ლალი ჩხიკვაძე

ბრენდებს ზომების სხვადასხვა დიაგრამები აქვთ და უმჯობესია, რამდენიმე ვარიანტი სცადოთ, რომ სასურველ ზომას მიაგნოთ.

თუ სამოსი კარგად გაქვთ, მაგრამ არა იდეალურად, ეს შეიძლება გამოსწორდეს: კარგი მკერავი შარვლის ან პერანგის სახელოების სიგრძეს თქვენს სხეულს მოარგებს. ეს დეტალებია პასუხისმგებელი იმ საერთო შთაბეჭდილებაზე, რომელსაც სხვებზე დატოვებთ. რაც შეეხება კლასიკურ პერანგებს, ჯობს, შეაკერინოთ, რადგან ის გარდერობის ძირითადი ელემენტია და უნაკლოდ უნდა გქონდეთ.

იყიდეთ თქვენი ზომის ნივთები და არა იმ ზომისა, რომლის მიღწევაც გსურთ. ტანსაცმლის არჩევა იმ მოლოდინით, რომ წონის დაკლებისას ან, პირიქით, კუნთების მასის მატებისას მოგერგებათ, ცუდი აზრია: ასეთი რამის წინასწარ პროგნოზირება შეუძლებელია.

• ვიწრო, მოჭერილი ტანსაცმელი არავის უხდება: არ იყიდოთ მჭიდრო სვიტერი ან პიჯაკი იმისთვის, რომ უფრო გამხდარი გამოჩნდეთ. ამას საპირისპირო ეფექტი ექნება და ფიზიკური დისკომფორტი თავს დაუცველად გაგრძნობინებთ.

თუ ვერ განსაზღვრეთ თქვენი სტილი, ექსპერიმენტებს ექსტრავაგანტული თარგებით ნუ ჩაატარებთ. აირჩიეთ კლასიკური მოდელები, რომლებიც არც მოსაწყენი და არც ისე პრეტენზიულია.

თავისუფალი თარგისა და ტომარასავით ტანსაცმელი განსხვავებული რამ არის. ნუ გაგიტაცებთ ე. წ. Oversize – თუ, რა თქმა უნდა, გარკვეული სტილის მიმდევარი არ ხართ: ეს არ დაგეხმარებათ, მაგალითად, ზედმეტი წონის დამალვაში, პირიქით, უფრო მოცულობითი გამოჩნდებით. გარდა ამისა, ასეთი ტანსაცმელი ვიზუალურად შეიძლება არც ისე ესთეტიკური იყოს.

დროდადრო მოდაში შემოდის ურთიერთსაწინააღმდეგო ელემენტები: დამოკლებული შარვალი, მაისურები საშუალო სიგრძის სახელოებით. მაშინაც კი, თუ ეს სეზონის ყველაზე აქტუალური ტრენდია, ბრმად ნუ აჰყვებით მას: ასეთი რამ ყველას არ უხდება. უპირველესად, დარწმუნდით, რომ სასაცილოდ არ გამოიყურებით. ამის თავიდან არიდება კი კლასიკური ვარიანტების შერჩევით შეიძლება.

• ზომის სქემა არა მხოლოდ ტანსაცმლისთვის, აქსესუარებისთვისაც არსებობს: ხელთათმანების, ჰალსტუხების, წინდებისთვის. ასეთი დეტალების ზომის მიხედვით შერჩევა ბევრად უკეთესია, ვიდრე onesize-ის არჩევა.