ლალი ჩხიკვაძე

კანმა რომ ზაფხულში მეტად კომფორტულად იგრძნოს თავი, წინასწარ უნდა ვიზრუნოთ მასზე: გავაძლიეროთ რქოვანა შრე, ეპიდერმისი, დავატენიანოთ, ვკვებოთ, გავაჯეროთ სასარგებლო ნივთიერებებით, რომ არ იყოს მგრძნობიარე ზედმეტად აგრესიული ულტრაიისფერი სხივებისადმი. ზაფხულში კანისთვის მთავარი „აგრესორები“ მზე და მტვრით გაჯერებული მშრალი ჰაერია.

ხშირად ადამიანებს ჰგონიათ, რომ სახეზე მზისგან დამცავი კრემის წასმით თავს იცავენ ულტრაიისფერი გამოსხივების მავნე ზემოქმედებისგან. მაგრამ ეს უკანასკნელი ხვდება თმაზე, სახეზე, ხელებსა და ფეხებზე, სხეულის ყველა ღია ნაწილზე. ამიტომ, თუ გვსურს თავი დავიცვათ ულტრაიისფერი გამოსხივებისგან, უნდა გამოვიყენოთ სახის და სხეულის დამცავი კრემი, ლოსიონი, სმუზი ან ტონიკი, თმის სპრეი.

ჩვენ ყველას განსხვავებული კანი გვაქვს, ამიტომ აუცილებელია პროდუქტების ინდივიდუალურად შერჩევა. ასევე აუცილებელია გვესმოდეს, რომ კანის მდგომარეობა დამოკიდებულია სხეულის მდგომარეობაზე, ამიტომ აუცილებელია მას „შიგნიდან“ დაეხმაროთ: გავთავისუფლდეთ ტოქსინებისგან, გავამდიდროთ რაციონი ხილით, ბოსტნეულით, ვიტამინებით, მაკრო- და მიკროელემენტებით.

ზაფხულში ჩვენს კანს მეტი ტენიანობა სჭირდება. მაგრამ აქაც არ არის საჭირო უკიდურესობა. თანმიმდევრული უნდა ვიყოთ. საკუთარ თავზე ტონობით დამატენიანებლის წასმა უსარგებლოა. ეს უნდა გაკეთდეს ეტაპობრივად, დოზირებულად. რაც მთავარია, დღის განმავლობაში აუცილებლად უნდა გვქონდეს მზისგან დამცავი საშუალება კანის ტიპის მიხედვით (ან ტონალური კრემი მზისგან დამცავი ფაქტორით), საღამოს კი სახე გავიწმინდოთ და მოვუსმინოთ, სჭირდება თუ არა დამატებით დატენიანება, ნიღბის გაკეთება და ა.შ. კანის მცირედი დამწვრობისას არ არის საჭირო ბევრი კოსმეტიკური საშუალების წასმა. კანს დახმარება სჭირდება. ამ შემთხვევაში კოსმეტიკური ზეთებია კანის მაშველი, რადგანაც შექმნიან ოკლუზიას (კანში ტენიანობის ჩაკეტვას) და ეპიდერმისის დამწვარი ფენა დაიწყებს რეგენერაციას. როდესაც ეს პროცესი დასრულდება, კანს შეიძლება მიეცეს დამატებითი კვება და დატენიანება.

ზაფხულში უნდა შევწყვიტოთ კანზე ყველა აგრესიული, განსაკუთრებით ქიმიური ზემოქმედება – შევამციროთ სკრაბების გამოყენება, თავი შევიკავოთ ზედმეტი წმენდისგან, ვისაც მშრალი კანი აქვს, უნდა შეზღუდოს პუდრის მოხმარება.

უფრო მსუბუქი კრემები უნდა გამოვიყენოთ, რადგან სახეზე არ უნდა იყოს მყარი ოკლუზია. ჩვენი კანი შეიცავს როგორც ცხიმოვან, ისე საოფლე ჯირკვლებს და მათთვის ბარიერი არ უნდა შეიქმნას. კოსმეტიკური კრემების ბევრი მწარმოებელი მიუთითებს, რომელი სეზონისთვისაა ის განკუთვნილი.

არის თუ არა საჭირო ზაფხულში სახის უფრო ხშირად დაბანა?

მხოლოდ იმ შემთხვევაში, თუ გრძნობთ ამის საჭიროებას. გასათვალისწინებელია, რომ ზაფხულში უფრო ხშირად ვოფლიანდებით.

შეგიძლიათ გამოიყენოთ თერმული წყალი. არ უნდა დაგვავიწყდეს, რომ ჩვენი სხეული ერთი მთლიანია, ამიტომ აუცილებელია შესხურება არა მხოლოდ სახეზე, არამედ ხელებსა (განსაკუთრებით მაჯის, იდაყვის სახსრის არეში) და ყოველთვის ფეხებზე.

მაგრამ თუ იმყოფებით კონდიცირებულ ოთახში, თერმული წყლის ხშირი გამოყენება შეიძლება საზიანო იყოს. განსაკუთრებით – როზაცეის (კანის სისხლძარღვთა დაავადება, სისხლძარღვების კედლების გათხელება, რაც იწვევს კანის სხვადასხვა უბნის სიწითლეს) დროს.

ზოგჯერ გვირჩევენ, ზაფხულში შევწყვიტოთ დეკორატიული კოსმეტიკური საშუალებები, თითქოს ეს აზიანებს კანს, რაც მთლად სიმართლე არ არის.

კოსმეტიკური პროდუქციის მწარმოებელი კომპანიები ისე მუშაობენ, რომ მათი პროდუქცია წელიწადის სხვადასხვა დროს გამოვიყენოთ და განსხვავებულ პირობებში თავს კომფორტულად ვგრძნობდეთ.

აუცილებელია გვესმოდეს, რომ ტანსაცმელი იცავს სხეულს, სწორად შერჩეული დეკორატიული კოსმეტიკა კი ჩვენი კანის სამოსია.

რაც მთავარია, არ დაგვავიწყდეს საღამოს სახის დაბანა. მთავარია, ეს პროცედურა უნდა შესრულდეს სწორად. ჯერ საჭიროა იმ საშუალების გამოყენება, რომლითაც იშორებთ მაკიაჟს, შემდეგ წყლით დაბანა და ტონიკის წასმა. ეს სავსებით საკმარისია. თუ კრემის წასმას გადაწყვეტთ, გახსოვდეთ, რომ ეს უნდა გააკეთოთ ძილის წინ არა უგვიანეს ორი საათისა და არა დაბანისთანავე. დილით, ძილის შემდეგ, საკმარისია წყლით დაბანა.