ზურგის მასაჟი ოპერაციის შემდგომ ტკივილს ხსნის
ქალაქ ენ-არბორის ვეტერანთა საავადმყოფოს სპეციალისტებმა გამოიკვლიეს 64 წლისა და ამაზე უფროსი ასაკის მამაკაცები, რომლებსაც გულმკერდისა და მუცლის ღრუს ორგანოების ოპერაცია ჰქონდათ გადატანილი. ისინი სამ ტოლ ჯგუფად დაყვეს. პირველი ჯგუფის პაციენტებს ოპერაციის შემდეგ ოთხი დღის განმავლობაში ყოველდღიურად უტარდებოდათ ზურგის 20-წუთიანი მასაჟი; მეორე ჯგუფის წამომადგენლები ამ ხნის განმავლობაში უბრალოდ მასაჟისტებთან ურთიერთობდნენ;მესამე ჯგუფის წარმომადგენლებს სტანდარტულად მკურნალობდნენ.
ამასთანავე, სამივე ჯგუფის წარმომადგენლებს აძლევდნენ ნარკოტიკულ ტკივილგამაყუჩებელს. პაციენტები ტკივილის ინტენსივობას ათბალიანი სისტემით აფასებდნენ. კვლევის ავტორის დენიელ ჰინშოუს თქმით, ოპერაციის პირველ დღეს ყველა პაციენტი გრძნობდა ძლიერ ტკივილს, რომელიც დროთა განმავლობაში იკლებდა, მაგრამ მათ, ვისაც მასაჟს უკეთებდნენ, ტკივილის ინტენსივობა ერთი დღით ადრე უქვეითდებოდათ.
-
კვლევის ხელმძღვანელმა აღნიშნა, რომ მასაჟი, გარდა იმისა, რომ აფართოებს სისხლძარღვებს, აძლიერებს ლიმფისა და სისხლის მიმოქცევას, ზრდის კანის ტემპერატურას და ადუნებს კუნთებს, პაციენტების ფსიქოლოგიურ მდგომარეობაზეც კეთილისმყოფელ გავლენას ახდენს.
ის, ერთი მხრივ, ამცირებს რძის მჟავას დონეს და ამ გზით ასუსტებს კუნთების ტკივილს, მეორე მხრივ კი ხელს უწყობს სიამოვნების ჰორმონის ენდორფინის გამოყოფას, რომელსაც ტკივილგამაყუჩებელი ეფექტი აქვს. ამერიკელ მეცნიერთა დაკვირვების შედეგი პრაქტიკაში უკვე დაინერგა.
ამიერიდან ენ-არბორსა და ვეტერანთა სხვა კლინიკებში მასაჟი პოსტოპერაციული თერაპიის ერთ-ერთ კომპონენტად იქცევა.