰორტენზიის ეფექტს განაპირობებს მის შემადგენლობაში შემავალი ნივთიერება, რომელიც აბრკოლებს აუტოიმუნური დაავადებების გამომწვევი განსაზღვრული ტიპის უჯრედების განვითარებას.
ღვინო და თევზი ხელს უწყობს გულის მუშაობას
გულზე ღვინის კეთილისმყოფელი მოქმედება მეცნიერებმა არაერთხელ დაამტკიცეს. გულ-სისხლძარღვთა სისტემისთვის არანაკლებ სასარგებლო ყოფილა თევზიც, ხოლო ამ ორი პროდუქტის ერთად მიღება, მედიკოსების თქმით, კიდევ უფრო ძლიერ ეფექტს მოახდენს. მკვლევარებმა იტალიაში, ბელგიასა და ინგლისში 26-დან 65 წლამდე ასაკის 1500-ზე მეტი ადამიანი გამოიკვლიეს. აღმოჩნდა, რომ ღვინის ზომიერი მოხმარებისას სისხლში იმატებდა ომეგა-3 ცხიმოვანი მჟავასა და სისხლის წითელი ბურთულების რაოდენობა. ომეგა-3, რომელსაც განსაკუთრებით უხვად შეიცავს თევზი, აუმჯობესებს გულის მუშაობას და ამცირებს გულის უკმარისობის განვითარების რისკს. მეცნიერებს მიაჩნიათ, რომ ყოველდღიურ რაციონში ღვინოსთან ერთად თევზის ჩართვა გულ-სისხლძარღვთა სისტემაზე ძალზე სასიკეთო გავლენას მოახდენს.
თვალის სოკოვანი დაავადება
ამერიკის ზოგიერთ შტატში იფეთქა თვალის იშვიათმა სოკოვანმა ინფექციამ, რომელსაც თვალების ძლიერი ქავილი ახასიათებს. აფეთქებას კონტაქტური ლინზების საწმენდ სითხეს - Renu Multiplus-ს უკავშირებენ. ცოტა ხნის წინ ეს სითხე მწარმოებელმა ფირმამ მსოფლიო ბაზრიდან უკან გამოითხოვა.
აშშ-ში თვალის სოკოვანი დაავადების მქონეთა 30%-ს რქოვანას გადანერგვა სჭირდება - ასეთი ინფორმაცია გამოაქვეყნა აშშ-ის ინფექციურ დაავადებათა კონტროლისა და პროფილაქტიკის ცენტრმა. ექსპერტების აზრით კი ასეთი ადამიანების რიცხვი თანდათან გაიზრდება, რადგან ინფექცია გვიანდელ სტადიაში ძნელად ექვემდებარება მედიკამენტურ მკურნალობას.
ღვინო და ფუტკრის შხამი
ალერგიული რეაქცია, რომელსაც ახალდაყენებული ღვინო და მაჭარი იწვევს, სინამდვილეში შესაძლოა კრაზანის ან ფუტკრის შხამის ბრალი იყოს - ყურძნის დაწურვისას ბადაგში შესაძლოა ჩავარდეს მწერი, რომელიც ყურძენს თავს დასტრიალებს. ასეთი ღვინო რეალურ საფრთხეს უქადის ყველას, ვისაც კრაზანის ან ფუტკრის შხამზე ალერგია აქვს. რიო ორტეგას ჰოსპიტალში (ესპანეთი) მომუშავე ექიმებმა აღწერეს ალერგიული რეაქციის რამდენიმე შემთხვევა, რომლებმაც ღვინის, ბადაგის ან მაჭრის დალევის შემდეგ იჩინა თავი. ზოგიერთს ალერგია სახის გაწითლებით, ქავილითა და ტუჩების შეშუპებით გამოუვლინდა, ზოგიერთს - ასთმური შეტევით, რამდენიმე ადამიანს კი განუვითარდა ანაფილაქსიური შოკი - ალერგიის ყველაზე მძიმე ფორმა, რომელიც სიცოცხლისთვის ძალიან საშიშია. საბედნიეროდ, ყველა პაციენტი გადარჩა, მაგრამ ექიმები შეფიქრიანდნენ - მათ ვერაფრით დაადგინეს ალერგიის მიზეზი. ტესტირების შედეგად გამოირიცხა ორი ყველაზე მეტად მოსალოდნელი ალერგენი - ყურძნის ექსტრაქტი და კვერცხის ცილა, რომელსაც ზოგჯერ ამატებენ ღვინოს. სამაგიეროდ, სისხლში ყველა პაციენტს აღმოაჩნდა ანტისხეულები კრაზანის ან ფუტკრის შხამის მიმართ, თუმცა თავად ირწმუნებოდნენ, რომ მათთვის მწერს არ უკბენია. შემდგომმა ტესტირებამ დაადასტურა, რომ ალერგია გამოწვეული იყო კრაზანისა და ფუტკრის ცილებით, რომლებიც მაჭარში აღმოჩნდა. საინტერესოა, რომ ძველი ღვინო ალერგიულ რეაქციას არ იწვევდა. მეცნიერები ვარაუდობენ, რომ დაღვინების პროცესში კრაზანისა და ფუტკრის შხამის ცილები იშლება. სრული დაშლისთვის შესაძლოა რამდენიმე კვირაც საკმარისი იყოს, მაგრამ ექიმები კრაზანისა და ფუტკრის შხამის მიმართ ალერგიულ ადამიანებს ურჩევენ, მაჭარს, ბადაგს და ახალდაყენებულ ღვინოს ერიდონ.
