ატოპიური დერმატიტი - რა ფაქტორები ამწვავებს მას
კანის მდგომარეობის გაუარესების მთავარი მიზეზი კი კანის გამოშრობაა, რომლის პროვოცირებასაც ახდენს შემდეგი ფაქტორები: იმუნიტეტის დაქვეითება, ჰაერის ტემპერატურის ცვლილება, ოთახის ტემპერატურის მონაცვლეობა.
კანის დაავადებებიდან ზამთარში გამწვავება ახასიათებს ბავშვთა ატოპიურ დერმატიტს.
ატოპიური დერმატიტი იგივე ატოპიური ეგზემა არის კანის ქრონიკული ანთებითი დაავადება, (რომლის გამოვლენა ხდება განსაკუთრებით 3-6 თვის ასაკის შემდეგ). გენეტიკური ფაქტორის გარდა, საყურადღებოა, რომ ის ხშირად ასოცირებულია ბრონქულ ასთმასთან, ალერგიულ რინიტთან, საკვებისმიერ ალერგიასთან და კანის სხვადასხვა ინფეციებთან.
ატოპიური დერმატიტის ძირითადი სიმპტომებია: კანის სიმშრალე, სიწითლე ძირითადად კიდურებზე, ქავილი აქერცვლა, ნაკაწრები, ნახეთქები და მეორადად დაინფიცირების შემთხვევაში შესაძლოა ინფექციურ-ჩირქოვანი დაავადებებისთვის დამახასიათებელი კლინიკური სურათის გამოვლენა.
განსაკუთრებით საყურადღებოა, რომ პედიატრიულ ასაკში დაავადება ვლინდება ლოყებზე, მოზარდობის ასაკში კი უფრო ხშირად გვხვდება კანის ნაოჭებზე.
ატოპიური დერმატიტის მკურნალობა მოიცავს ორ ეტაპს. გამწვავების მართვა და რემიისიის შენარჩუნება.
აუცილებელია კანის მუდმივად დატენიანება და კანის ბარიერული ფუნქციის შენარჩუნება. კანის სწორი მოვლა არის ერთ-ერთი მნიშვნელოვანი ფაქტორი დაავადების მართვის დროს. სწორი მოვლა გულისხმობს სპეციალურად შერჩეულ დასაბან საშუალებას, წყლის ტემპერატურის შემცირებას, აბაზანის მიღების შემდეგ კანის დატენიანებას ატოპიური დერმატიტისთვის განკუთვნილი საშუალებებით. ბანაობის ხანგრძლივობის შემცირებას (არაუმეტეს 10 წუთი).
ზამთარში განსაკუთრებით დაუცველია სხეულის ის უბნები, რომელთაც შეხება აქვს გარემოს ცივ ტემპერატურასთან. ამ დროს სასურველია მათი ორმაგად დატენიანება.
პაციენტებმა დაავადების ნიშნების გამოვლენისთანავე უნდა მიმართონ ექიმს და მოერიდონ თვითმკურნალობას. ასეთ დროს მკურნალობა უფრო ხანგრძლივდება და რთულდება.