როგორ დავითანხმოთ ცოლი ბავშვის გაჩენაზე
დედობის, ამ მარადიული ფასეულობის, მიმართ კაცობრიობის დამოკიდებულებაც კი იცვლება. თუ ადრე ქალისთვის საზოგადოებაში განკუთვნილი იყო მხოლოდ ერთი, დედის როლი და ეს იყო მისი ძირითადი საქმიანობა, დღეს მას იმდენი მოვალეობა აკისრია, რომ დედობა ზოგჯერ უკანა პლანზე გადადის. ბავშვის გაჩენაზე უარის თქმის მიზეზი, დღევანდელი სამწუხარო რეალობის გათვალისწინებით, ქალებს მრავლად აქვთ. ჩვენ მხოლოდ რამდენიმეს ჩამოვთვლით:
- ფიგურის გაფუჭებისა და საყვარელი მამაკაცის მხრიდან ინტერესის დაკარგვის შიში. ამ შემთხვევაში უნდა ვიფიქროთ, რომ ქალი უბრალოდ არ არის დარწმუნებული პარტნიორის გრძნობებში და ამიტომ დედობასაც ერთგვარი შიშით ეკიდება.
- ხვალინდელი დღის შიში, უბინაობა და უამრავი სხვა მატერიალური პრობლემა. ამ შემთხვევაში მამაკაცმა უნდა დაუმტკიცოს ქალს, რომ შეძლებს ყველა მატერიალური სირთულის მეტ-ნაკლები წარმატებით მოგვარებას.
- სამსახურის დაკარგვის შიში, განსაკუთრებით - თუ ის პერსპექტიულია. ამ შემთხვევაში მამაკაცმა კატეგორიულად კი არ უნდა დასვას სამსახურსა და ბავშვს შორის არჩევანის გაკეთების საკითხი, არამედ უნდა დაარწმუნოს ქალი, რომ მზად არის, ჩვილის მოვლასთან დაკავშირებული პრობლემების ნახევარი საკუთარ თავზე აიღოს.
როგორ მოიქცეს მამაკაცი, თუ ქალი კარიერულ ზრდაზეა ორიენტირებული და ბავშვის გაჩენას უახლოეს მომავალში არ აპირებს? ფსიქოლოგები მათ რამდენიმე რჩევას სთავაზობენ:
- ქალს ყურებით უყვარს, ამიტომ ყოველთვის უნდა შეგეძლოთ მასთან საუბარი, ხშირად უმეორეთ, რა ძლიერად გიყვართ და რა კარგი დედა დადგება მისგან.
- შეიძინეთ ლიტერატურა ორსულთათვის, თუ ქალი მოდის აქტიური მიმდევარია - ორსულთათვის განკუთვნილი მოდის ჟურნალებიც.
- მეტად ქმედითი საშუალებაა ქალის ბავშვთა ტანსაცმლის მაღაზიაში წაყვანა. პატარა ჩაჩების, ქუდების, წინდების, შარვლების, კაბების, კომბინეზონებისა და მაისურების დანახვისას ქალს ალბათ მოუნდება, ეს ყველაფერი ვიღაცას მოარგოს. ძალიან კარგი იქნება, თუ მისცემთ საშუალებას, შეიძინოს ყველაფერი, რაც მოეწონება. ოღონდ დაჟინებით ნუ მოსთხოვთ, ბავშვის გაჩენაზე ფიქრი იმავე წუთიდან დაიწყოს. უთხარით, რომ ამ ყველაფერს სამომავლოდ ყიდულობთ. იდოს თაროზე ყოველი შემთხვევისთვის, მანამდე, ვიდრე თქვენი საყვარელი ქალი შვილის გაჩენას არ გადაწყვეტს.
- თუ მაინც ვერ მოახერხეთ მისი დაყოლიება, მაშინ სხვა მეთოდები სცადეთ. პირველ რიგში აჩვენეთ, რამდენად კარგი მამა იქნებით, რა კარგად გეხერხებათ ბავშვებთან ურთიერთობა. მაგალითად, იმ ოჯახში სტუმრობისას, სადაც პატარა ბავშვები ჰყავთ, წაიყოლეთ საჩუქრები და პატარებს წაეთამაშეთ. როცა თქვენი მეუღლე დაინახავს, რამდენად დიდ ყურადღებას უთმობთ სხვის შვილებს, თავადაც მოინდომებს ბავშვების ყოლას, თუნდაც უბრალო ეჭვიანობის გამო.
ზოგადად, თუ ობიექტურები ვიქნებით, იმაში, რომ თანამედროვე ქალებს ბავშვის გაჩენა არ სურთ, ლომის წილი მამაკაცებს მიუძღვით. ყველა ქალი შესანიშნავად აცნობიერებს, რომ ბავშვის დაბადება უზარმაზარი პასუხისმგებლობაა, რომელიც პირველ რიგში მას დააწვება მხრებზე, ამიტომ თუ მამაკაცს შვილი სურს, უნდა დაუმტკიცოს საყვარელ ქალს, რომ ბავშვის მოვლასა და აღზრდასთან დაკავშირებულ ყველა მოვალეობას სიამოვნებით გაინაწილებს. თუ ქალი დარწმუნდა, რომ მართლაც ამოუდგებით მხარში, ბავშვის გაჩენას სხვა თვალით შეხედავს.