ალერგიის საწინააღმდეგო ვაქცინა
შვეიცარიულმა კომპანიამ Cytos Biotechnology-მ დაასრულა ალერგიული რეაქციების საწინააღმდეგო ვაქცინის კლინიკური გამოცდა. ვაქცინა ადამიანს მტვრის ტკიპის, მცენარის მტვრისა და სხვა ალერგენებისგან დაიცავს. ვაქცინის კვლევაში მონაწილეობა მიიღეს ქალებმაც და მამაკაცებმაც, რომლებსაც მტვრის ტკიპაზე ალერგია ჰქონდათ. მათ ნაწილს ექვსი კვირის განმავლობაში ყოველკვირეულად უკეთებდნენ ექსპერიმენტულ პრეპარატს, ნაწილს კი პლაცებოს. შედეგი განსაცვიფრებელი აღმოჩნდა: პრეპარატმა 100-ჯერ გაზარდა გამოსაკვლევ პირთა მედეგობა ალერგენის მიმართ. ეფექტის ხანგრძლივობა ჯერჯერობით უცნობია. კვლევები გრძელდება. ანტიალერგიული ვაქცინა შეიცავს ტუბერკულოზის გამომწვევის დნმ-ს ფრაგმენტს, რომელიც ადამიანისთვის საშიში არ არის. აცრა იმგვარად გადააპროგრამებს ალერგიით დაავადებულის იმუნურ სისტემას, რომ ამ უკანასკნელმა უმტკივნეულოდ მოიშოროს ანტიგენი. ამავე დროს, ვაქცინა თრგუნავს თ-ლიმფოციტების გამომუშავებას, რომლებიც ალერგიული რეაქციების განვითარებაში უმთავრეს როლს ასრულებენ.
ანტიალერგიულ ვაქცინას უნარი შესწევს, თავიდან აგვაცილოს ჭინჭრის ციება და ბრონქული ასთმა. უახლოეს მომავალში იგეგმება ცდების სერია კვებითი ალერგენების წინააღმდეგ პრეპარატის ეფექტურობის შესაფასებლად.
ზოგი ჭირი მარგებელია
იმუნური სისტემის განსაკუთრებულმა აქტივობამ, რომელიც ალერგიულ დაავადებებს იწვევს, შესაძლოა ორგანიზმი თავის ტვინის კიბოსგან დაიცვასო, ფიქრობენ ამერიკელი და ბრიტანელი მეცნიერები. ჰარვარდსა და წმინდა თომას ჰოსპიტალში, ლონდონში, მკვლევარებმა თავის ტვინის სიმსივნით დაავადებული 4500 პაციენტის მონაცემები შეისწავლეს. აღმოჩნდა, რომ ადამიანებს, რომელთაც ბრონქული ასთმა, ატოპიური დერმატიტი და პოლინოზი აქვთ, გლიომა 30-39%-ით უფრო იშვიათად უვითარდებათ. გლიომა ტვინის კიბოს ერთ-ერთი ყველაზე საშიში ნაირსახეობაა. ხუთწლიანი გადარჩენადობის მაჩვენებელი (დიაგნოზის დასმის შემდეგ სიცოცხლის 5 წლით გახანგრძლივების ალბათობა) 3%-ს არ აღემატება. მეცნიერთა თქმით, არსებობს ერთგვარი კანონზომიერება, რომელიც ალერგიულ რეაქციებზე პასუხისმგებელი ნივთიერებების - ციტოკინების აქტივობის მომატებას უკავშირდება. კერძოდ, კვლევებმა აჩვენა, რომ ციტოკინები აფერხებს გლიომის უჯრედების ზრდას. სწორედ ეს ამცირებს ალერგიულ პაციენტებში ტვინის კიბოს წარმოშობის ალბათობას.